ಬೆಂಗಳೂರು: ಕೋವಿಡ್ ಹೊಡೆತಕ್ಕೆ ಹಲವು ರೀತಿಯ ವ್ಯಾಪಾರ-ವಹಿವಾಟುಗಳು ನಿಂತುಹೋಗಿವೆ. ಅರ್ಥವ್ಯವಸ್ಥೆಯ ಪ್ರತೀ ಕ್ಷೇತ್ರಗಳೂ ನಲುಗಿವೆ. ಬೇಸಿಗೆ ಸಂದರ್ಭದಲ್ಲಿ ಉತ್ತಮ ವ್ಯಾಪಾರ ನಡೆಸುತ್ತಿದ್ದ ಕುಂಬಾರರು, ಮಡಿಕೆ ಮಾರಾಟ ಮಾಡುವವರ ಬದುಕು ಕೂಡ ಅತಂತ್ರಗೊಂಡಿದೆ.
ಪ್ರತಿ ವರ್ಷ ಬೇಸಿಗೆ ಆರಂಭವಾಗುತ್ತಿದ್ದಂತೆ ನಗರದ ಮುಖ್ಯ ರಸ್ತೆಗಳಲ್ಲಿ ಹೆಚ್ಚು ಮಾರಾಟವಾಗುತ್ತಿದ್ದ ಮಡಿಕೆಗಳು ಈ ಬಾರಿಯ ಲಾಕ್‌ಡೌನ್‌ನಿಂದ ಕಳೆಗುಂದಿವೆ. ಮಡಿಕೆಗಳಿಗೆ ಬೇಡಿಕೆ ಇಲ್ಲದೇ ಕುಂಬಾರರು, ಮಾರಾಟಗಾರರು ಸಂಕಷ್ಟದಲ್ಲಿದ್ದಾರೆ.
ವಿಶೇಷವಾಗಿ ಮಡಿಕೆ ತಯಾರಕರು ಹಾಗೂ ಮಾರಾಟಗಾರರು ಬೇಸಿಗೆಯಲ್ಲಿ ಮಣ್ಣಿನ ಮಡಿಕೆಗಳನ್ನು ತಯಾರಿಸಿ ಮಾರಾಟ ಮಾಡಿ ಆದಾಯ ಪಡೆಯುತ್ತಾರೆ. ಆದರೆ, ಕಳೆದೊಂದು ವರ್ಷದಿಂದ ತಯಾರಿಸಿದ ಮಡಿಕೆಗಳನ್ನು ಮನೆಯಲ್ಲಿಯೇ ಇಟ್ಟುಕೊಳ್ಳಬೇಕಾದ ದುಸ್ಥಿತಿ ಬಂದೊದಗಿದೆ. ಪರಿಣಾಮ, ವ್ಯಾಪಾರಿಗಳು ನಷ್ಟ ಅನುಭವಿಸುತ್ತಿದ್ದಾರೆ. ಕಳೆದ ವರ್ಷವೂ ಕುಂಬಾರರು ಹಾಗು ಮಡಿಕೆ ವ್ಯಾಪಾರಿಗಳು ಈ ಸಂದರ್ಭದಲ್ಲಿ ಭಾರಿ ನಷ್ಟ ಅನುಭವಿಸಿದ್ದರು. ಈ ಬೇಸಿಗೆಯಲ್ಲಾದರೂ ಉತ್ತಮ ಆದಾಯ ಗಳಿಸಬೇಕು ಅಂದುಕೊಂಡವರಿಗೀಗ ಗಾಯದ ಮೇಲೆ ಬರೆ ಎಳೆದ ಪರಿಸ್ಥಿತಿ.
