ಬೆಂಗಳೂರು : ಲಾಕ್‌ಡೌನ್ ಆದೇಶದಿಂದಾಗಿ ಲಕ್ಷಾಂತರ ಅಸಂಘಟಿತ ಕಾರ್ಮಿಕರು ಒಂದೊತ್ತಿನ ಊಟಕ್ಕಾಗಿ ಪರದಾಟ ನಡೆಸುತ್ತಿದ್ದಾರೆ. ಕೆಲಸವಿಲ್ಲದೆ ಕೈಯಲ್ಲಿ ಹಣವೂ ಇಲ್ಲದೇ ಜೀವನ ನಡೆಸುವುದೇ ಕಷ್ಟಕರವಾಗಿದೆ. ಇಂತಹವರಿಗಾಗಿಯೇ ಸರ್ಕಾರ ಉಚಿತವಾಗಿ ಹಾಲು ನೀಡುತ್ತಿದೆ.
ಸಾರ್ವಜನಿಕರಿಗೆ ಉಚಿತವಾಗಿ ಹಾಲು ನೀಡುವ ಕಾರ್ಯಕ್ರಮಕ್ಕೆ ಮುಖ್ಯಮಂತ್ರಿ ಯಡಿಯೂರಪ್ಪ ಚಾಲನೆ ನೀಡಿದರು. ಇದರಂತೆ ಬಿಬಿಎಂಪಿ ವ್ಯಾಪ್ತಿಗೆ ಬರುವ ಕೆಆರ್‌ಪುರಂನ ಸೀಗೆಹಳ್ಳಿ ಸ್ಲಂಬೋರ್ಡ್ನಲ್ಲಿ ಬಸವನಪುರ ವಾರ್ಡ್ ಕಾರ್ಪೊರೇಟರ್ ಜಯಪ್ರಕಾಶ್ ನೇತೃತ್ವದಲ್ಲಿ ಉಚಿತವಾಗಿ ಮನೆ ಮನೆಗೂ ಒಂದು ಲೀಟರ್ ನಂದಿನಿ ಹಾಲು ವಿತರಿಸಲಾಯಿತು.
ಸ್ಲಂಬೋರ್ಡ್ನಲ್ಲಿ 160 ಮನೆಗಳಿದ್ದು, 650 ಜನರು ವಾಸ ಮಾಡುತ್ತಿದ್ದಾರೆ. ಕೊರೊನಾ ಎಫೆಕ್ಟ್ನಿಂದಾಗಿ ಅಕ್ಷರಶಃ ಇವರು ಬದುಕು ಮೂರಾಬಟ್ಟೆಯಾಗಿದೆ. ಇಲ್ಲಿನ ಬಹುತೇಕ ನಿವಾಸಿಗಳು ದಿನಗೂಲಿ ನೌಕರರಾಗಿದ್ದಾರೆ. ಅಗತ್ಯ ವಸ್ತುಗಳನ್ನು ಕೊಂಡುಕೊಳ್ಳಲು ಅಸಾಧ್ಯ ಎಂಬಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ.
ಈ ಪರಿಸ್ಥಿತಿಯಲ್ಲಿ ಮನೆ ಮನೆಗೂ ತಲಾ ಒಂದು ಲೀಟರ್ ಹಾಲು ನೀಡಿರುವುದು ಸಂತಸ ತಂದಿದೆ ಎಂದು ಸ್ಥಳೀಯರು ಅಭಿಪ್ರಾಯ ಹಂಚಿಕೊಂಡರು. ಬಸವನಪುರ ವಾರ್ಡ್ ಸ್ಲಂ ಪ್ರದೇಶಗಳಾದ ಪ್ರಿಯಾಂಕನಗರ, ಬಸವಪುರ, ಸ್ವಾತಂತ್ರ್ಯ ನಗರ ಸುತ್ತಮುತ್ತಲಿನ ಏರಿಯಾಗಳಿಗೆ ಹೋಗಿ ಹಾಲು ವಿತರಿಸಲಾಯಿತು.
