ಬೆಂಗಳೂರು : ಹಾವೇರಿ ಟಿಕೆಟ್ ಕೈತಪ್ಪಿದ ಕಾರಣಕ್ಕೆ ಮುನಿಸಿಕೊಂಡಿರುವ ಶಾಸಕ ನೆಹರೂ ಓಲೇಕಾರ್ ಅವರ ಮನವೊಲಿಕೆ ಕಾರ್ಯಕ್ಕೆ ರಾಜ್ಯ ಬಿಜೆಪಿ ನಾಯಕರು ಮುಂದಾಗಿದ್ದಾರೆ. ಬಿಜೆಪಿ ಹಿರಿಯ ನಾಯಕ ಬಿ.ಎಸ್.ಯಡಿಯೂರಪ್ಪನವರು ಓಲೇಕಾರ್ ಅವರನ್ನು ನಿವಾಸಕ್ಕೆ ಕರೆಸಿಕೊಂಡು ಮಾತುಕತೆ ನಡೆಸಿದ್ದಾರೆ.
ಬಿಎಸ್ವೈ ಸೂಚನೆಯಂತೆ ಕುಮಾರ ಪಾರ್ಕ್ನಲ್ಲಿರುವ ಅಧಿಕೃತ ನಿವಾಸ ಕಾವೇರಿಗೆ ಶಾಸಕ ನೆಹರೂ ಓಲೇಕಾರ್ ಆಗಮಿಸಿದರು. ಯಡಿಯೂರಪ್ಪರನ್ನು ಭೇಟಿಯಾಗಿ ಮಾತುಕತೆ ನಡೆಸಿದರು. ಟಿಕೆಟ್ ಕೈತಪ್ಪಿದ್ದಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ ಓಲೇಕಾರ್, "ಆರೋಪ ಬಂದಿದೆ, ಕೋರ್ಟ್ನಲ್ಲಿ ಕೇಸ್ ಇದೆ. ನನ್ನ ವಿರುದ್ಧ ಶಿಕ್ಷೆ ಪ್ರಶ್ನಿಸಿ ನ್ಯಾಯಾಂಗದಲ್ಲಿ ಹೋರಾಟ ನಡೆಸುತ್ತಿದ್ದೇನೆ. ನಾನು ಈಗಾಗಲೇ ಕಷ್ಟದಲ್ಲಿದ್ದೇನೆ, ಅದರಲ್ಲಿಯೂ ಟಿಕೆಟ್ ನೀಡದೆ ಮತ್ತಷ್ಟು ಕಷ್ಟಕ್ಕೆ ನೂಕಿದರೆ ಹೇಗೆ? ಇಷ್ಟು ವರ್ಷ ಪಕ್ಷದಲ್ಲಿ ಕೆಲಸ ಮಾಡಿಕೊಂಡು ಬಂದಿದ್ದೇನೆ. ಈಗ ಏಕಾಏಕಿ ಟಿಕೆಟ್ ನೀಡದೆ ಕಡೆಗಣಿಸಿದರೆ ಹೇಗೆ?" ಎಂದು ನೇರವಾಗಿಯೇ ತಮ್ಮ ಬೇಸರ, ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ನೆಹರೂ ಓಲೇಕಾರ್ ಅಸಮಾಧಾನದ ನುಡಿಗಳನ್ನು ಆಲಿಸಿದ ಯಡಿಯೂರಪ್ಪ,"ಆತುರದ ನಿರ್ಧಾರ ಬೇಡ, ದುಡುಕಿನ ನಿರ್ಧಾರದಿಂದ ರಾಜಕೀಯ ಭವಿಷ್ಯಕ್ಕೆ ಹಿನ್ನಡೆಯಾಗಲಿದೆ, ಪಕ್ಷ ಬೇರೆ ಜವಾಬ್ದಾರಿ ನೀಡಲಿದೆ. ಬೇರೆ ರೀತಿಯ ಅವಕಾಶಗಳನ್ನೂ ನೀಡಲಿದೆ ಸ್ವಲ್ಪ ಸಮಯ ಕಾಯಬೇಕು" ಎಂದು ಸಲಹೆ ನೀಡಿದರು. "ಪಕ್ಷದ ಹೈಕಮಾಂಡ್ ಗಮನಕ್ಕೆ ಎಲ್ಲ ವಿಷಯವನ್ನೂ ತರಲಾಗುತ್ತದೆ. ಸದ್ಯ ಕ್ಷೇತ್ರದಲ್ಲಿ ಬಿಜೆಪಿ ಅಭ್ಯರ್ಥಿ ಗೆಲುವಿಗೆ ಸಹಕರಿಸಿ, ಪಕ್ಷದ ಪರ ಕೆಲಸ ಮಾಡಿ" ಎಂದು ಸಲಹೆ ನೀಡಿದರು.
