ಬೆಂಗಳೂರು : ಪೊಲೀಸರು ಎಂದರೆ ತಪ್ಪು ಮಾಡಿದ ಆರೋಪಿಗಳನ್ನ ಸೆರೆ ಹಿಡಿದು, ಅವರಿಗೆ ತಕ್ಕ ಶಿಕ್ಷೆ ಕೊಟ್ಟು ಸಾರ್ವಜನಿಕರ ಸಹಾಯಕ್ಕೆ ಸದಾ ನಿಲ್ಲುತ್ತಾರೆಂದು ಭಾವಿಸಲಾಗುತ್ತದೆ. ಖಾಕಿ ಪಡೆ ಅಂದರೆ ಕೆಲವರಿಗೆ ಧೈರ್ಯ ಇದ್ರೆ, ಇನ್ನೂ ಕೆಲವರಿಗೆ ಭಯ ಇರುತ್ತದೆ. ಆದ್ರೆ ಕೆಲವರಿಗೆ ಪೊಲೀಸರು ಅಂದ್ರೆ ಎಲ್ಲಿಲ್ಲದ ಕೋಪ. ರಸ್ತೆ ಬದಿಗಳಲ್ಲಿ ಚೆಕ್ಕಿಂಗ್‌ಗೆ ಅಂತ ನಿಂತು ಹಣ ವಸೂಲಿ ಮಾಡುತ್ತಾರೆಂಬ ಭಾವನೆ .ಆದರೆ ಬಹುತೇಕರಿಗೆ ಪೊಲೀಸರು ಅಂದರೆ ಇನ್ನಿಲ್ಲದ ಗೌರವ ಇದೆ.
ರಾಜ್ಯದ ಪೊಲೀಸರು ಕೂಡ ಇತ್ತೀಚಿನ ದಿನಗಳಲ್ಲಿ ತಮ್ಮನ್ನು ತಾವು ಅನೇಕ ಜಾಗೃತಿ ಮೂಡಿಸುವ ಕಾರ್ಯಗಳಲ್ಲಿ ತೊಡಗಿಸಿಕೊಳ್ಳುತ್ತಿದ್ದಾರೆ. ಸಾರ್ವಜನಿಕರಿಗೆ ವಿಭಿನ್ನ ರೀತಿಯಲ್ಲಿ ಜಾಗೃತಿ ಮೂಡಿಸಿ ಜನರ ಪ್ರಶಂಸೆಗೆ ಪಾತ್ರರಾಗುತ್ತಿದ್ದಾರೆ. ಮಲ್ಲೇಶ್ವರಂ ಸಂಚಾರ ವಿಭಾಗದ ಮಹಿಳಾ ಎಎಸ್ಐ ಶಾಂತ ಶೆಟ್ಟಿಯಿಂದ ವಿಭಿನ್ನ ರೀತಿಯ ಜನ ಜಾಗೃತಿ ಕಾರ್ಯಕ್ರಮ ನಡೆಸಿದರು. ತಮ್ಮ ಠಾಣಾ ವ್ಯಾಪ್ತಿಯಲ್ಲಿ ಬರುವ ಸ್ಥಳವನ್ನ ಅಭಿವೃದ್ಧಿ ಮಾಡಿದ್ದಾರೆ.
ಹೌದು, ಕಳೆದ ನಾಲ್ಕು ವರ್ಷದಿಂದ ಖಾಲಿ ಬಿದ್ದಿದ್ದ ಸ್ಥಳವನ್ನ ಈ ಮಹಿಳಾ ಪೊಲೀಸ್ ಬಸ್ ಸ್ಟ್ಯಾಂಡ್ ಆಗಿ ಪರಿವರ್ತಿಸಿದ್ದಾರೆ. ಹಣವನ್ನ ಖರ್ಚು ಮಾಡದೇ, ಉಪಯೋಗಿಸಿದ ಕಾಂಕ್ರಿಟ್ ಡಿವೈಡರ್‌ಗಳನ್ನ ಬಳಸಿ ಬಸ್ ಸ್ಟಾಂಡ್‌ಗೆ ಪ್ರತ್ಯೇಕ ಸ್ಥಳ ನಿಗದಿ ಮಾಡಿದ್ದಾರೆ. ಜೊತೆಗೆ ಆಟೋಗಳಿಗೆ ಪ್ರತ್ಯೇಕ ಸ್ಥಳ ಕೂಡ ನಿಗದಿ ಮಾಡಿಸಿದ್ದಾರೆ. ಇದೆಲ್ಲದರ ಜೊತೆಯಲ್ಲಿ ಸಾರ್ವಜನಿಕರಿಗೆ ಇಂದಿನ ಪರಿಸ್ಥಿತಿಯ ಬಗ್ಗೆ ಜನ ಜಾಗೃತಿ ಕಾರ್ಯಕ್ರಮವನ್ನ ಮಾಡಿದ್ದಾರೆ.
ಇದನ್ನೂ ಓದಿರಿ: ವಿಜಯಪುರ ಜಿಲ್ಲೆಯಲ್ಲಿ ಭೂಕಂಪನದ ಅನುಭವ... ಮನೆಯಿಂದ ಹೊರಗೆ ಬಂದ ಜನರು!
ಎಎಸ್ಐ ಶಾಂತ ಶೆಟ್ಟಿ ಮಲ್ಲೆಶ್ವರಂ ವಿಧ್ಯಾರ್ಥಿನಿಯರಿಗೆ ಕೊವಿಡ್ ನಿಯಮ ಹಾಗೂ ಟ್ರಾಫಿಕ್ ನಿಯಮದ ಪಾಲನೆಗಳ ಬಗ್ಗೆ ಜಾಗೃತಿ ಮೂಡಿಸಿದ್ದಾರೆ. ಇವರ ಕಾರ್ಯಕ್ಕೆ ಸ್ಥಳೀಯ ಸಾರ್ವಜನಿಕರು ಪ್ರಸಂಶಿಸಿದ್ದಾರೆ.
