ಡ್ರಗ್ಸ್​​ ಜಾಲದ ನಂಟು ಆರೋಪ: ಸಿಸಿಬಿ ವಿಚಾರಣೆಗೆ ಹಾಜರಾದ ದಿಗಂತ್-ಐಂದ್ರಿತಾ

ಡ್ರಗ್ಸ್​​ ಲಿಂಕ್​ ಕೇಸ್​​ನ ಆರೋಪಿ ಶೇಖ್ ಫಾಜಿಲ್​​​ ಆಯೋಜಿಸಿದ್ದ ಪಾರ್ಟಿಯಲ್ಲಿ ಭಾಗಿಯಾಗಿರುವ ಆರೋಪದಡಿ ನಟಿ ಐಂದ್ರಿತಾ ರೇ ಹಾಗೂ ನಟ ದಿಗಂತ್​ ಸಿಸಿಬಿ ವಿಚಾರಣೆಗೆ ಹಾಜರಾಗಿದ್ದಾರೆ.

ಬೆಂಗಳೂರು: ಸ್ಯಾಂಡಲ್​​​​​ವುಡ್ ಡ್ರಗ್ಸ್ ಕೇಸ್ ಸಂಬಂಧ ವಿಚಾರಣೆಗೆ ಹಾಜರಾಗಲು ದಿಗಂತ್ ದಂಪತಿಗೆ ಸಿಸಿಬಿ ನೋಟಿಸ್ ನೀಡಿದ್ದ ಹಿನ್ನೆಲೆ ಇಂದು ವಿಚಾರಣೆಗೆ ಹಾಜರಾಗಿದ್ದಾರೆ.

ಶ್ರೀಲಂಕಾದಲ್ಲಿ ಶೇಖ್ ಫಾಜಿಲ್ ನಡೆಸುತ್ತಿದ್ದ ಕ್ಯಾಸಿನೋ ವ್ಯವಹಾರ ಸಂಬಂಧ ಬಾಲಿವುಡ್ ಹಾಗೂ ಸ್ಯಾಂಡಲ್​​​​ವುಡ್ ನಟ-ನಟಿಯರು ಸಹ ಈ ಪಾರ್ಟಿಯಲ್ಲಿ ಭಾಗಿಯಾಗಿದ್ದರು ಎಂಬ ಆರೋಪದಡಿ ಸಿಸಿಬಿ ವಿಚಾರಣೆ ನಡೆಸುತ್ತಿದೆ.

ಸದ್ಯ ವಿಚಾರಣೆಗೆ ಹಾಜರಾಗಿರುವ ದಿಗಂತ್ ದಂಪತಿಯನ್ನು ಸಿಸಿಬಿ ಇನ್ಸ್​​​ಪೆಕ್ಟರ್​​​​ಗಳಾದ ಪುನೀತ್ ಹಾಗೂ ಬೊಳೆತ್ತಿನ್ ವಿಚಾರಣೆ ನಡೆಸಲಿದ್ದಾರೆ‌. ಶೇಖ್ ಫಾಜಿಲ್ ಎಷ್ಟು ವರ್ಷಗಳಿಂದ ಪರಿಚಯ.? ಪಾರ್ಟಿಯಲ್ಲಿ ಯಾರ್ಯಾರು ಭಾಗಿಯಾಗಿದ್ದರು‌‌ ಸೇರಿದಂತೆ ಇತರೆ ಪ್ರಶ್ನೆಗಳನ್ನು ಕೇಳಲು ಸಿದ್ಧತೆ ನಡೆಸಿದ್ದಾರೆ. ಇನ್ನೊಂದೆಡೆ ವಿಚಾರಣೆ ವೇಳೆ ದಂಪತಿಯ ಮೊಬೈಲ್ ವಶಕ್ಕೆ ಪಡೆದುಕೊಂಡಿದ್ದಾರೆ ಎಂದು ತಿಳಿದು ಬಂದಿದೆ.