ಬೆಂಗಳೂರು: ಸ್ಯಾಂಡಲ್ವುಡ್ ಕಲಾವಿದರಿಗೆ ಮಾದಕ ವಸ್ತು ಪೂರೈಸುತ್ತಿರುವವರ ಪೈಕಿ ನೈಜಿರಿಯನ್ ಪ್ರಜೆಗಳು ಕೂಡ ಇದ್ದಾರೆ ಎಂಬ ಮಾಹಿತಿಯನ್ನ ನಿರ್ದೇಶಕ ಇಂದ್ರಜಿತ್ ಲಂಕೇಶ್ ತಿಳಿಸಿದ್ದಾರೆಂಬ ಮಾಹಿತಿ ಸಿಸಿಬಿ ಉನ್ನತ ಮೂಲಗಳಿಂದ ಬಯಲಾಗಿದೆ.
ಸಿಸಿಬಿ ಬಳಿ ಈ ಮುಂಚೆಯೇ ನಶೆ ಏರಿಸಿಕೊಳ್ಳುವ ನಟ-ನಟಿಯರ ಮಾಹಿತಿ ಇತ್ತು. ಸದ್ಯ ಸಿಸಿಬಿ ಮಾಹಿತಿ ಹಾಗೂ ಇಂದ್ರಜಿತ್ ಲಂಕೇಶ್ ಮಾಹಿತಿ ಸಾಮ್ಯತೆ ಇದೆ ಎನ್ನಲಾಗ್ತಿದೆ. ಆದರೆ ಇಂದ್ರಜಿತ್ ಲಂಕೇಶ್ ತನಿಖಾಧಿಕಾರಿಗಳಿಗೆ ಕೇವಲ ಭಾತ್ಮಿದಾರರಾಗಿ ಮಾಹಿತಿ ನೀಡಿ ಸಾಕ್ಷಿಯಾಗಿ ಪರಿವರ್ತನೆ ಆಗುವುದಿಲ್ಲ ಎಂದು ಜಂಟಿ ಆಯುಕ್ತರ ಮುಂದೆಯೇ ಸ್ಪಷ್ಟಪಡಿಸಿದ್ದಾರೆ. ಲಂಕೇಶ್ ನೀಡಿರುವ ಮಾಹಿತಿ ಮೇರೆಗೆ ಸಿಸಿಬಿ ಪೊಲೀಸರು ನಟಿಯರಿಗೆ ನೋಟಿಸ್ ನೀಡಲು ತಯಾರಿ ನಡೆಸಿದ್ದಾರೆ ಎನ್ನಲಾಗಿದೆ.
ಇತ್ತ ಈ ಕುರಿತು ಟ್ವೀಟ್ ಮಾಡಿರುವ ಕೆಎಸ್ಆರ್ಪಿ ಎಡಿಜಿಪಿ ಅಲೋಕ್ ಕುಮಾರ್, ಡ್ರಗ್ಸ್ ಮಾಫಿಯಾ ದೊಡ್ಡ ಮಟ್ಟದ ದಂಧೆ. ಇದನ್ನ ಹೋಗಲಾಡಿಸಬೇಕೆಂದರೆ ಕ್ರೂರವಾಗಿ ಬೇಟೆಯಾಡಬೇಕು. 2011ರಲ್ಲಿ ಸಿಸಿಬಿಯಲ್ಲಿ ನಾವಿದ್ದಾಗ ಮಾರ್ಟಿನ್ ಎನ್ ಡ್ಯೂಕ್ ಎನ್ನುವ ಮಾಸ್ಟರ್ ಮೈಂಡ್ ನ ಹಿಡಿದಿದ್ವಿ. 2019 ರಲ್ಲಿ 60 ಜನ ಡ್ರಗ್ಸ್ ಪೆಡ್ಲರ್ಗಳಿಗೆ ಪರೇಡ್ ನಡೆಸಿದ್ದೆವು ಎಂದು ಮಾಹಿತಿ ನೀಡಿದ್ದಾರೆ.
