ಬೆಂಗಳೂರು: ದಾಖಲಾತಿ ಕೊರತೆ, ಸೂಕ್ತ ಪುರಾವೆ ಇಲ್ಲದಿರುವುದು ಸೇರಿದಂತೆ ವಿವಿಧ ಕಾರಣಗಳಿಂದ ಧೂಳು ಹಿಡಿದಿರುವ ನೂರಾರು ಪ್ರಕರಣಗಳನ್ನು ತಾರ್ಕಿಕ ಅಂತ್ಯಕ್ಕೆ ಕೊಂಡೊಯ್ಯಲು ನಿರ್ಧರಿಸಿದೆ. ಅಪರಾಧ ತನಿಖಾ ವಿಭಾಗ (ಸಿಐಡಿ) ಕಳೆದ ಒಂದು ದಶಕದಿಂದ ಬಾಕಿ ಉಳಿದಿರುವ ಪ್ರಕರಣಗಳ ತನಿಖೆ ಪೂರ್ಣಗೊಳಿಸಿ ಚಾರ್ಜ್ ಶೀಟ್ ಸಲ್ಲಿಸಲು ಡಿಜಿಪಿ ಡಾ.ಎಂ.ಎಂ.ಸಲೀಂ ಅಧಿಕಾರಿಗಳಿಗೆ ಟಾಸ್ಕ್ ನೀಡಿದ್ದಾರೆ.
ಎರಡು ತಿಂಗಳ ಗಡುವು: 2009ರಿಂದ 2019ರವರೆಗೆ ಸಿಐಡಿಗೆ ಶಿಫಾರಸು ಆಗಿ ಹಾಗೂ ವಿವಿಧ ಕಾರಣಗಳಿಂದ ತನಿಖೆಗೆ ಗ್ರಹಣ ಹಿಡಿದಿದ್ದ ಪ್ರಕರಣಗಳ ತನಿಖೆ ಮುಕ್ತಾಯಗೊಳಿಸಬೇಕು. ಪ್ರಗತಿ ಹಂತದಲ್ಲಿರುವ ಪ್ರಕರಣಗಳ ಬಗ್ಗೆ ವಾರಕ್ಕೊಮ್ಮೆ ಅಧಿಕಾರಿಗಳೊಂದಿಗೆ ಸಭೆ ನಡೆಸಿ ಈಗಾಗಲೇ ಡಿಜಿಪಿ ಪರಿಶೀಲಿಸಲಿದ್ದಾರೆ. ಹಲವು ಪ್ರಕರಣಗಳಲ್ಲಿ ನ್ಯಾಯಾಲಯದಿಂದ ತಡೆಯಾಜ್ಞೆ ಇದೆ. ಪ್ರಕರಣಗಳ ತೆರವು ಬಗ್ಗೆ ನಿರಂತರವಾಗಿ ಫಾಲೋಅಪ್ ಮಾಡಬೇಕು ಎಂಬುದರ ಬಗ್ಗೆ ಅಧಿಕಾರಿಗಳಿಗೆ ಸೂಚನೆ ನೀಡಲಾಗಿದ್ದು, ಬಾಕಿಯಿರುವ 845 ಕೇಸ್ಗಳಿಗೆ ತಾರ್ಕಿಕ್ಯ ಅಂತ್ಯ ನೀಡಲು ಒಂದೆರಡು ತಿಂಗಳ ಗಡುವು ವಿಧಿಸಿದ್ದಾರೆ.
ವಿಚಾರಣೆಯಲ್ಲಿರುವ 973 ಪ್ರಕರಣಗಳು : ಆರ್ಥಿಕ ಅಪರಾಧಗಳು, ಪೊಲೀಸ್ ಕಸ್ಟೋಡಿಯಲ್ ಡೆತ್, ಕಾನ್ಸ್ಟೇಬಲ್ ಪರೀಕ್ಷಾ ಅಕ್ರಮ, ಶಿಕ್ಷಕರ ನೇಮಕಾತಿ, ಕೆಪಿಎಸ್ಸಿ ಅಭ್ಯರ್ಥಿಗಳ ನೇಮಕಾತಿಯಲ್ಲಿ ನಡೆದ ಹಗರಣಗಳು ಸೇರಿದಂತೆ ಸಾವಿರಾರು ಪ್ರಕರಣಗಳನ್ನ ಸಿಐಡಿ ತನಿಖೆ ನಡೆಸುತ್ತಿದೆ. ಈ ಪೈಕಿ ವಿವಿಧ ಕಾರಣಗಳಿಂದಾಗಿ 845 ಪ್ರಕರಣಗಳ ತನಿಖೆ ಮಂದಗತಿಯಲ್ಲಿದೆ. ಇನ್ನೂ 973 ಪ್ರಕರಣಗಳು ನ್ಯಾಯಾಲಯದಲ್ಲಿ ವಿಚಾರಣೆ ಹಂತದಲ್ಲಿದೆ.
