ಹೊಸಕೋಟೆ/ಬೆಂಗಳೂರು: ಸಚಿವ ಎಂಟಿಬಿ ನಾಗರಾಜ್ ತಮ್ಮ ಸ್ವಂತ ಹಣದಿಂದ ಕಳೆದ ಒಂದು ವಾರದಿಂದ ಹೊಸಕೋಟೆ ತಾಲೂಕಿನಲ್ಲಿ ಆಶಾ ಕಾರ್ಯಕರ್ತೆಯರು, ಅಂಗನವಾಡಿ ಕಾರ್ಯಕರ್ತರು ಮತ್ತು ಅನಾಥಾಶ್ರಮಗಳಿಗೆ ರೇಷನ್ ಕಿಟ್ಗಳನ್ನು ವಿತರಿಸುತ್ತಿದ್ದಾರೆ. ಇಂದು ತಾಲೂಕಿನ ಟ್ಯಾಕ್ಸಿ ಮತ್ತು ಆಟೋ ಚಾಲಕರಿಗೆ ರೇಷನ್ ಕಿಟ್ ವಿತರಣೆ ಮಾಡಲಾಗುತ್ತಿದ್ದು, ಸಾವಿರಕ್ಕೂ ಹೆಚ್ಚು ಆಟೋ ಮತ್ತು ಟ್ಯಾಕ್ಸಿ ಚಾಲಕರು ಹೊಸಕೋಟೆ ಚನ್ನಬೈರೇಗೌಡ ಕ್ರೀಡಾಂಗಣದಲ್ಲಿ ಸೇರಿದ್ದಾರೆ.
ಸಾಮಾಜಿಕ ಅಂತರ ಕಾಯ್ದುಕೊಂಡು ಕ್ರೀಡಾಂಗಣದ ಒಳಗೆ 400ಕ್ಕೂ ಹೆಚ್ಚು ವಾಹನಗಳನ್ನು ನಿಲ್ಲಿಸಲಾಗಿದೆ. ಆದರೆ ಕ್ರೀಡಾಂಗಣದ ಹೊರಗೆ ನೂರಾರು ವಾಹನಗಳು ಕ್ರೀಡಾಂಗಣದೊಳಗೆ ಹೋಗಲು ಮುಗಿಬಿದ್ದಿದ್ದಾರೆ. ಕೆ.ಬಿ ಸರ್ಕಲ್ವರೆಗೂ ಆಟೋಗಳನ್ನು ನಿಲ್ಲಿಸಲಾಗಿದ್ದು, ವಾಹನ ಸಂಚಾರಕ್ಕೆ ತೊಂದರೆಯಾಗಿದೆ.
ತಾಲೂಕಿನಲ್ಲಿರುವ ಆಟೋ ರಿಕ್ಷಾ ಮತ್ತು ಟ್ಯಾಕ್ಸಿಗಳು ಹೊಸಕೋಟೆ ನಗರ ಭಾಗದಲ್ಲಿ ಬೀಡುಬಿಟ್ಟಿದೆ. ಸುಮಾರು 1200ಕ್ಕೂ ಹೆಚ್ಚು ಆಹಾರ ಕಿಟ್ಗಳನ್ನು ತಯಾರು ಮಾಡಿದ್ದು, ಸ್ವತಃ ಸಚಿವ ಎಂಟಿಬಿ ನಾಗರಾಜ್ ಅವರೇ ವಿತರಣೆ ಮಾಡುತ್ತಿದ್ದಾರೆ. ದಿನಸಿ ಕಿಟ್ಗಳನ್ನು ಪಡೆಯಲು ವಾಹನ ಸಮೇತ ಬಂದರೆ ಮಾತ್ರ ನೀಡುವುದಾಗಿ ಹೇಳಿರುವುದರಿಂದ ಕ್ರೀಡಾಂಗಣ ಸುತ್ತಮುತ್ತ ಟ್ರಾಫಿಕ್ ಜಾಮ್ ಉಂಟಾಗಿದೆ.
ಮಾಂಸ ಕೊಳ್ಳಲು ಮುಗಿಬಿದ್ದ ಜನತೆ:
ನಗರದಲ್ಲಿ ಎಲ್ಲೆಲ್ಲೂ ಜನಜಂಗುಳಿ ಕಂಡು ಬಂದಿದೆ. ಭಾನುವಾರದ ಬಾಡೂಟವನ್ನು ತಮ್ಮ ಮನೆಗಳಲ್ಲಿ ಸವಿಯಲು ಜನರು ಮಾಂಸ ಕೊಳ್ಳಲು ಸೇರಿದ್ದಾರೆ.
ಯಶವಂತಪುರ, ಶಿವಾಜಿನಗರದಲ್ಲಿಯೂ ಜನಜಂಗುಳಿ:
ಭಾನುವಾರದ ಬಾಡೂಟಕ್ಕೆ ಯಶವಂತಪುರ ಹಾಗೂ ಶಿವಾಜಿನಗರದ ಜನರು ಚಿಕನ್, ಮಟನ್, ಫಿಶ್ ಖರೀದಿಗೆ ಜಮಾಯಿಸಿದ್ದರು. ಬೆಳ್ಳಂ ಬೆಳ್ಳಗ್ಗೆಯೇ ಸಣ್ಣ ಪುಟ್ಟ ರಸ್ತೆಗಳಲ್ಲು ತುಂಬಿದ್ದ ಜನ ತರಕಾರಿ, ಹಣ್ಣು ಖರೀದಿಯಲ್ಲಿ ನಿರತರಾಗಿದ್ದರು.
