ಬೆಂಗಳೂರು: ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ ವಿವಿಧ ವೃತ್ತಿಪರ ಕೋರ್ಸ್‌ಗಳಿಗೆ ನಡೆಸಿದ ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಟಿ) ಫಲಿತಾಂಶ ಇಂದು ಪ್ರಕಟವಾಗಿದೆ. 2020-21ನೇ ಸಾಲಿನ ಸಿಇಟಿ ಫಲಿತಾಂಶವನ್ನು ಉನ್ನತ ಶಿಕ್ಷಣ ಸಚಿವರೂ ಆಗಿರುವ ಡಿಸಿಎಂ ಡಾ. ಅಶ್ವತ್ಥ್ ನಾರಾಯಣ ಪ್ರಕಟಿಸಿದರು.
ಈ ಬಾರಿ 127 ಸ್ಥಳಗಳ 497 ಕೇಂದ್ರಗಳಲ್ಲಿ ಪರೀಕ್ಷೆ ನಡೆದಿದೆ. ಕೇವಲ 21 ದಿನದಲ್ಲೇ ಫಲಿತಾಂಶ ಪ್ರಕಟಿಸಿದ್ದೇವೆ. ಸೋಂಕಿತರು, ಕಂಟೇನ್ಮೆಂಟ್ ವಲಯದ ವಿದ್ಯಾರ್ಥಿಗಳು ಕೂಡ ಪರೀಕ್ಷೆ ಬರೆದಿದ್ದರು. 63 ಕೋವಿಡ್ ಪಾಸಿಟಿವ್ ಇದ್ದ ವಿದ್ಯಾರ್ಥಿಗಳು ಪರೀಕ್ಷೆ ಬರೆದಿದ್ದರು. ಕೋವಿಡ್ ಕಾರಣದಿಂದ ಸಾಕಷ್ಟು ಬಾರಿ ಪರೀಕ್ಷೆ ಮುಂದೂಡಲಾಗಿತ್ತು. ಕೊನೆಗೆ ಎಲ್ಲಾ ಮುನ್ನೆಚ್ಚರಿಕೆ ಕ್ರಮ ಕೈಗೊಂಡು ಜುಲೈ 30 ರಿಂದ ಆಗಸ್ಟ್‌ 1 ರವರೆಗೆ ನಡೆಸಿದ್ದೇವೆ. ಈ ಬಾರಿ ಒಟ್ಟು 1,94,419 ಮಂದಿ ಸಿಇಟಿಗೆ ನೋಂದಣಿ ಮಾಡಿಕೊಂಡಿದ್ದರು. ಈ ಪೈಕಿ 1,75,349 ಮಂದಿ ಪರೀಕ್ಷೆ ಬರೆದಿದ್ದಾರೆ. 1,53,470 ವಿದ್ಯಾರ್ಥಿಗಳು ಉತ್ತೀರ್ಣರಾಗಿದ್ದಾರೆ ಎಂದು ಸಚಿವರು ಮಾಹಿತಿ ನೀಡಿದರು.
ಈ ಬಾರಿ ಎಂಜಿನಿಯರಿಂಗ್ ವಿಭಾಗದಲ್ಲಿ ಬೆಂಗಳೂರು ಆರ್ ವಿ ಪಿಯು ಕಾಲೇಜಿನ ರಕ್ಷಿತ್ ಎಂ ಮೊದಲ ಸ್ಥಾನ ಗಿಟ್ಟಿಸಿಕೊಂಡಿದ್ದಾರೆ. ಮೊದಲ ಹತ್ತು ಸ್ಥಾನಗಳಲ್ಲಿ 5 ಸ್ಥಾನ ಬೆಂಗಳೂರಿಗೆ, 2 ಸ್ಥಾನ ದಕ್ಷಿಣ ಕನ್ನಡಕ್ಕೆ, 2 ಸ್ಥಾನ ಹುಬ್ಬಳ್ಳಿಗೆ ಮತ್ತು 1 ಸ್ಥಾನ ಹೊರ ರಾಜ್ಯದ ವಿದ್ಯಾರ್ಥಿಗೆ ಲಭಿಸಿದೆ. ಬಿಎಸ್ಸಿ ಕೃಷಿ ವಿಭಾಗದಲ್ಲಿ ಮಂಗಳೂರಿನ ವರುಣ್ ಗೌಡ ಮೊದಲ ಸ್ಥಾನ ಪಡೆದುಕೊಂಡಿದ್ದಾರೆ. ಬೆಂಗಳೂರಿಗೆ 3, ಮಂಗಳೂರಿಗೆ 2, ಮೈಸೂರಿಗೆ 2 , ಹಾಸನ, ದಾವಣಗೆರೆ, ಮೂಡಿಗೆರೆಗೆ ತಲಾ 1 ಸ್ಥಾನ ಬಂದಿದೆ.
ಪಶು ವೈದ್ಯಕೀಯ ವಿಭಾಗದಲ್ಲಿ ಬೆಂಗಳೂರಿನ ಸಾಯಿ ವಿವೇಕ್ ಮೊದಲ ಸ್ಥಾನ ಗಿಟ್ಟಿಸಿಕೊಂಡಿದ್ದು, ಬೆಂಗಳೂರಿಗೆ 3 ಸ್ಥಾನ, ಬೀದರ್ಗೆ 2, ಮೈಸೂರು, ದಕ್ಷಿಣ ಕನ್ನಡ, ಮೂಡಿಗೆರೆಗೆ ತಲಾ 1 ಸ್ಥಾನ ಬಂದಿದೆ. ಬಿ ಫಾರ್ಮಾ ಮತ್ತು ಫಾರ್ಮಾ ಡಿ ವಿಭಾಗದಲ್ಲಿ ಸಾಯಿ ವಿವೇಕ್ ಮೊದಲ ಸ್ಥಾನ ಪಡೆದಿದ್ದು, ಮೊದಲ ಹತ್ತು ಸ್ಥಾನದಲ್ಲಿ ಬೆಂಗಳೂರಿಗೆ 2, ಮತ್ತು ದಕ್ಷಿಣ ಕನ್ನಡಕ್ಕೆ 3, ಮೈಸೂರು, ಬೀದರ್, ಹುಬ್ಬಳ್ಳಿಗೆ ತಲಾ ಒಂದೊಂದು ಸ್ಥಾನ ದೊರೆತಿದೆ.
ಱಂಕಿಂಗ್ :
ಎಂಜಿನಿಯರಿಂಗ್- 15,34,70 ವಿದ್ಯಾರ್ಥಿಗಳು
ಕೃಷಿ -1,27,627
ಪಶು ಸಂಗೋಪನೆ - 1,29,666
ಯೋಗ ಮತ್ತು ನ್ಯಾಚುರೋಪತಿ - 1,29,611
ಬಿ ಫಾರ್ಮಾ- 15,552
ಸಿಇಟಿ- 60 ಕ್ಕೆ 60 ಅಂಕ ಪಡೆದವರ ವಿವರ:
ಜೀವಶಾಸ್ತ್ರ- 80 ಅಭ್ಯರ್ಥಿಗಳು
ರಸಾಯನ ಶಾಸ್ತ್ರ- 3 ಅಭ್ಯರ್ಥಿಗಳು
ಭೌತಶಾಸ್ತ್ರ- 00
ಗಣಿತಶಾಸ್ತ್ರ- 00