ರಾಜ್ಯದಲ್ಲಿ ಕೋವಿಡ್ ಎರಡನೇ ಅಲೆ ನಿಯಂತ್ರಣಕ್ಕೆ ರಾಜ್ಯ ಸಂಪೂರ್ಣ ಲಾಕ್ ಆಗಿದ್ದು, ಕುಂಬಾರಿಕೆಯನ್ನು ನೆಚ್ಚಿಕೊಂಡು ವ್ಯಾಪಾರದಲ್ಲಿ ನಿರತರಾಗಿರುವ ರಾಜ್ಯದ ಸಾವಿರಾರು ಕುಟುಂಬಗಳು ವ್ಯಾಪಾರವಿಲ್ಲದೆ ತೊಂದರೆಯಲ್ಲಿ ಸಿಲುಕಿವೆ. ಈ ಬಾರಿ ಮಡಿಕೆ ತಯಾರಿಸುವ ಕುಂಬಾರರು, ಮಾರುವ ವ್ಯಾಪಾರಸ್ಥರು ಕೂಡಾ ಕಡಿಮೆಯಾಗಿದ್ದು, ಇವರೆಲ್ಲರೂ ಕೊರೊನಾದಿಂದ ಆರ್ಥಿಕ ತೊಂದರೆಗೆ ಸಿಲುಕಿ, ಜೀವನ ನಿರ್ವಹಣೆಗಾಗಿ ಪರದಾಡುವಂತಾಗಿದೆ.
ಕುಂಬಾರಿಕೆ ವೃತ್ತಿಯನ್ನೇ ನಂಬಿ ಜೀವನ:
ಬೆಂಗಳೂರಿನ ಕೆ.ಆರ್. ಪುರ ಮತ್ತು ಬೆಂಗಳೂರು ಗ್ರಾಮಾಂತರ ಪ್ರದೇಶದ ಹೊಸಕೋಟೆಯಲ್ಲಿ 300ಕ್ಕೂ ಹೆಚ್ಚು ಕುಂಬಾರ ಸಮಾಜದ ಮನೆಗಳಲ್ಲಿ 600ಕ್ಕೂ ಹೆಚ್ಚು ಜನರು ವಾಸವಾಗಿದ್ದಾರೆ. ಇದರಲ್ಲಿ 100ಕ್ಕೂ ಹೆಚ್ಚು ಕುಟುಂಬಗಳು ಕುಂಬಾರಿಕೆ ವೃತ್ತಿಯನ್ನೇ ನಂಬಿವೆ. ಕೆಲವರು ಮಡಿಕೆಗಳ ಅಂಗಡಿಗಳನ್ನು ಇಟ್ಟುಕೊಂಡು ವ್ಯಾಪಾರ ನಡೆಸಿದರೆ, ಇನ್ನೂ ಕೆಲವರು ಗಣೇಶ ಮೂರ್ತಿಗಳನ್ನು ತಯಾರು ಮಾಡುವ ಕೆಲಸದಲ್ಲಿ ನಿರತರಾಗಿದ್ದಾರೆ. ನಗರದ ಪ್ರತಿಷ್ಠಿತ ಮಾರುಕಟ್ಟೆಗಳಲ್ಲಿ ಒಂದಾದ ಕೆ.ಆರ್.ಪುರ ಮಾರುಕಟ್ಟೆ ಸಮೀಪದ ರಾಷ್ಟ್ರೀಯ ಹೆದ್ದಾರಿ ಮದ್ರಾಸ್ ರಸ್ತೆ, ಕುಂಬಾರ ಬೀದಿ, ಹಳೆ ಪೊಲೀಸ್ ಠಾಣೆ ರಸ್ತೆಯ ಬೀದಿಗಳಲ್ಲಿ ಕುಂಬಾರರು ಅಂಗಡಿಗಳನ್ನು ಇಟ್ಟುಕೊಂಡು ಜೀವನ ಸಾಗಿಸುತ್ತಿದ್ದಾರೆ. ಆದ್ರೀಗ ವ್ಯಾಪಾರವೆಲ್ಲವೂ ಸ್ಥಗಿತಗೊಂಡಿದೆ.