ಬಿಎಸ್ವೈ ಭೇಟಿ ನಂತರ ನೇರವಾಗಿ ಮಲ್ಲೇಶ್ವರದಲ್ಲಿರುವ ರಾಜ್ಯ ಬಿಜೆಪಿ ಕಚೇರಿ ಜಗನ್ನಾಥ ಭವನಕ್ಕೆ ಶಾಸಕ ನೆಹರೂ ಓಲೇಕಾರ್ ತೆರಳಿದರು. ಪಕ್ಷದ ರಾಷ್ಟ್ರೀಯ ಸಂಘಟನಾ ಪ್ರಧಾನ ಕಾರ್ಯದರ್ಶಿ ಬಿ.ಎಲ್.ಸಂತೋಷ್ ಭೇಟಿಗೆ ಯತ್ನಿಸಿದರು. ಆದರೆ ಓಲೇಕಾರ್ ಬರುವ ಕೆಲವೇ ಸಮಯದ ಮೊದಲೇ ಸಂತೋಷ್ ಕಚೇರಿಯಿಂದ ನಿರ್ಗಮಿಸಿದ್ದರು. ಕಚೇರಿ ಪ್ರಮುಖರ ಮೂಲಕ ಸಂತೋಷ್ ಅವರನ್ನು ಸಂಪರ್ಕಿಸಿದ ಓಲೇಕಾರ್‌ಗೆ ಸಂಜೆ ಬಂದು ಭೇಟಿಯಾಗುವಂತೆ ಸೂಚಿಸಿದರು. ಅದರಂತೆ ಓಲೇಕಾರ್ ಕಚೇರಿಯಿಂದ ನಿರ್ಗಮಿಸಿದರು.
ಟಿಕೆಟ್ ಕೈತಪ್ಪಿದ ಹಿನ್ನೆಲೆಯಲ್ಲಿ ಅಸಮಾಧಾನಗೊಂಡಿದ್ದ ಶಾಸಕ ರಘುಪತಿ ಭಟ್, ಸುಕುಮಾರ ಶೆಟ್ಟಿ ಅವರ ಮನವೊಲಿಕೆ ಮಾಡುವಲ್ಲಿ ಪಕ್ಷದ ನಾಯಕರು ಸಫಲರಾಗಿದ್ದಾರೆ. ಯಡಿಯೂರಪ್ಪರ ಮೂಲಕ ಮನವೊಲಿಕೆ ಕಾರ್ಯ ನಡೆಸಲಾಗುತ್ತಿದೆ. ಈಗಾಗಲೇ ಶಿವಮೊಗ್ಗ ನಗರ ಟಿಕೆಟ್ ವಿಚಾರದಲ್ಲಿ ಪಕ್ಷದ ನಿರ್ಧಾರಕ್ಕೆ ಬದ್ಧವಾಗಿರುವಂತೆ ಈಶ್ವರಪ್ಪ ಪುತ್ರ ಕಾಂತೇಶ್ ಅವರನ್ನು ನಿವಾಸಕ್ಕೆ ಕರೆಸಿಕೊಂಡು ಮನವೊಲಿಕೆ ಮಾಡುವಲ್ಲಿ ಬಿಎಸ್ವೈ ಸಫಲರಾಗಿದ್ದರು.
ಇದನ್ನೂ ಓದಿ : ಯಡಿಯೂರಪ್ಪರ ಪುತ್ರ ಎಂಬ ಕಾರಣಕ್ಕೆ ಹೈಕಮಾಂಡ್ ನನಗೆ ಟಿಕೆಟ್ ನೀಡಿಲ್ಲ: ವಿಜಯೇಂದ್ರ
