ಸಾಲ ಕೊಟ್ಟು ಪ್ರಾಣ ಕಳೆದುಕೊಂಡ ಸ್ನೇಹಿತ: ಹಣ ಕೇಳಿದಕ್ಕೆ ಗೆಳೆಯನಿಗೆ ಮುಹೂರ್ತವಿಟ್ಟ ಪಾಪಿಗಳು

ಕಳೆದ ರಾತ್ರಿ ರವಿಕುಮಾರ್ ಎಮ್​​ಎಸ್​ಪಿಪಿ ಬಡಾವಣೆಯಲ್ಲಿ ವಾಕಿಂಗ್ ಮಾಡುತ್ತಿರುವ ಸಮಯದಲ್ಲಿ ಮಧುಸೂಧನ್ ಸ್ನೇಹಿತರ ಜೊತೆ ಸೇರಿ ಕೊಲೆ ಮಾಡಿದ್ದಾನೆ.

ನೆಲಮಂಗಲ: ಕೊಟ್ಟ ಸಾಲ ಕೇಳಿದ್ದಕ್ಕೆ ಸ್ನೇಹಿತನನ್ನು ಕೊಲೆ ಮಾಡಿರುವ ಘಟನೆ ಬೆಂಗಳೂರು ಉತ್ತರ ತಾಲೂಕು ಸೊಲದೇವನಹಳ್ಳಿಯ ಎಮ್​ಎಸ್​ಪಿಪಿ ಬಡಾವಣೆಯಲ್ಲಿ ನಡೆದಿದೆ. ಸೊಲದೇವನಹಳ್ಳಿ ನಿವಾಸಿ ರವಿಕುಮಾರ್ ಸ್ನೇಹಿತನಿಂದಲೇ ಹತ್ಯೆಯಾದ ದುರ್ದೈವಿ.

ಈ ಕೊಲೆ ಪ್ರಕರಣಕ್ಕೆ ಸಂಬಂಧಿಸಿದಂತೆ ಮೂವರು ಆರೋಪಿಗಳನ್ನ ಸೊಲದೇವನಹಳ್ಳಿ ಪೊಲೀಸರು ಬಂಧಿಸಿದ್ದಾರೆ. ಮೃತ ರವಿಕುಮಾರ್ ಸಣ್ಣಪುಟ್ಟ ಹಣಕಾಸಿನ ವ್ಯವಹಾರ ಮಾಡುತ್ತಿದ್ದ, ಸ್ನೇಹಿತನೇ ಆಗಿದ್ದ ಮಧುಸೂಧನ್ ಅಲಿಯಾಸ್ ಚಿತಾಲಿಗೆ ಒಂದೂವರೆ ವರ್ಷದ ಹಿಂದೆ 1 ಲಕ್ಷ ರೂ. ಕೊಟ್ಟಿದ್ದನಂತೆ. ಈ ಹಣ ವಾಪಸ್ ಕೇಳಿದಾಗ ಹಣ ಕೊಡಲು ಮಧುಸೂಧನ್ ನಿರಾಕರಿಸಿದ್ದನಂತೆ. ಇದು ಇಬ್ಬರ ವೈಮನಸಿಗೆ ಕಾರಣವಾಗಿತ್ತು.

ಈ ವಿಷಯ ಮಧುಸೂಧನ್ ಮನೆಯವರೆಗೂ ತಲುಪಿ ಆತನ ತಂದೆ, ಹಣ ಕೊಡುವುದಾಗಿ ಹೇಳಿದ್ದರಂತೆ. ಹಣ ವಾಪಸ್ ಕೇಳಿದಕ್ಕೆ ಸುಖಾಸುಮ್ಮನೆ ಖ್ಯಾತೆ ತೆಗೆದು ರವಿಕುಮಾರ್ ನನ್ನ ಮಧುಸೂಧನ್ ಕೆರಳಿಸುತ್ತಿದ್ದನಂತೆ. ಕಳೆದ ರಾತ್ರಿ ರವಿಕುಮಾರ್ ಎಮ್​​ಎಸ್ ಪಿಪಿ ಬಡಾವಣೆಯಲ್ಲಿ ವಾಕಿಂಗ್ ಮಾಡುತ್ತಿರುವ ಸಮಯದಲ್ಲಿ ಮಧುಸೂಧನ್ ಸ್ನೇಹಿತರಾದ ಶಂಕರ್ ಅಲಿಯಾಸ್ ಸುನಾಮಿ, ಪ್ರದೀಪ್ ಅಲಿಯಾಸ್ ಪ್ಲಾಸ್ಟಿಕ್ ಸೇರಿದಂತೆ 5 ಜನರು ಸೇರಿ ರವಿಕುಮಾರ್ ನನ್ನ ಮಾರಾಕಾಸ್ತ್ರದಿಂದ ಕೊಚ್ಚಿ ಕೊಲೆ ಮಾಡಿದ್ದಾರೆ.

ಈ ಕುರಿತು ಸೊಲದೇವನಹಳ್ಳಿ ಪೊಲೀಸ್ ಠಾಣೆಯಲ್ಲಿ ಕೊಲೆ ಪ್ರಕರಣ ದಾಖಲಾಗಿದ್ದು, ಮೂವರು ಆರೋಪಿಗಳನ್ನ ಪೊಲೀಸರು ಬಂಧಿಸಿದ್ದಾರೆ.