ಚಿರತೆ ಭಯದ ಬೆನ್ನಲ್ಲೇ ಜಿಗಣಿ, ಕಲ್ಲುಬಾಳು ಗ್ರಾಮದಲ್ಲಿ ಕರಡಿ ಪ್ರತ್ಯಕ್ಷ.. ಜನರಿಗೆ ಹೆಚ್ಚಿದ ಆತಂಕ

ಆನೇಕಲ್​ನ ಬನ್ನೇರುಘಟ್ಟ ಸಮೀಪದ ಗ್ರಾಮಗಳಲ್ಲಿ ಕರಡಿ ಪ್ರತ್ಯಕ್ಷವಾಗಿದ್ದು, ಸಿಸಿಟಿವಿಯಲ್ಲಿ ಕರಡಿಯ ದೃಶ್ಯ ಸೆರೆಯಾಗಿದೆ.

ಆನೇಕಲ್ (ಬೆಂಗಳೂರು): ಚಿರತೆ ಹಾವಳಿಯಿಂದ ಭಯದಲ್ಲಿದ್ದ ಜನರಿಗೆ ಇದೀಗ ಕರಡಿ ಭಯ ಶುರುವಾಗಿದೆ. ಆನೇಕಲ್​ನ ಬನ್ನೇರುಘಟ್ಟ ಸಮೀಪದ ಜಿಗಣಿ, ಕಲ್ಲುಬಾಳು ಗ್ರಾಮದಲ್ಲಿ ಕರಡಿ ಪ್ರತ್ಯಕ್ಷವಾಗಿದೆ.

ಜಿಗಣಿಯ ನಂದನವನ ಲೇಔಟ್​​ನಲ್ಲಿ ಇದೇ ತಿಂಗಳು 12ರಂದು ಕರಡಿ ಪ್ರತ್ಯಕ್ಷವಾಗಿತ್ತು. ಇದೀಗ ಕಲ್ಲುಬಾಳು ಗ್ರಾಮದ ದೇವಾಲಯದ ಬಳಿ ನಿನ್ನೆ ಸಂಜೆ 7 ಗಂಟೆ ಸುಮಾರಿಗೆ ಕರಡಿ ಓಡಾಡಿದೆ. ಈ ಗ್ರಾಮಗಳಲ್ಲಿ ಕಳೆದ ಮೂರ್ನಾಲ್ಕು ದಿನಗಳಿಂದ ಕರಡಿ ಕಾಣಿಸಿಕೊಳ್ತಿದ್ದು, ಜನರಲ್ಲಿ ಆತಂಕ ಮನೆ ಮಾಡಿದೆ.

ಇನ್ನು, ಕರಡಿ ಓಡಾಟದ ದೃಶ್ಯವನ್ನು ಸಿಸಿಟಿವಿ ಹಾಗೂ ಮೊಬೈಲ್​ನಲ್ಲಿ ಸೆರೆಹಿಡಿಯಲಾಗಿದೆ. ಕಳೆದ ನಾಲ್ಕೈದು ದಿನಗಳ ಹಿಂದೆ ಭೂತಾನಹಳ್ಳಿಯಲ್ಲಿ ಚಿರತೆ ಕಾಣಿಸಿಕೊಂಡಿತ್ತು. ಇದೀಗ ಕರಡಿ ಪ್ರತ್ಯಕ್ಷವಾಗಿರುವುದರಿಂದ ಜನ ಭಯಭೀತರಾಗಿದ್ದಾರೆ. ಕರಡಿಯನ್ನು ಸೆರೆ ಹಿಡಿಯಲು ಸ್ಥಳದಲ್ಲಿ ಅರಣ್ಯ ಅಧಿಕಾರಿಗಳು ಬೀಡು ಬಿಟ್ಟಿದ್ದಾರೆ.

ಇದನ್ನೂ ಓದಿ: ರಾತ್ರಿ ಗ್ರಾಮಕ್ಕೆ ನುಗ್ಗಿದ ಜಾಂಬವ.. ಕರಡಿ ಕಂಡು ಬೆಚ್ಚಿಬಿದ್ದ ಜನ