ಬೆಂಗಳೂರು : ಗ್ರಾಮಾಂತರ ಭಾಗದಲ್ಲೇ ಅನೀಮಿಯಾ ಹೆಚ್ಚಾಗುತ್ತಿದ್ದು, ಇದನ್ನ ತಡೆಗಟ್ಟವ ನಿಟ್ಟಿನಲ್ಲಿ, ಆರೋಗ್ಯ ಇಲಾಖೆ ಇಂದು ಅನೀಮಿಯಾ ಮುಕ್ತ ಭಾರತ ಎಂಬ ಅಭಿಯಾನ ಕಾರ್ಯಕ್ರಮ ಹಮ್ಮಿಕೊಂಡಿದೆ. ಕಾರ್ಯಕ್ರಮದಲ್ಲಿ ಎಲ್ಲ ಜಿಲ್ಲೆಗಳಿಂದ ವೈದ್ಯರು, ತಜ್ಞರು ಭಾಗಿಯಾಗಿ, ತಮ್ಮತಮ್ಮ ಭಾಗಗಳಲ್ಲಿ ಯಾವ ರೀತಿಯಲ್ಲಿ ಅನೀಮಿಯಾ ಪ್ರಮಾಣವನ್ನು ಕಡಿಮೆ ಮಾಡಬಹುದು ಎಂಬುದರ ಬಗ್ಗೆ ಚರ್ಚೆ ನಡೆಸಲಾಯಿತು.
ಅನೀಮಿಯ ಎಂದರೆ ?
ಅನೀಮಿಯ ಎಂದರೆ ರಕ್ತಹೀನತೆ ಎಂದರ್ಥ. ರಕ್ತ ಹೀನತೆಯ ಗಂಭೀರತೆಯಿಂದ ಬಳಲುತ್ತಿರುವ ದೇಶಗಳಲ್ಲಿ ಭಾರತವು ಸಹ ಒಂದು ದೇಶವಾಗಿದೆ. ನಮ್ಮ ದೇಶದ ಪ್ರತಿಶತ 50ರಷ್ಟು ಗರ್ಭಿಣಿಯರು, ಶೇ.54 ರಷ್ಟು ಹದಿಹರೆಯದವರಲ್ಲಿ ಶೇ.59 ರಷ್ಟು 5 ವರ್ಷದೊಳಗಿನ ಮಕ್ಕಳು ಶೇ 3ರಷ್ಟುಗರ್ಭಿಣಿಯರಲ್ಲಿ ರಕ್ತಹೀನತೆಯಿಂದ ಬಳಲುತ್ತಿದ್ದಾರೆ.
ಅನೀಮಿಯ ಪರಿಣಾಮಗಳು
ರಕ್ತಹೀನತೆಯ ಮಕ್ಕಳಲ್ಲಿ ಅರಿವು ಮತ್ತು ಬೌದ್ಧಿಕ ಬೆಳವಣಿಗೆಯನ್ನು ದುರ್ಬಲಗೊಳಿಸುತ್ತದೆ. ಅನಾರೋಗ್ಯಕ್ಕೆ ತುತ್ತಾಗುವ ಸಾಧ್ಯತೆಯನ್ನು ಹೆಚ್ಚಿಸುತ್ತದೆ. ವಯಸ್ಕರಲ್ಲಿ ಕೆಲಸದ ಸಾಮರ್ಥ್ಯ ಮತ್ತು ಉತ್ಪಾದಕತೆ ಕುಂಠಿತಗೊಳಿಸುತ್ತದೆ. ಗರ್ಭಾವಸ್ಥೆಯಲ್ಲಿ ತಾಯಿ ಮತ್ತು ಶಿಶುವಿನ ಅಸ್ವಸ್ಥತೆ ಮತ್ತು ಸಾವಿನ ಪ್ರಮಾಣದ ಹೆಚ್ಚಳಕ್ಕೆ ಇದು ಕಾರಣವಾಗುತ್ತದೆ. ರಕ್ತಹೀನತೆಯ ಪ್ರಸೂತಿ ಸಂದರ್ಭದ ಅಪಾಯಗಳು ಅಸಮರ್ಪಕ ಭ್ರೂಣದ ಬೆಳವಣಿಗೆ, ಕಡಿಮೆ ತೂಕದ ಶಿಶು ಜನನ, ನರ ಕೊಳವೆಯಲ್ಲಿ ದೋಷ, ಪ್ರಸವಪೂರ್ವ ಮರಣ, ಅವಧಿ ಪೂರ್ವ ಜನನ ಹೆರಿಗೆಯ ನಂತರ ರಕ್ತಸ್ರಾವ ಮತ್ತು ತಾಯಿ ಮರಣಗಳಿಗೆ ಕಾರಣವಾಗುತ್ತದೆ.
ಅಂದಹಾಗೇ, ರಾಷ್ಟ್ರೀಯ ಆರೋಗ್ಯ ಮತ್ತು ಕುಟುಂಬ ಸಮೀಕ್ಷೆ -4ರ ಪ್ರಕಾರ ನಮ್ಮ ದೇಶದಲ್ಲಿ ಶೇ 53ರಷ್ಟು ಸಂತಾನೋತ್ಪತ್ತಿ ವಯಸ್ಸು (15-49 ವರ್ಷ) ಮಹಿಳೆಯರು, ಶೇ.23ರಷ್ಟು ಪುರುಷರು, ಶೇ.50ರಷ್ಟು ಗರ್ಭಿಣಿಯರು ರಕ್ತಹೀನತೆಯಿಂದ ಬಳಲುತ್ತಿದ್ದಾರೆ.
