ಪರಪ್ಪನ ಅಗ್ರಹಾರ ಜೈಲಿನಲ್ಲಿ 18-21ರ ವಯಸ್ಕರಿಗೆ ಚಿತ್ರಹಿಂಸೆ ಆರೋಪ

ಪರಪ್ಪನ ಅಗ್ರಹಾರ ಜೈಲಿನಲ್ಲಿ 18-21ರ ವಯಸ್ಕರನ್ನು ಸ್ಕೂಲ್ ಬ್ಯಾರಕ್​​ನಲ್ಲಿ ಇಡಬೇಕು, ಆದ್ರೆ ಸಾಮಾನ್ಯ ಬ್ಯಾರಕ್​ಗೆ ಹಾಕಿ ಅಪರಾಧ ಚಟುವಟಿಕೆಗಳಿಗೆ ಬಳಸಿಕೊಳ್ಳುತ್ತಿದ್ದಾರೆ. ಅವರಿಗೆ ಚಿತ್ರಹಿಂಸೆ ನೀಡಲಾಗ್ತಿದೆ ಎಂದು ಆರೋಪ ಕೇಳಿಬಂದಿದೆ. ಅಲ್ಲದೆ, ಆದಷ್ಟು ಬೇಗ ಸ್ಕೂಲ್ ಬ್ಯಾರಕ್​​ಗೆ ಸ್ಥಳಾಂತರಿಸುವಂತೆ ಪರಪ್ಪನ ಅಗ್ರಹಾರದಲ್ಲಿರುವ ಕೈದಿ ರಾಮಕೃಷ್ಣ ಗೃಹ ಇಲಾಖೆಗೆ ದೂರು ನೀಡಿದ್ದಾರೆ ಎಂದು ತಿಳಿದುಬಂದಿದೆ.

ಬೆಂಗಳೂರು: ಪರಪ್ಪನ ಅಗ್ರಹಾರ ಜೈಲಿನಲ್ಲಿ 18-21ರ ವಯಸ್ಕರಿಗೆ ಚಿತ್ರಹಿಂಸೆ ನೀಡಲಾಗ್ತಿದೆ ಎನ್ನುವ ಆರೋಪ ಕೇಳಿಬಂದಿದೆ.

ಅಪರಾಧ ಮಾಡಿದ 18-21ರ ವಯಸ್ಕರು ಜೈಲಿನ ಸ್ಕೂಲ್ ಬ್ಯಾರಕ್​​​ನಲ್ಲಿರಬೇಕಾಗಿದ್ದು, ಇವರನ್ನು ಸಾಮಾನ್ಯ ಬ್ಯಾರಕ್​​ಗೆ ಹಾಕಲಾಗಿದೆ. ಈ ವಯಸ್ಸಿನವರನ್ನು ಸ್ಕೂಲ್ ಬ್ಯಾರಕ್​​ನಲ್ಲಿ ಇಡಬೇಕು. ಆದ್ರೆ ಸಾಮಾನ್ಯ ಬ್ಯಾರಕ್​ಗೆ ಹಾಕಲಾಗಿದೆ. ಅವರನ್ನು ಆದಷ್ಟು ಬೇಗ ಸ್ಕೂಲ್ ಬ್ಯಾರಕ್​​ಗೆ ಶಿಫ್ಟ್ ಮಾಡುವಂತೆ ಪರಪ್ಪನ ಅಗ್ರಹಾರದಲ್ಲಿರುವ ಕೈದಿ ರಾಮಕೃಷ್ಣ ಗೃಹ ಇಲಾಖೆಗೆ ದೂರು ನೀಡಿದ್ದಾರೆ ಎಂದು ತಿಳಿದುಬಂದಿದೆ.

ದೂರಿನ ಪ್ರತಿ

ಕೈದಿ ರಾಮಕೃಷ್ಣನಿಗೆ ಇನ್ನುಳಿದ ಕೈದಿಗಳು ಸಾಥ್​ ನೀಡಿದ್ದು, ಈ-ಜನಸ್ಪಂದನಾ ಮೂಲಕ ದೂರು ರವಾನಿಸಿದ್ದಾರೆ. ಆದ್ರೆ ಈ ಆರೋಪವನ್ನು ತಳ್ಳಿ ಹಾಕಿರುವ ಜೈಲಾಧಿಕಾರಿಗಳು, ಸ್ಕೂಲ್ ಬ್ಯಾರಕ್​​ನಲ್ಲಿ ಕೈದಿಗಳನ್ನು ಇಡುತ್ತೇವೆ. ಆದರೆ ಕೋವಿಡ್-19 ಇದ್ದ ಕಾರಣ ಇಡಲು ಆಗಿಲ್ಲ. ವಯಸ್ಕ ಕೈದಿಗಳನ್ನು ಬೇರೆ ಬ್ಯಾರಕ್​​ಗೆ ಶಿಫ್ಟ್ ಮಾಡಲಾಗಿದೆ ಎಂದಿದ್ದಾರೆ. ಸದ್ಯ ಈ ಪತ್ರ ಬಹಳ ಅನುಮಾನಕ್ಕೆ ಎಡೆ ಮಾಡಿಕೊಟ್ಟಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಗೃಹ ಇಲಾಖೆ ಕಾರ್ಯದರ್ಶಿ ಡಿ. ರೂಪಾ ನನಗೆ ಈವರೆಗೆ ಆ ರೀತಿ ದೂರಿನ ಪ್ರತಿ ಬಂದಿಲ್ಲ. ನಾನು ಜೈಲಾಧಿಕಾರಿಯಾಗಿದ್ದಾಗ ಆ ರೀತಿ ಯಾವುದೇ ದೂರು ಇರಲಿಲ್ಲ. ಸಾಮಾನ್ಯವಾಗಿ 18-21ರ ವಯಸ್ಸಿನವರನ್ನು ಸಾಮಾನ್ಯ ಬ್ಯಾರಕ್​​ನಲ್ಲೂ ಇರಿಸಬಹುದು. ಆದ್ರೆ ಅವರನ್ನು ಅಪರಾಧ ಚಟುವಟಿಕೆಗೆ ಬಳಸಿಕೊಳ್ಳುವುದು ನಮ್ಮ ಗಮನಕ್ಕೆ ಬಂದಿಲ್ಲ. ಈ ರೀತಿ ದೂರು ಕೊಟ್ಟಿರುವುದು ನಮಗೆ ಈಗ ಗೊತ್ತಾಗಿದೆ. ಒಂದು ವೇಳೆ ಗೃಹ ಇಲಾಖೆಗೆ ದೂರು ಬಂದರೆ, ತಕ್ಷಣ‌ ಆ ಬಗ್ಗೆ ನಾನು ವರದಿ ಕೇಳಿ, ಸತ್ಯಾನುಸತ್ಯತೆ ತಿಳಿದು ಕ್ರಮ ಜರುಗಿಸಲು ಮುಂದಾಗುತ್ತೇನೆ ಎಂದು ಗೃಹ ಇಲಾಖೆ ಕಾರ್ಯದರ್ಶಿ ಡಿ. ರೂಪಾ ಸ್ಪಷ್ಟಪಡಿಸಿದ್ದಾರೆ.