ಇವರು ಸಾಲ ಮಾಡಿ ಮಡಿಕೆ, ದೀಪಗಳು, ಪಾಟ್ ಸೇರಿದಂತೆ ಇನ್ನಿತರೆ ವಸ್ತುಗಳನ್ನು ಬೇರೆ ಊರುಗಳಿಂದ ಖರೀದಿಸಿ ಸಂಗ್ರಹಿಸಿಟ್ಟುಕೊಂಡಿದ್ದಾರೆ. ಆದರೆ ಗ್ರಾಹಕರಿಲ್ಲದೇ ತಲೆ ಮೇಲೆ ಕೈಹೊತ್ತು ಕುಳಿತುಕೊಳ್ಳುವ ಪರಿಸ್ಥಿತಿ ಕಾಣುತ್ತಿದೆ. ಕರ್ಫ್ಯೂ, ಲಾಕ್ಡೌನ್ ಹಿನ್ನೆಲೆಯಲ್ಲಿ ನಿಗದಿತ ವೇಳೆಯಲ್ಲಿ ಉತ್ತಮ ವ್ಯಾಪಾರ ನಡೆಯುತ್ತಿಲ್ಲ. ಜತೆಗೆ ಕೋವಿಡ್ ಭೀತಿಯಿಂದ ಬಿಸಿ ನೀರಿನ ಮೊರೆ ಹೋದ ಜನರು ಮಡಿಕೆ ಖರೀದಿಗೆ ಮನಸ್ಸು ಮಾಡುತ್ತಿಲ್ಲ.
ಜನತಾ ಕರ್ಫ್ಯೂ, ಲಾಕ್ಡೌನ್ ಎಫೆಕ್ಟ್:
'ಕೊರೊನಾದಿಂದಾಗಿ ಕಳೆದ ವರ್ಷ ಮಾರ್ಚ್ ತಿಂಗಳಲ್ಲಿ ಲಾಕ್ಡೌನ್ ಆಗಿ ವ್ಯಾಪಾರವಿಲ್ಲದೆ ಸಂಕಷ್ಟಕ್ಕೆ ಸಿಲುಕಿದ್ದರು. ಈ ವರ್ಷವಾದರೂ ಬೇಸಿಗೆಯಲ್ಲಿ ವ್ಯಾಪಾರ ಮಾಡಿ ಒಂದಿಷ್ಟು ದುಡ್ಡು ನೋಡುವ ಕನಸು ಕಾಣುತ್ತಿರುವಾಗಲೇ ಕೋವಿಡ್ ಎರಡನೇ ಅಲೆ ಅಪ್ಪಳಿಸಿತು. ಕಳೆದ ಮೂರು ತಿಂಗಳಿಂದ ವ್ಯಾಪಾರ ವಹಿವಾಟು ಕಮ್ಮಿ ಆಗಿದೆ' ಅನ್ನೋದು ಕುಂಬಾರರ ಬವಣೆ.
ಲಾಕ್ಡೌನ್ನಿಂದಾಗಿ ಚಿಕ್ಕಬಳ್ಳಾಪುರ, ಕೋಲಾರ, ಶಿಡ್ಲಘಟ್ಟ, ಹೆಸರಘಟ್ಟ, ಆನೇಕಲ್, ಜಿಗಣಿ, ದೇವನಹಳ್ಳಿ, ಬೇಗೂರು, ಹೊಸಕೋಟೆ ಕಡೆಯಿಂದ ತಂದಿರುವ ಮಡಿಕೆ, ಇನ್ನಿತರೆ ವಸ್ತುಗಳು ಮನೆಗಳಲ್ಲಿ ಹಾಗೆಯೇ ಉಳಿದಿವೆ ಎಂದು ಮಡಿಕೆ ವ್ಯಾಪಾರಸ್ಥರು ನೋವು ತೋಡಿಕೊಳ್ಳುತ್ತಿದ್ದಾರೆ.
ಇದನ್ನೂ ಓದಿ: ಬಿಸಿ ನೀರಿನ ಮೊರೆ ಹೋದ ಜನರು: ಮಡಿಕೆ ವ್ಯಾಪಾರ ಕುಂಠಿತ!
