ಬೆಂಗಳೂರು: ಎರಡನೇ ಬಾರಿ ಕೇಂದ್ರದ ಗದ್ದುಗೆ ಏರಿರುವ ಬಿಜೆಪಿ ನೇತೃತ್ವದ ಮೋದಿ ಸರ್ಕಾರ ಈ ವರ್ಷದ ಮೊದಲ ಬಜೆಟ್ಗೆ ಸಿದ್ಧತೆಗೆ ಸನ್ನದ್ಧವಾಗುತ್ತಿದೆ. ಸಾಮಾನ್ಯ ಬಜೆಟ್ ಬಗ್ಗೆ ಸಾರ್ವಜನಿಕರಲ್ಲಿ ಇನ್ನಿಲ್ಲದ ನಿರೀಕ್ಷೆ ಮೂಡಿದೆ. ಇದರಲ್ಲಿ ರೈಲ್ವೆ ಬಜೆಟ್ ಒಳಗೊಂಡಿದ್ದು ರೈಲ್ವೆ ಪ್ರಾಜೆಕ್ಟ್ಗಳ ಬಗ್ಗೆ ಹೆಚ್ಚಿನ ಕುತೂಹಲ ಮೂಡಿದೆ.
ರೈಲ್ವೆ ಇಲಾಖೆಯ ರಾಜ್ಯ ಸಚಿವರಾಗಿರುವ ಸುರೇಶ್ ಅಂಗಡಿ ಅವರ ಬಗ್ಗೆ ಸಾಕಷ್ಟು ನಿರೀಕ್ಷೆಗಳು ಹುಟ್ಟಿಕೊಂಡಿವೆ.
ರೈಲ್ವೆ ಕಾಮಗಾರಿಗಳು, ಹೊಸ ರೈಲು ಮಾರ್ಗಗಳ ಬಗ್ಗೆ ವಿಶೇಷ ಕಾಳಜಿ ವಹಿಸಬೇಕು ಎಂಬುದು ಕನ್ನಡಿಗರ ಅಹವಾಲಾಗಿದೆ. ಪೂರ್ವಭಾವಿಯಾಗಿ ಅಧಿಕಾರಿಗಳೊಂದಿಗೆ ಸಭೆ ನಡೆಸಿದ್ದು, ಸಚಿವರು ಗ್ರೌಂಡು ರಿಪೋರ್ಟ್ ಕೂಡಾ ಪಡೆದಿದ್ದಾರೆ ಎನ್ನಲಾಗುತ್ತದೆ.
ಲೋಕಲ್ ರೈಲ್ವೆ, ಸಬ್ ಅರ್ಬನ್ ರೈಲುಗಳ ಅವಶ್ಯಕತೆ ಹೆಚ್ಚಿದ್ದು, ಬೆಂಗಳೂರಿನ ಟ್ರಾಫಿಕ್ ಕಂಟ್ರೋಲ್ಗೆ ಸಬ್ ಅರ್ಬನ್ ರೈಲುಗಳ ಅವಶ್ಯಕತೆ ಇದೆ. ಶೇ. 25ರಷ್ಟು ಟ್ರಾಫಿಕ್ ಕಿರಿಕಿರಿ ತಪ್ಪಲಿದೆ ಎನ್ನಲಾಗುತ್ತಿದೆ.
ಪ್ರಯಾಣದ ಅವಧಿ, ದ್ವಿಚಕ್ರವಾಹನಗಳ ಪರದಾಟ ತಪ್ಪಿಸಬೇಕೆಂದು ಸಾರ್ವಜನಿಕರು ಮನವಿ ಮಾಡಿದ್ದಾರೆ. ಕಾಂಕ್ರೀಟ್ ರಹಿತ ಮೇಲ್ಸೇತುವೆಗಳ ಕೆಳಗೆ ಸಂಚರಿಸಲು ದ್ವಿಚಕ್ರ ವಾಹನ ಸವಾರರು ಹಿಂಜರಿಯುತ್ತಿದ್ದಾರೆ. ತ್ಯಾಜ್ಯ ಸೇರಿದಂತೆ ಕಲುಷಿತ ನೀರು ಚಲಿಸುವ ರೈಲಿನಿಂದ ಕೆಳಗೆ ಬೀಳುತ್ತಿದ್ದು, ಕೃತಕ ಟ್ರಾಫಿಕ್ ಜಾಮ್ ಕೂಡಾ ಉಂಟಾಗುತ್ತಿದೆ. ರೈಲು ನಿಲ್ದಾಣಗಳಲ್ಲಿ ಸ್ವಚ್ಛತೆ ಇನ್ನಷ್ಟು ವೃದ್ಧಿಯಾಗಬೇಕು. ಬೋಗಿಗಳಲ್ಲಿ ಡಿಜಿಟಲ್ ಡಿಸ್‌ಪ್ಲೇ ವ್ಯವಸ್ಥೆ ಬರಬೇಕು. ನೀರಿನ ಸೌಕರ್ಯ ಸೇರಿದಂತೆ ಸಾರ್ವಜನಿಕರಿಂದ ಅನೇಕ ಬೇಡಿಕೆಗಳ ಪಟ್ಟಿಯೇ ಸಿದ್ದವಾಗಿದೆ.
ಕೇಂದ್ರದ ಜತೆ ರಾಜ್ಯ ಸರ್ಕಾರವೂ ನೆನೆಗುದಿಗೆ ಬಿದ್ದ ಕಾಮಗಾರಿಗಳನ್ನು ಪೂರ್ಣಗೊಳಿಸಲು ಕೈಜೋಡಿಸಿದರೆ ಎಲ್ಲವೂ ಸಾಧ್ಯವಿದೆ ಎಂಬುದು ಮತದಾರರ ಆಶಯ.
