ಬೆಂಗಳೂರು: ಹಲ್ಲುಗಳಿಂದ ವಾಸನೆ ಬರುತ್ತಿದೆ ಎಂಬ ಕಾರಣವೊಡ್ಡಿ ಮಕ್ಕಳಿಬ್ಬರು ಸೇರಿಕೊಂಡು ಹೆತ್ತ ತಾಯಿಯನ್ನೇ ಮನೆಯಿಂದ ಹೊರ ಹಾಕಿದ ವಿಚಿತ್ರ ಪ್ರಕರಣವೊಂದು ಸಿಲಿಕಾನ್ ಸಿಟಿಯಲ್ಲಿ ನಡೆದಿದೆ. ಶೀಲಾ (50) ಮಕ್ಕಳ ಪ್ರೀತಿ ಸಿಗದೇ ಬೀದಿಗೆ ಬಂದ ಮಹಿಳೆ. ಉನ್ನತ ಹುದ್ದೆಯಲ್ಲಿರುವ ಮಕ್ಕಳಿಬ್ಬರು ಹಲ್ಲುಗಳಿಂದ ವಾಸನೆ ಬರುತ್ತಿದೆ ಎಂದು ಹೆತ್ತ ತಾಯಿಯನ್ನೇ ಮನೆಯಿಂದ ಹೊರಹಾಕುವ ಮೂಲಕ ಕ್ರೌರ್ಯ ಮೆರೆದಿದ್ದಾರೆ ಎನ್ನಲಾಗುತ್ತಿದೆ.
ಹಲ್ಲು ನೋವಿನಿಂದ ಬಳಲುತ್ತಿದ್ದ ಶೀಲಾ, ಇತ್ತೀಚೆಗೆ ಆಸ್ಪತ್ರೆಗೆ ತೆರಳಿ ಚಿಕಿತ್ಸೆ ಪಡೆದಿದ್ದರು. ಆದ್ರೆ, ವೈದ್ಯರ ನಿರ್ಲಕ್ಷ್ಯದಿಂದ ಹಲ್ಲಿನ ಎಲುಬುನ್ನು ತುಂಡು ಮಾಡಲಾಗಿತ್ತಂತೆ. ಇದರಿಂದ ಹಲ್ಲುಗಳ ವಾಸನೆ ಹೆಚ್ಚಾಗಿ ಬರಲಾಂಭಿಸಿತ್ತು. ಈ ವಾಸನೆಯನ್ನು ತಡೆದುಕೊಳ್ಳಲಾಗದ ಮಕ್ಕಳು, ಶೀಲಾ ಅವರನ್ನು ಮನೆಯಿಂದ ಹೊರಹಾಕಿದ್ದಾರೆ ಎಂದು ತಿಳಿದು ಬಂದಿದೆ. ಇನ್ನು ಮನೆಯಿಂದ ಹೊರಬಂದ ಶೀಲಾ, ದೇವಸ್ಥಾನವೊಂದರಲ್ಲಿ ಕೆಲಸ ಮಾಡುತ್ತಾ ಕೇವಲ 50 ರೂ.ನಲ್ಲಿ ತನ್ನ ಜೀವನ ನಡೆಸುತ್ತಿದ್ದು ಮಕ್ಕಳು ಮಾತ್ರ ಈ ಹೆತ್ತ ತಾಯಿಯ ಸಂಕಟ ನೋಡಿಯೂ ನೋಡದಂತೆ ತಿರುಗಾಡಿಕೊಂಡಿದ್ದಾರೆ ಎನ್ನಲಾಗುತ್ತಿದೆ.
ಇತ್ತ ಇತ್ತೀಚೆಗೆ ನೋವು ತಾಳಲಾರದೇ ಅತ್ತ ಜೀವನ ನಿರ್ವಹಿಸಲಾಗದೇ ಶೀಲಾ, ವನಿತಾ ಸಹಾಯವಾಣಿ ಮೆಟ್ಟಿಲೇರಿದ್ದರು. ಪರಿಸ್ಥಿತಿ ಅರಿತುಕೊಂಡ ವನಿತಾ ಸಹಾಯವಾಣಿ ಸಿಬ್ಬಂದಿ ಇಬ್ಬರು ಮಕ್ಕಳನ್ನು ಕರೆದು ಬುದ್ಧಿ ಹೇಳಿದ್ದರು. ಅದಾಗ್ಯೂ ಯಾವುದೇ ಪ್ರಯೋಜನವಾಗದ್ದರಿಂದ ಶೀಲಾಳನ್ನು ವನಿತಾ ಸಹಾಯವಾಣಿ ಸಿಬ್ಬಂದಿ ವಾಣಿ ವಿಲಾಸ ಆಸ್ಪತ್ರೆ ಗೆ ಸೇರಿಸಿದ್ದರು. ಆಸ್ಪತ್ರೆ ಸಿಬ್ಬಂದಿ ಕೂಡ ಶೀಲಾ ಆರೈಕೆಗೆ ಯಾರು ಮುಂದೆ ಬರದ ಹಿನ್ನೆಲೆ ಇದೀಗ ಮತ್ತೆ ವೃದ್ಧಾಶ್ರಮಕ್ಕೆ ಕಳಿಸಿಕೊಟ್ಟಿದ್ದಾರೆ.
ಪರಿಸ್ಥಿತಿ ಮನಗಂಡ ವನಿತಾ ಸಹಾಯವಾಣಿಯ ಕೌನ್ಸಿಲರ್ ಡಾ. ಬಿಂದ್ಯ ಅವರೇ ಈ ಸಮಸ್ಯೆಗೆ ಪರಿಹಾರ ನೀಡಲು ಮುಂದಾಗಿದ್ದು ಯಾವ ನಿರ್ಧಾರ ಕೈಗೊಳ್ಳಲಿದ್ದಾರೆ ಅನ್ನೋದನ್ನು ಕಾದುನೋಡಬೇಕು.
