ಅಶೋಕ ನಗರ ಸಂಚಾರಿ ಠಾಣೆಯ 6 ಸಿಬ್ಬಂದಿಗೆ ಕೋವಿಡ್​ ಪಾಸಿಟಿವ್

ಬೆಂಗಳೂರು ಅಶೋಕ ನಗರದ ಸಂಚಾರಿ ಠಾಣೆಯ ಆರು ಸಿಬ್ಬಂದಿಗೆ ಕೊರೊನಾ ದೃಢಪಟ್ಟಿದೆ. ಈ ಹಿಂದೆ ಪಾಸಿಟಿವ್ ಬಂದಿದ್ದ ಪೇದೆಯ ಸಂಪರ್ಕದಿಂದ ಸೋಂಕು ತಗುಲಿದೆ.

ಬೆಂಗಳೂರು: ಕಳೆದ ಮೂರು ದಿನಗಳ ಹಿಂದೆ ಕೊರೊನಾ ದೃಢಪಟ್ಟಿದ್ದ ಅಶೋಕ ನಗರ ಸಂಚಾರಿ ಠಾಣಾ ಸಿಬ್ಬಂದಿಯೊಂದಿಗೆ‌ ಪ್ರಾಥಮಿಕ‌ ಸಂಪರ್ಕದಲ್ಲಿದ್ದ ಆರು ಜನ ಸಿಬ್ಬಂದಿಗೆ ಸೋಂಕು ತಗುಲಿದೆ.

ಇಬ್ಬರು ಮಹಿಳಾ ಕಾನ್​ಸ್ಟೆಬಲ್, ಓರ್ವ ಮಹಿಳಾ ಹೆಡ್ ಕಾನ್​ಸ್ಟೆಬಲ್, ಇಬ್ಬರು ಕಾನ್​ಸ್ಟೆಬಲ್, ಓರ್ವ ಎಎಸ್ಐ ಸೇರಿದಂತೆ ಆರು ಜನರಲ್ಲಿ ಸೋಂಕು ಕಾಣಿಸಿಕೊಂಡಿದೆ. ಸೋಂಕಿತರೊಂದಿಗೆ ಸಂಪರ್ಕದಲ್ಲಿದ್ದವರ ಮಾಹಿತಿಯನ್ನು ಆರೋಗ್ಯ ಇಲಾಖೆ ಪಟ್ಟಿ ಮಾಡುತ್ತಿದೆ.

ಕಂದಮ್ಮನಿಗೂ ಸೋಂಕು:

ಸಂಪಂಗಿರಾಮ ನಗರ ಠಾಣೆಯ ಪೊಲೀಸ್ ಕಾನ್​ಸ್ಟೆಬಲ್ ಜೊತೆ ಸಂಪರ್ಕದಲ್ಲಿದ್ದ ಕುಟುಂಬದವರಿಗೂ ಸೋಂಕು ಬಾಧಿಸಿದೆ. ಸೋಂಕಿತ ಕಾನ್​ಸ್ಟೆಬಲ್ ಪತ್ನಿ, ಒಂದು ವರ್ಷ ಮೂರು ತಿಂಗಳ ಮಗು ಹಾಗೂ ಪತ್ನಿಯ ಸಹೋದರಿಗೂ ಸೋಂಕು ಹರಡಿದೆ.

ಮೂರು ದಿನಗಳ ಹಿಂದೆ ಪೊಲೀಸ್​ ಕಾನ್​​ಸ್ಟೆಬಲ್​ ಸೋಂಕು ಹಿನ್ನೆಲೆಯಲ್ಲಿ ಆಸ್ಪತ್ರೆಗೆ ದಾಖಲಾಗಿದ್ದರು. ಬಳಿಕ ಸೋಂಕಿತನ ಸಂಪರ್ಕದಲ್ಲಿದ್ದ ಕುಟುಂಬಸ್ಥರನ್ನು ಕ್ವಾರಂಟೈನ್​ ‌ಮಾಡಲಾಗಿತ್ತು. ‌ಬಳಿಕ ನಡೆಸಿದ ಪರೀಕ್ಷಾ ವರದಿಯಲ್ಲಿ ಕುಟುಂಬದ ಮೂವರು ಸದಸ್ಯರಿಗೂ ಪಾಸಿಟಿವ್ ಬಂದಿದೆ.