ಬೆಂಗಳೂರು: ಸಚಿವ ಸಂಪುಟ ರಚನೆ ಕಸರತ್ತು ನಡೆಸುತ್ತಿರುವ ಬಿಜೆಪಿ, ಮಂತ್ರಿ ಮಂಡಲದ ಶೇ.50ರಷ್ಟು ಪಾಲನ್ನು ಭವಿಷ್ಯದಲ್ಲಿ ಪಕ್ಷ ಸೇರಲಿರುವ ವಲಸಿಗ ರಾಜಕಾರಣಿಗಳಿಗೆ ಮೀಸಲಿರಿಸಲು ನಿರ್ಧರಿಸಿದೆ ಎನ್ನಲಾಗ್ತಿದೆ.
ಒಟ್ಟು 34 ಸಚಿವ ಸ್ಥಾನಗಳಲ್ಲಿ ಅರ್ಧ ಭಾಗವನ್ನು ವಲಸಿಗರಿಗೆ ಮೀಸಲಿಟ್ಟು, ಉಳಿದ ಅರ್ಧದಷ್ಟು ಸ್ಥಾನಗಳನ್ನು ಪಕ್ಷದ ಶಾಸಕರಿಗೆ ಹಂಚಿಕೆ ಮಾಡಲಿದೆ ಎಂಬ ಮಾತುಗಳು ಹರಿದಾಡುತ್ತಿವೆ.
ಕಾಂಗ್ರೆಸ್ - ಜೆಡಿಎಸ್ ದೋಸ್ತಿ ಸರಕಾರ ಪತನಗೊಳ್ಳುವಲ್ಲಿ ಅತೃಪ್ತ ಶಾಸಕರ ಕೊಡುಗೆ ಅಪಾರವಾಗಿದೆ. ತಮ್ಮ ರಾಜಕೀಯ ಭವಿಷ್ಯವನ್ನೇ ಪಣವಾಗಿಟ್ಟು ಶಾಸಕ ಸ್ಥಾನಕ್ಕೆ ರಾಜೀನಾಮೆ ನೀಡಿದ ಬಂಡಾಯ ಶಾಸಕರತ್ತ ಬಿಜೆಪಿ ಕಣ್ಣು ನೆಟ್ಟಿದೆ. ಅವರನ್ನು ಪಕ್ಷಕ್ಕೆ ಸೇರಿಸಿಕೊಂಡು, ಆಶೋತ್ತರಗಳ ಈಡೇರಿಕೆಗಾಗಿ ಸಚಿವ ಸ್ಥಾನಗಳನ್ನು ಮೀಸಲಿಡಲು ತೀರ್ಮಾನಿಸಿದೆ ಎಂದು ತಿಳಿದು ಬಂದಿದೆ.
16 ಸಚಿವ ಸ್ಥಾನಗಳು ಮಾತ್ರ ಬಿಜೆಪಿ ಶಾಸಕರಿಗೆ ಲಭ್ಯವಿದ್ದು, ಜಾತಿ, ಪ್ರಾದೇಶಿಕತೆ, ಹಿರಿತನ, ಕೋಟಾ, ಪಕ್ಷ ಸಂಘಟನೆ ಹೀಗೆ ವಿವಿಧ ಕೆಟಗರಿಗಳಲ್ಲಿ ಸಚಿವರನ್ನು ಆಯ್ಕೆ ಮಾಡುವುದು ಸಿಎಂ ಯಡಿಯೂರಪ್ಪ ಹಾಗೂ ಪಕ್ಷದ ಹೈಕಮಾಂಡ್ಗೆ ಸವಾಲಿನ ಕೆಲಸವೂ ಆಗಿದೆ.
ಸಚಿವ ಸ್ಥಾನದ ಆಕಾಂಕ್ಷಿಗಳ ಪಟ್ಟಿ ದೊಡ್ಡದಾಗಿದ್ದು, ಬಿಜೆಪಿ ಶಾಸಕರು ಸಚಿವ ಸ್ಥಾನದ ಮೇಲೆ ಹೆಚ್ಚಿನ ನಿರೀಕ್ಷೆಗಳನ್ನಿಟ್ಟುಕೊಳ್ಳದೇ ಪಕ್ಷದ ತೀರ್ಮಾನಕ್ಕೆ ಬದ್ಧವಾಗಿರಬೇಕು ಎನ್ನುವ ಸಂದೇಶವನ್ನು ಈಗಾಗಲೇ ನೀಡಲಾಗಿದೆ.
ಸ್ವತಃ ಬಿಜೆಪಿ ಹೈಕಮಾಂಡ್ ಸಚಿವ ಸ್ಥಾನಗಳನ್ನು ನಿರ್ಧಾರ ಮಾಡುತ್ತಿರುವುದರಿಂದ ಭಿನ್ನಮತಕ್ಕೆ ಹೆಚ್ವಿನ ಅವಕಾಶವಿಲ್ಲ ಎನ್ನುವ ಲೆಕ್ಕಾಚಾರ ರಾಜ್ಯದ ನಾಯಕರದ್ದಾಗಿದೆ. ಪ್ರಧಾನಿ ಮೋದಿ ಹಾಗು ರಾಷ್ಟ್ರೀಯ ಅಧ್ಯಕ್ಷ ಅಮಿತ್ ಶಾ ಬಹಳ ಪ್ರಬಲವಾಗಿರುವುದರಿಂದ ಬಂಡಾಯ ಚಟುವಟಿಕೆಯ ಆಟ ನಡೆಯುವುದಿಲ್ಲವೆಂದು ಬಿಜೆಪಿಗರು ಅರಿತಿದ್ದಾರೆ. ಅದರಂತೆ ಪಕ್ಷ ನೀಡುವ ಜವಾಬ್ದಾರಿಯನ್ನು ಒಪ್ಪಿಕೊಳ್ಳುವ ಆಲೋಚನೆಯಲ್ಲಿ ತೊಡಗಿದ್ದಾರೆ.