ಇನೇನು ಗಣೇಶ ಚತುರ್ಥಿ ಹಬ್ಬ ಬರುತ್ತಿದೆ. ಇಲ್ಲಿನ ನೂರಕ್ಕೂ ಹೆಚ್ಚು ಕುಂಬಾರ ಸಮಾಜದವರು, ಕುಲ ಕಸುಬು ನಂಬಿರುವವರು ಗಣೇಶ ಮೂರ್ತಿ ತಯಾರಿಸಲು ಹಿಂದೇಟು ಹಾಕುತ್ತಿದ್ದಾರೆ. ಕಳೆದ ವರ್ಷ ಚತುರ್ಥಿಗೆ ಕೊರೊನಾದಿಂದಾಗಿ ಹಬ್ಬವನ್ನು ವಿಜೃಂಭಣೆಯಿಂದ ಮಾಡದೆ ಮೂರ್ತಿಗಳು ವ್ಯಾಪಾರವಾಗದೆ ಹಾಗೆಯೇ ಉಳಿದುಕೊಡಿವೆ. ಈ ವರ್ಷವಾದರೂ ಗಣೇಶ ಹಬ್ಬದ ಸಂದರ್ಭದಲ್ಲಿ ಉತ್ತಮ ವ್ಯಾಪಾರ ವಹಿವಾಟು ನಡೆಯಬಹುದು ಎಂಬ ನಿರೀಕ್ಷೆಯಲ್ಲಿದ್ದವರಿಗೆ ಕೋವಿಡ್ ನಿರಾಶೆ ಮೂಡಿಸಿದೆ. ಕೋವಿಡ್ ನಿಯಂತ್ರಣಕ್ಕೆ ಬರೋವರೆಗೂ ಗಣೇಶ ಮೂರ್ತಿ ತಯಾರಿಸಲು ಧೈರ್ಯ ತೋರಿಸದಂತಹ ಪರಿಸ್ಥಿತಿ ಈಗಿನದ್ದು.
'ಸರ್ಕಾರ ನಮ್ಮ ನೆರವಿಗೆ ಬರಲಿ'
'ವರ್ಷವಿಡೀ ತಯಾರಿಸಲಾಗುವ ಗಡಿಗೆ, ಮಡಿಕೆ, ಮಣ್ಣಿನ ಪಾತ್ರೆ, ಹಣತೆಗಳನ್ನು ಪ್ರತಿ ವರ್ಷ ಬೇಸಿಗೆಯಲ್ಲಿ ಮಾರಾಟ ಮಾಡುತ್ತಿದ್ದೆವು. ಆದ್ರೀಗ ಕೊರೊನಾದಿಂದಾಗಿ ಎಲ್ಲವೂ ಲಾಕ್ ಆಗಿವೆ. ಹೀಗಾಗಿ ನಮ್ಮಲ್ಲಿ ತಯಾರಾದ ಸಾಂಪ್ರದಾಯಿಕ ಗಡಿಗೆಗಳನ್ನು ಕೇಳುವವರೇ ಇಲ್ಲ. ಕೊರೊನಾ ಬಂದು ನಮ್ಮ ಇಡೀ ಕಸುಬನ್ನೇ ಹಿಸುಕಿ ಹಾಕಿದೆ' ಅನ್ನೋದು ಕುಂಬಾರರ ನೋವು.
'ಕಳೆದೊಂದು ವರ್ಷದಿಂದ ಕೋವಿಡ್ ರೋಗದಿಂದಾಗಿ ಸಂಕಷ್ಟಕ್ಕೆ ಸಿಲುಕಿದ್ದೇವೆ. ನಮ್ಮ ಗಡಿಗೆ ಸೇರಿ ಯಾವೊಂದು ವಸ್ತುವಿಗೂ ಬೇಡಿಕೆ ಇಲ್ಲ. ಈಗಾಗಲೇ ತಯಾರಿಸಲಾಗಿರುವ ಗಡಿಗೆಗಳು ಮನೆಯಂಗಳದಲ್ಲೇ ಇವೆ. ಭವಿಷ್ಯದ ಬಗ್ಗೆ ಚಿಂತಿಸಿದರೆ ಭಯವಾಗುತ್ತಿದೆ. ಇಂತಹ ಕಷ್ಟದ ಸಮಯದಲ್ಲಿ ನಮ್ಮ ನೆರವಿಗೆ ಸರ್ಕಾರ ಬರಲಿ' ಎಂದು ಮನವಿ ಮಾಡಿದರು.
