ಬೆಂಗಳೂರು: ಡ್ರಗ್ಸ್ ಜಾಲ ನಂಟು ಆರೋಪ ಪ್ರಕರಣದಲ್ಲಿ ನಮ್ಮ ಪಾತ್ರವೇನು ಇಲ್ಲವೆಂದೇ ಹೇಳುತ್ತಾ ಬಂದಿರುವ ನಟಿಯರಾದ ರಾಗಿಣಿ ಮತ್ತು ಸಂಜನಾಗೆ ಡೋಪಿಂಗ್ ಟೆಸ್ಟ್ ವರದಿಯು ಆತಂಕ ಸೃಷ್ಟಿಸಿದೆ.
ಡೋಪಿಂಗ್ ಟೆಸ್ಟ್ ವರದಿಯಲ್ಲಿ ಆರೋಪಿಗಳ ನಿಜ ಬಣ್ಣ ಬಯಲಾಗಲಿದೆ. ಹೀಗಾಗಿ ಡೋಪಿಂಗ್ ಟೆಸ್ಟ್ ವರದಿಯ ಮೇಲೆ ನಟಿ ಮಣಿಯರ ಭವಿಷ್ಯ ನಿಂತಿದೆ. ಈ ನಡುವೆ ಇಂದು ಭಾನುವಾರವಾದ್ದರಿಂದ ಸಾಂತ್ವನ ಕೇಂದ್ರದಲ್ಲಿರುವ ನಟಿಯರಿಗೆ ವೀಕೆಂಡ್ ಮಿಸ್ ಮಾಡಿಕೊಂಡ ಬೇಜಾರು ಕೂಡ ಇದೆ. ಯಾಕೆಂದರೆ, ವೀಕೆಂಡ್ ಬಂತೆಂದರೆ ನಟಿಯರು ತಮ್ಮ ಗ್ಯಾಂಗ್ನೊಂದಿಗೆ ಸೇರಿಕೊಂಡು ಪಾರ್ಟಿ ಆಯೋಜಿಸಿ, ಮೋಜು ಮಸ್ತಿಯಲ್ಲಿ ತೊಡಗುತ್ತಿದ್ದರು ಎನ್ನಲಾಗ್ತಿದೆ. ಈ ಪಾರ್ಟಿಗಳಲ್ಲಿ ಮಾದಕ ವಸ್ತುಗಳನ್ನು ಸೇವಿಸಿ ನಶೆಯಲ್ಲಿ ತೇಲಾಡ್ತಿದ್ದರು. ಆದರೆ, ಈಗ ಸಿಸಿಬಿ ವಶದಲ್ಲಿರುವುದರಿಂದ ಬಿಡುಗಡೆಯಾಗ್ತೀವೋ, ಇಲ್ಲ ಜೈಲು ಸೇರ್ತಿವೋ ಎಂಬ ಆತಂಕದಲ್ಲಿದ್ದಾರೆ.
ಸಿಸಿಬಿ ವಿಚಾರಣೆ ವೇಳೆ ಮಾದಕ ಲೋಕದ ನಂಟಿನ ಕುರಿತು ಆರೋಪಿಗಳು ಸರಿಯಾದ ಮಾಹಿತಿ ನೀಡಿರಲಿಲ್ಲ. ಹೀಗಾಗಿ ಅಧಿಕಾರಿಗಳು ಕೆ.ಸಿ. ಜನರಲ್ ಆಸ್ಪತ್ರೆಯಲ್ಲಿ ಡೋಪಿಂಗ್ ಟೆಸ್ಟ್, ಹೇರ್ ಪೊಲಿಕ್ ಟೆಸ್ಟ್, ಉಗುರು ಟೆಸ್ಟ್, ಮೂತ್ರದ ಪರೀಕ್ಷೆ ಮಾಡಿಸಿದ್ದರು. ಈ ಟೆಸ್ಟ್ಗಳಿಂದ ಆರೋಪಿಗಳು ಮಾದಕ ವಸ್ತು ಸೇವಿಸಿದ್ದರೆ ಗೊತ್ತಾಗುತ್ತದೆ.
ಸದ್ಯ ಸಿಸಿಬಿ ಅಧಿಕಾರಿಗಳು ಕೂಡ ಪರೀಕ್ಷಾ ವರದಿಗಾಗಿ ಕಾಯುತ್ತಿದ್ದಾರೆ. ಆರಂಭದಲ್ಲಿ ಕಿರಿಕ್ ಮಾಡುತ್ತಿದ್ದ ನಟಿಯರು, ಪರೀಕ್ಷೆ ಮಾಡಿಸಿದ ದಿನದಿಂದ ಮೌನಕ್ಕೆ ಜಾರಿದ್ದಾರೆ. ಎಲ್ಲಿ ಸಿಕ್ಕಿ ಬೀಳ್ತಿವೋ ಎಂಬ ಭಯ ಅವರನ್ನು ಶುರುವಾಗಿದೆ ಎನ್ನಲಾಗ್ತಿದೆ.
