ಗ್ರಾ.ಪಂ.ಚುನಾವಣೆ ವ್ಯಕ್ತಿಗತವಾಗಿರಬೇಕು, ಯಾವುದೇ ಪಕ್ಷಕ್ಕೆ ಸೀಮಿತವಾಗಿರಬಾರದು: ಸಿದ್ದಗಂಗಾ ಶ್ರೀ

ಗ್ರಾಮ ಪಂಚಾಯತ್​ ಚುನಾವಣೆಗಳಿಂದ ಗ್ರಾಮಗಳಲ್ಲಿ ವೈಷಮ್ಯದ ವಾತಾವರಣ ಉಂಟಾಗುತ್ತಿದೆ. ಹೀಗಾಗಿ ವೈಷಮ್ಯ ಬೇಡ. ಈ ಚುನಾವಣೆಗಳು ನಮ್ಮ ಪ್ರತಿನಿಧಿಗಳನ್ನ ಆಯ್ಕೆ ಮಾಡುವ ದೊಡ್ಡ ಜವಾಬ್ದಾರಿ, ಈ ಜವಾಬ್ದಾರಿಯನ್ನು ನಾವು ಬಹಳ ಎಚ್ಚರಿಕೆಯಿಂದ ನಿಭಾಯಿಸಬೇಕು ಎಂದು ಸಿದ್ದಗಂಗಾ ಮಠದ ಶ್ರೀ ಸಿದ್ದಲಿಂಗ ಸ್ವಾಮೀಜಿ ಕಿವಿಮಾತು ಹೇಳಿದ್ರು.

ನೆಲಮಂಗಲ : ಗ್ರಾಮಾಂತರ ಪ್ರದೇಶಗಳಲ್ಲಿ ಗ್ರಾಮ ಪಂಚಾಯತ್​ ಚುನಾವಣೆ ಕಾವು ಏರುತ್ತಿದ್ದು, ಚುನಾವಣೆಗಳಲ್ಲಿ ವೈಷಮ್ಯ ಬೇಡ, ಚುನಾವಣೆ ಯಾವುದೇ ಪಕ್ಷಕ್ಕೆ ಸೀಮಿತವಾಗಿರದೆ ವ್ಯಕ್ತಿಗತವಾಗಿರಬೇಕೆಂದು ಮತದಾರರಿಗೆ ಸಿದ್ದಗಂಗಾ ಮಠದ ಪೀಠಾಧ್ಯಕ್ಷ ಸಿದ್ದಲಿಂಗ ಸ್ವಾಮೀಜಿ ತಿಳಿ ಹೇಳಿದರು.

ನೆಲಮಂಗಲ ಸಮೀಪದ ಬಂಡೇಮಠದ ಕಾರ್ತಿಕ ದೀಪೋತ್ಸವದಲ್ಲಿ ಅವರು ಭಾಗವಹಿಸಿದ್ರು. ಈ ಸಮಯದಲ್ಲಿ ಗ್ರಾ.ಪಂ. ಚುನಾವಣೆ ಬಗ್ಗೆ ಮಾತನಾಡಿದ ಶ್ರೀಗಳು, ಮತದಾರರಿಗೆ ಮಾರ್ಗದರ್ಶನ ನೀಡಿದರು. ಈ ಚುನಾವಣೆಗಳಿಂದ ಗ್ರಾಮಗಳಲ್ಲಿ ವೈಷಮ್ಯದ ವಾತಾವರಣ ಉಂಟಾಗುತ್ತಿದೆ. ವೈಷಮ್ಯ ಬೇಡ, ಗ್ರಾಮ ಪಂಚಾಯತ್​ ಚುನಾವಣೆಗಳು ನಮ್ಮ ಪ್ರತಿನಿಧಿಗಳನ್ನ ಆಯ್ಕೆ ಮಾಡುವ ದೊಡ್ಡ ಜವಾಬ್ದಾರಿ, ಈ ಜವಾಬ್ದಾರಿಯನ್ನು ನಾವು ಬಹಳ ಎಚ್ಚರಿಕೆಯಿಂದ ನಿಭಾಯಿಸಬೇಕು ಎಂದು ಹೇಳಿದ್ರು.

ಪ್ರಜಾತಂತ್ರ ವ್ಯವಸ್ಥೆಯಲ್ಲಿ ಗ್ರಾಮ ಪಂಚಾಯತ್​ ಚುನಾವಣೆ ಬೇರುಮಟ್ಟದ್ದಾಗಿದ್ದು, ಈ ಚುನಾವಣೆ ಪ್ರಜಾತಂತ್ರ ವ್ಯವಸ್ಥೆಯನ್ನೇ ಎತ್ತಿಹಿಡಿಯಬೇಕಿತ್ತು. ಆದರೆ ಇಲ್ಲಿ ಪಕ್ಷಗಳು ಮತ್ತು ಕುಟುಂಬಗಳ ನಡುವೆ ತಿಕ್ಕಾಟ ಉಂಟಾಗಿದೆ ಎಂದು ಶ್ರೀಗಳು ಬೇಸರ ವ್ಯಕ್ತಪಡಿಸಿದ್ದಾರೆ.

ಎಲ್ಲರೂ ಮತದಾನ ಮಾಡಬೇಕು, ಮತಕ್ಕೆ ಬೆಲೆಕಟ್ಟಲು ಆಗುವುದಿಲ್ಲ. ಪವಿತ್ರವಾದ ಮತ ಚಲಾಯಿಸಿ ಪ್ರಜಾತಂತ್ರ ವ್ಯವಸ್ಥೆಯನ್ನು ಯಶಸ್ವಿಗೊಳಿಸಬೇಕೆಂದು ಮತದಾರರಿಗೆ ಸಲಹೆ ನೀಡಿದರು.

ಧಾರ್ಮಿಕ ಕಾರ್ಯಗಳಿಂದ ಮಾತ್ರ ಒಗ್ಗಟ್ಟು ಸಾಧ್ಯ:
ದೀಪೋತ್ಸವದ ಬಗ್ಗೆ ಮಾತನಾಡಿದ ಶ್ರೀಗಳು, ಗ್ರಾಮಗಳಲ್ಲಿ ಧಾರ್ಮಿಕ ಕಾರ್ಯಗಳಿಂದ ಮಾತ್ರ ಒಗ್ಗಟ್ಟು ಸಾಧ್ಯ. ಉತ್ಸವ ಮತ್ತು ಹಬ್ಬಗಳು ಎಲ್ಲರನ್ನೂ ಒಂದು ಮಾಡುತ್ತವೆ.

ಶತ್ರುಗಳನ್ನು ಪ್ರೀತಿಸುವುದೇ ಹಬ್ಬದ ವೈಶಿಷ್ಟ್ಯ. ನಮ್ಮೊಳಗಿನ ಮನಸ್ಸು ಮತ್ತು ಭಾವನೆಯನ್ನ ಶುದ್ಧ ಮಾಡುವುದೇ ದೀಪೋತ್ಸವ, ಹಬ್ಬವನ್ನು ಆಚರಣೆ ಮಾಡುವುದೇ ಎಲ್ಲರನ್ನೂ ಪ್ರೀತಿಸುವ ಸಲುವಾಗಿ ಎಂದು ಶ್ರೀಗಳು ಹೇಳಿದ್ರು.