ವಂಚನೆ ಪ್ರಮಾಣ ಅಳೆಯಲು ಆಡಿಟ್ ವರದಿ ಬರಲು ತಡವಾಗುತ್ತಿರುವುದು, ಸಮಗ್ರ ಸಾಕ್ಷ್ಯಾಧಾರ ಕೊರತೆಯಿಂದ ಹಿನ್ನೆಡೆಯಾಗಿತ್ತು. ಮತ್ತು ಕೆಲವು ಪ್ರಕರಣಗಳಲ್ಲಿ ಕೋರ್ಟ್ನಿಂದ ತಡೆಯಾಜ್ಞೆ ಆಗಿದೆ. ಪೊಲೀಸರ ಮೇಲೆ ನಂಬಿಕೆ ಬಲಗೊಳಿಸಲು ಹಾಗೂ ಅನ್ಯಾಯಕ್ಕೊಳಗಾದವವರಿಗೆ ತ್ವರಿತಗತಿ ನ್ಯಾಯ ಕೊಡಿಸಲು ಪೂರ್ಣಗೊಳ್ಳದೇ ಬಾಕಿಯಿರುವ ಪ್ರಕರಣಗಳ ತನಿಖೆ ಮುಕ್ತಾಯಗೊಳಿಸಿ ಚಾರ್ಜ್ ಶೀಟ್ ಸಲ್ಲಿಸಬೇಕು ಎಂದು ಅಧಿಕಾರಿಗಳಿಗೆ ತಾಕೀತು ಮಾಡಲಾಗಿದೆ.
ಸಿಐಡಿಯಲ್ಲಿ ಹಣಕಾಸು, ಆರ್ಥಿಕ ಅಪರಾಧ, ಸೈಬರ್ ಅಪರಾಧ, ಖೋಟಾನೋಟು, ಮಾದಕವಸ್ತು ತಡೆ ವಿಭಾಗ ಹಾಗೂ ಅರಣ್ಯ ಘಟಕಗಳ ವಿಭಾಗಗಳಿವೆ. ವಂಚನೆ ಮತ್ತು ಹಣ ದುರ್ಬಳಕೆ, ಸಹಕಾರಿ ಸಂಘ ಸಂಸ್ಥೆಗಳನ್ನು ಒಳಗೊಂಡಂತಹ ವಂಚನೆಗಳು, ಮೋಸ ಮತ್ತು ನಕಲಿ ದಾಖಲೆ ಹಾಗೂ ನಂಬಿಕೆ ದ್ರೋಹದ ಪ್ರಕರಣಗಳೇ ಹೆಚ್ಚು ಶಿಫಾರಸು ಆಗುತ್ತದೆ. ಆ್ಯಂಬಿಡೆಂಟ್, ಕಣ್ವ, ಅಗ್ರಿಗೋಲ್ಡ್, ಗುರುರಾಘವೇಂದ್ರ ಹಾಗೂ ವಸಿಷ್ಠ ಕೋ-ಆಪರೇಟಿವ್ ವಂಚನೆ ಸೇರಿ ಸುಮಾರು 80 ಕಂಪನಿಗಳಿಂದ ಸಾವಿರಾರು ಕೋಟಿ ವಂಚನೆ ಆರೋಪ ಪ್ರಕರಣಗಳ ಪೈಕಿ ಶೇ.80ರಷ್ಟು ಕೇಸ್ಗಳು ತನಿಖಾ ಹಂತದಲ್ಲಿವೆ. ಜೊತೆಗೆ 84 ಕಸ್ಟೋಡಿಯನ್ ಡೆತ್ ಪ್ರಕರಣಗಳು, ಪೊಲೀಸ್, ಶಿಕ್ಷಕರು ಸೇರಿದಂತೆ ವಿವಿಧ ಸರ್ಕಾರಿ ಹುದ್ದೆಗಳ ಪರೀಕ್ಷೆಗಳಲ್ಲಿ ನಡೆದ ಅಕ್ರಮಕ್ಕೆ ಸಂಬಂಧಿಸಿದಂತೆ ಪ್ರಕರಣಗಳ ತನಿಖೆಗೆ ವೇಗ ನೀಡಬೇಕಿದೆ.
