ದೇವನಹಳ್ಳಿ: ಯಲಹಂಕದ ಏರ್ಫೋರ್ಸ್ ಸ್ಟೇಷನ್ನಲ್ಲಿ ಫೆಬ್ರವರಿ 3ರಿಂದ 5ರವರೆಗೆ ಏರೋ ಇಂಡಿಯಾ-2021 ನಡೆಯುವ ಹಿನ್ನೆಲೆ ಸನಿಹವೇ ಇರುವ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಭಾಗಶಃ ಬಂದ್ ಆಗಲಿದೆ.
ಯಲಹಂಕದ ಏರ್ ಫೋರ್ಸ್ ಸ್ಟೇಷನ್ನಿಂದ ಕೆಲವೇ ಕಿ.ಮೀ ಅಂತರದಲ್ಲಿ ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವಿದೆ. ಏರ್ ಶೋ ನಡೆಯುವ ಮತ್ತು ಪೂರ್ವಾಭ್ಯಾಸದ ಸಮಯದಲ್ಲಿ ಎರಡು ಕಡೆಯಿಂದ ನಡೆಯುವ ವಿಮಾನಗಳ ಹಾರಾಟ ಅಪಾಯಕ್ಕೆ ಕಾರಣವಾಗುತ್ತದೆ. ಈ ಹಿನ್ನೆಲೆ ಏರೋ ಇಂಡಿಯಾ 2021ನ್ನು ಸುರಕ್ಷಿತ ಮತ್ತು ಯಶಸ್ವಿ ಮಾಡುವ ಕಾರಣಕ್ಕೆ ಕೆಂಪೇಗೌಡ ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣ ಭಾಗಶಃ ಬಂದ್ ಮಾಡಲಾಗುತ್ತಿದೆ.
ಜನವರಿ 30 ಮತ್ತು 31ರಂದು ಏರ್ಫೋರ್ಸ್ನಲ್ಲಿ ಪೂರ್ವಭ್ಯಾಸ ನಡೆಯುವ ಹಿನ್ನೆಲೆ ಮಧ್ಯಾಹ್ನ 01:30ರಿಂದ 04:30ವರೆಗೆ ಕೆಐಎಎಲ್ ರನ್ ವೇ ಬಂದ್ ಆಗಲಿದೆ. ಫೆಬ್ರವರಿ 1ರಂದು ಏರ್ಫೋರ್ಸ್ನಲ್ಲಿ ನಡೆಯುವ ಪೂರ್ವಭ್ಯಾಸದ ಹಿನ್ನೆಲೆ ಬೆಳಗ್ಗೆ 10:00ರಿಂದ 12:00 ಮತ್ತು ಮಧ್ಯಾಹ್ನ 02:00ರಿಂದ 05:00ರವರೆಗೂ ಕೆಐಎಎಲ್ ರನ್ ವೇ ಬಂದ್ ಆಗಲಿದೆ.
ಫೆಬ್ರವರಿ 2 ಮತ್ತು 3ರಂದು ಏರೋ ಇಂಡಿಯಾ 2021ರ ಉದ್ಘಾಟನಾ ಕಾರ್ಯಕ್ರಮ ಮತ್ತು ವೈಜ್ಞಾನಿಕ ಪ್ರದರ್ಶನ ಇರುವುದರಿಂದ ಬೆಳಗ್ಗೆ 09:00ರಿಂದ 12:00 ಮತ್ತು ಮಧ್ಯಾಹ್ನ 02:00ರಿಂದ 05:00ವರೆಗೂ ಕೆಐಎಎಲ್ ರನ್ ವೇ ಬಂದ್ ಆಗಿರಲಿದೆ.
ಫೆಬ್ರವರಿ 4 ಮತ್ತು 5ರಂದು ಏರೋ ಇಂಡಿಯಾ ಕಾರ್ಯಕ್ರಮ ಇರುವುದರಿಂದ ಬೆಳಗ್ಗೆ 10:00 12:00 ಮತ್ತು ಮಧ್ಯಾಹ್ನ 02:00ರಿಂದ 05:00ವರೆಗೂ ಕೆಐಎಎಲ್ ರನ್ ವೇ ಕಾರ್ಯ ಸ್ಥಗಿತಗೊಂಡಿರಲಿದೆ.
