ಬೆಂಗಳೂರು : ಡಿ.ಜೆಹಳ್ಳಿ ಮತ್ತು ಕೆ.ಜಿ ಹಳ್ಳಿ ಗಲಭೆ ಪ್ರಕರಣದ ಪ್ರಮುಖ ಆರೋಪಿ ಜೆಡಿಎಸ್ ಮುಖಂಡ ವಾಜಿದ್ ಪಾಷಾನನ್ನು ಸಿಸಿಬಿ ಪೊಲೀಸರು ತೀವ್ರ ವಿಚಾರಣೆ ನಡೆಸುತ್ತಿದ್ದಾರೆ.
ಎಸ್ಡಿಪಿಐ ಹಾಗೂ ಜೆಡಿಎಸ್ ಪಕ್ಷದೊಂದಿಗೆ ಗುರುತಿಸಿಕೊಂಡಿರುವ ವಾಜಿದ್ ಪಾಷಾ, ಗಲಭೆಗೆ ಕುಮ್ಮಕ್ಕು ನೀಡಿ, ತನಗೇನೂ ಗೊತ್ತಿಲ್ಲದಂತೆ ನಟಿಸುತ್ತಿದ್ದ. ಈ ವಿಚಾರ, ಆತನ ಹಿಂಬಾಲಕರೇ ಈಗ ಬಿಚ್ಚಿಟ್ಟಿದ್ದಾರೆ. ಈ ಆಧಾರದ ಮೇಲೆ ಪೊಲೀಸರು ವಾಜಿದ್ನನ್ನು ಬಂಧಿಸಿದ್ದಾರೆ.
ತನಿಖೆಯಲ್ಲಿ ಬಯಲಾಯ್ತು ಸತ್ಯ: ನವೀನ್ ಅವಹೇಳನಕಾರಿ ಪೋಸ್ಟ್ ಹಾಕಿದ ತಕ್ಷಣ ಆತನನ್ನು ಯಾಕೆ ಬಂಧಿಸಿಲ್ಲ, ನಮ್ಮವರನ್ನಾದರೆ ತಕ್ಷಣ ಬಂಧಿಸುತ್ತಿರಲಿಲ್ಲವೇ ಎಂದು ಪ್ರಶ್ನಿಸಿದ ವಾಜಿದ್, ಹುಡುಗರನ್ನು ಸೇರಿಸುವ ಹೊಣೆ ಹೊತ್ತಿದ್ದ ಎನ್ನಲಾಗಿದೆ. ಈ ವಿಚಾರವನ್ನು ಬಂಧಿತ ಆರೋಪಿಗಳು ಪೊಲೀಸರ ಮುಂದೆ ಬಾಯಿ ಬಿಟ್ಟಿದ್ದಾರೆ.
ವಾಜಿದ್ ಹೇಳಿಕೊಟ್ಟಂತೆ ನಾವು ಮಾಡಿದ್ದೇವೆ: ನಮ್ಮದು ಏನೂ ತಪ್ಪಿಲ್ಲ ಬಿಟ್ಟು ಬಿಡಿ, ವಾಜಿದ್ ಕಳುಹಿಸಿದ ಮೆಸೇಜ್ ತೋರಿಸುತ್ತೇವೆ. ವಾಟ್ಸ್ಆ್ಯಪ್ ಗ್ರೂಪ್ಗೆ ಸೇರಿಸುವ ಸೂಚನೆ ನೀಡಿದ್ದ. ಅದನ್ನು ಆತನೇ ನಿಯಂತ್ರಣ ಮಾಡುತ್ತಿದ್ದ ಎಂದು ಬಂಧಿತ ಆರೋಪಿಗಳು ಅಧಿಕಾರಿಗಳ ಮುಂದೆ ಹೇಳಿದ್ದಾರೆ.
ಘಟನೆ ನಡೆದಾಗಿನಿಂದಲೂ ಎಸ್ಕೇಪ್ ಆಗಿದ್ದ ವಾಜಿದ್ : ಗಲಭೆ ನಡೆದ ದಿನದಿಂದ ವಾಜಿದ್ ನಾಪತ್ತೆಯಾಗಿದ್ದ. ಪೊಲೀಸರು ಬಂಧಿಸಲು ಮನೆಗೆ ತೆರಳಿದಾಗ, ಆತನ ಎರಡೂ ಮನೆಗಳಿಗೆ ಬೀಗ ಹಾಕಿತ್ತು. ಆತ ಮನೆಯಲ್ಲಿ ಇಲ್ಲ ಎಂದು ಯಾಮಾರಿದ್ಧ ಪೊಲೀಸರು, ಅರ್ಧ ರಾತ್ರಿಯಲ್ಲಿ ವಾಪಸ್ ಬಂದಿದ್ದರು. ಆದರೆ, ಆಮೇಲೆ ಅನುಮಾನ ಬಂದು, ಬೇರೆ ನಂಬರ್ನಿಂದ ಕರೆ ಮಾಡಿದಾಗ, ಮನೆಯೊಳಗೆ ಮೊಬೈಲ್ ರಿಂಗ್ ಆಗಿದೆ. ತಕ್ಷಣ ಬಾಗಿಲು ಓಪನ್ ಮಾಡು, ಇಲ್ಲ ಅಂದರೆ ಮನೆ ಬಾಗಿಲು ಒಡೆಯುತ್ತೇವೆ ಎಂದು ಡಿಸಿಪಿ ರವಿಕುಮಾರ್ ಎಚ್ಚರಿಕೆ ನೀಡಿದ್ದರು. ಆ ಬಳಿಕ ವಾಜಿದ್ನನ್ನು ಬಂಧಿಸಲಾಗಿತ್ತು. ಸದ್ಯ, ತೀವ್ರ ವಿಚಾರಣೆಗೆ ಒಳಪಡಿಸಿರುವ ಪೊಲೀಸರು, ಆತನ ಹಿನ್ನೆಲೆ ಜಾಲಾಡುತ್ತಿದ್ದಾರೆ.