ಮರೆಯಾದ ಸಾಮಾಜಿಕ ಅಂತರ:
ನಗರದಲ್ಲಿ ಬೈಕ್ ಆಟೋ ಸಂಚಾರಕ್ಕೆ ಬ್ರೇಕ್ ಎನ್ನುವುದು ಕಂಡು ಬರಲಿಲ್ಲ. ಸಾಮಾಜಿಕ ಅಂತರ ಮರೆತು ಜನರ ಓಡಾಟ ನಡೆಸಿದ್ದಾರೆ. ಮಾಸ್ಕ್ ಸರಿಯಾದ ಕ್ರಮದಲ್ಲಿ ಹಾಕಿಕೊಳ್ಳದೆ ವ್ಯಾಪಾರ ವಹಿವಾಟು ನಡೆಸಿದ್ದು, ಗಲ್ಲಿ‌ಯ ರಸ್ತೆಗಳಲ್ಲಿ ಸಹ ಟ್ರಾಫಿಕ್ ಆಗುವಷ್ಟು ಜನರ ಸಂಚಾರವಿತ್ತು.
ಬ್ಯಾಟರಾಯನಪುರದ ಪಾಪಣ್ಣ ಮಟನ್ ಸ್ಟಾಲ್ ಫುಲ್ ರಶ್:
ಚಿಕನ್, ಮಟನ್ ಮಾರಾಟಕ್ಕೆ ಹೆಸರು ವಾಸಿಯಾದ ಪಾಪಣ್ಣ ಮಟನ್ ಸ್ಟಾಲ್ ಮುಂದೆ ಬೆಳ್ಳಂ ಬೆಳಗ್ಗೆಯೇ ಕ್ಯೂ ಕಂಡುಬಂದಿತ್ತು. ಭಾನುವಾರವಾದ ಕಾರಣ ಮಟನ್ ಖರೀದಿಗೆ ಜನರು ಸೇರಿದ್ದರು. ಲಾಕ್‌ಡೌನ್ ಕಾರಣ ಬೆಳಗ್ಗೆ 6-10 ರ ವರೆಗೆ ಅವಕಾಶವಿರುವ ಹಿನ್ನೆಲೆಯಲ್ಲಿ 9:30 ಕ್ಕೆ ಮಾರಾಟ ಸ್ಥಗಿತ ಮಾಡಬೇಕಾಗಿದ್ದು, ಹೀಗಾಗಿ ಬೆಳಗ್ಗೆ 5 ಗಂಟೆಯಿಂದಲೇ ಜನ ಕ್ಯೂ ನಿಂತಿದ್ದರು.
ರಸೆಲ್ ಮಾರ್ಕೆಟ್‌ನಲ್ಲಿ ಜನಸಂದಣಿ:
ರಸೆಲ್ ಮಾರ್ಕೆಟ್‌ನಲ್ಲಿ ಭಾರಿ ಜನ ಸೇರಿ ಹೆಚ್ಚಿನ ವಾಹನ ಓಡಾಟದಿಂದ ಶಿವಾಜಿನಗರ ಸರ್ಕಲ್ನಲ್ಲಿ ಟ್ರಾಫಿಕ್ ಜಾಮ್ ಉಂಟಾಗಿತ್ತು. 10 ಗಂಟೆಗೂ ನಿಲ್ಲದ ಜನರ ಓಡಾಟ:
ಶಿವಾಜಿನಗರದಲ್ಲಿ ಅಗತ್ಯ ವಸ್ತು ಖರೀದಿಗೆ ಕೊನೆ ಕ್ಷಣದವರೆಗೂ ಜನರ ಓಡಾಟ ಕಂಡುಬಂತು. 10 ಗಂಟೆಯಾದರೂ ಚಿಕನ್,ಮಟನ್ ಅಂಗಡಿ ಮುಂದೆ ಕ್ಯೂ ಕಡಿಮೆ ಆಗಿರಲಿಲ್ಲ. ಶಿವಾಜಿನಗರ ಸರ್ಕಲ್ ಸೇರಿದಂತೆ ಹಲವೆಡೆ ಟ್ರಾಫಿಕ್ ಜಾಮ್ ಉಂಟಾಗಿ, ಟ್ರಾಫಿಕ್ ಕ್ಲಿಯರ್ ಮಾಡಲು ಪೊಲೀಸರು ಹರಸಾಹಸ ಪಡಬೇಕಾಯಿತು. ಸರ್ಕಲ್ ಸುತ್ತ ಮುತ್ತ ಬಿಬಿಎಂಪಿ ಕಾಮಗಾರಿ ಕೂಡ ನಡೆಯುತ್ತಿದ್ದರಿಂದ ವಾಹನ ಓಡಾಟಕ್ಕೆ ಮತ್ತಷ್ಟು ಅಡಚಣೆಯುಂಟಾಗಿತ್ತು.
ಇದನ್ನೂ ಓದಿ: ಇನ್ನೆರಡು ದಿನಗಳಲ್ಲಿ ಎರಡನೇ ಹಂತದ ಪರಿಹಾರ ಪ್ಯಾಕೇಜ್ ಘೋಷಣೆ: ಸಿಎಂ