ರಾಜ್ಯದಲ್ಲಿ ಅನೀಮಿಯ ಪ್ರಮಾಣ
ಕರ್ನಾಟಕ ರಾಜ್ಯದಲ್ಲಿ 6-59 ತಿಂಗಳ ಮಕ್ಕಳಲ್ಲಿ ಶೇ. 60, ಗರ್ಭಿಣಿಯರಲ್ಲಿ (15-44 ವರ್ಷ) ಶೇ.45, ಎಲ್ಲ ಮಹಿಳೆಯರಲ್ಲಿ ಶೇ.44.8 ಅಲ್ಲದೇ ಶೇ.18.2 ರಷ್ಟು ಪುರುಷರೂ ಸಹ ರಕ್ತಹೀನತೆಯಿಂದ ಬಳಲುತ್ತಿದ್ದಾರೆ. ಅಷ್ಟೇ ಅಲ್ಲದೆ ಗ್ರಾಮೀಣ ಮತ್ತು ನಗರ ಪ್ರದೇಶಗಳಲ್ಲಿ ರಕ್ತಹೀನತೆಯ ಅಸಮಾನತೆಯನ್ನು ತೋರಿಸುತ್ತದೆ. ಎಸ್ಸಿ ಎಸ್ಟಿ ವರ್ಗದಲ್ಲಿರುವ ಜನರು ಕೂಡ ಅತೀ ಹೆಚ್ಚು ಜನರು ರಕ್ತಹೀನತೆಯಿಂದ ಬಳಲುತ್ತಿದ್ದಾರೆ.
ರಕ್ತ ಹೀನತೆಗೆ ಕಾರಣ ?
ಮಲೇರಿಯಾ ವ್ಯಾಪಿತ ಪ್ರದೇಶಗಳಲ್ಲಿ, ರಕ್ತಹೀನತೆಯಿಂದ ತಾಯಿ ಮತ್ತು ಶಿಶು ಮರಣಕ್ಕೆ ಕಾರಣವಾಗಿದ್ದು, ಇದನ್ನು ತಡೆಗಟ್ಟಬಹುದಾಗಿದೆ. ಅತ್ಯಂತ ತೀವ್ರಸ್ವರೂಪದ ರಕ್ತಹೀನತೆಯು ಸಾವಿಗೆ ಸಹ ಕಾರಣವಾಗಬಹುದು. ಇನ್ನು ರಕ್ತಹೀನತೆ ಅನೇಕ ಕಾರಣಗಳಿದ್ದು, ಅದರಲ್ಲಿ ಆಹಾರದ ಕಬ್ಬಿಣಾಂಶದ ಕೊರತೆ. ಶಾಲಾ ಮಕ್ಕಳಲ್ಲಿ ಮತ್ತು ಚಿಕ್ಕ ವಯಸ್ಸಿಗೆ ತಾಯಿಯಾಗುವುದು. 2-5 ವರ್ಷ ವಯಸ್ಸಿನ ಮಕ್ಕಳಲ್ಲಿ ಶೇ.80ರಷ್ಟು ರಕ್ತಹೀನತೆಗೆ ಕಾರಣವಾಗಿದೆ.
ಅನೀಮಿಯ ನಿವಾರಣೆಗೆ ಪಣ
2025ರ ವೇಳೆಗೆ ರಕ್ತಹೀನತೆಯನ್ನು ಪ್ರಮಾಣವನ್ನು ಕಡಿಮೆ ಮಾಡುವ ಗುರಿ ಹೊಂದಿದ್ದು, ಈ ನಿಟ್ಟಿನಲ್ಲಿ ಹಲವು ಕಾರ್ಯಕ್ರಮಗಳನ್ನು ಆಯೋಜಿಸಿದೆ. ಈಗಾಗಲೇ ಮಾತೃಶ್ರೀ ಪೂರ್ಣ, ಕ್ಷೀರ ಯೋಜನೆ ಮಾಡಿದ್ದು, ಹಂತಹಂತವಾಗಿ ರಕ್ತಹೀನತೆ ಹೋಗಲಾಡಿಸಲು ಇಲಾಖೆ ಪಟ್ಟ ತೊಟ್ಟಿದೆ. ಡಿಜಿಟಲ್ ಹಿಮೋಗ್ಲೋಬಿನ್ ಮೀಟರ್‌ ಗಳನ್ನು ಬಳಸಿಕೊಂಡು ಶಾಲೆಯಲ್ಲಿ ಹದಿಹರೆಯದವರು ಮತ್ತು ಗರ್ಭಿಣಿ ಮಹಿಳೆಯರಲ್ಲಿ ರಕ್ತಹೀನತೆಯ ಪರೀಕ್ಷೆ, ಆರೈಕೆ ಮತ್ತು ನಿಯಂತ್ರಣದಂತಹ ಹೊಸ ಉಪಕ್ರಮಗಳನ್ನು ಒಳಗೊಂಡಿದೆ ಎಂದು ತಿಳಿಸಿದರು.
