ಹೊಸಕೋಟೆ : ಬಾರ್ ಮುಂದೆ ಕಬಾಬ್ ತೆಗೆದುಕೊಳ್ಳಲು ಹೋದಾಗ ಕುಡಿದ ಮತ್ತಿನಲ್ಲಿ ಯುವಕನ ತಲೆಗೆ ಬಿಯರ್ ಬಾಟಲ್ನಿಂದ ಹೊಡೆದಿದ್ದಲ್ಲದೇ ಬೆನ್ನಿಗೆ ಇರಿದ ಘಟನೆ ಬೆಂಗಳೂರು ಗ್ರಾಮಾಂತರ ಜಿಲ್ಲೆಯ ಹೊಸಕೋಟೆ ತಾಲೂಕಿನ ನಂದಗುಡಿ ಗ್ರಾಮದಲ್ಲಿ ನಡೆದಿದೆ. ಆದರೆ, ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ.
ಹೊಸಕೋಟೆ ತಾಲೂಕಿನ ನಂದಗುಡಿ ಗ್ರಾಮದ ಪಲ್ಲವಿ ಬಾರ್ ಬಳಿ ನ.26ರ ರಾತ್ರಿ ಈ ಘಟನೆ ನಡೆದಿದೆ. ಆನಂದ್ ಎಂಬಾತ ಗಾಯಗೊಂಡ ಯುವಕ. ಆನಂದ್ ಕಬಾಬ್ ತೆಗೆದುಕೊಳ್ಳಲು ಹೋದಾಗ ನಂದಗುಡಿ ಗ್ರಾಮದ ರೋಹನ್, ಮಧು, ಚಂದನ್ ಸೇರಿದಂತೆ ಇನ್ನೂ 5 ಜನರು ಆನಂದ್ನನ್ನು ಅವಾಚ್ಯ ಪದಗಳಿಂದ ನಿಂದಿಸಿದ್ದಾರೆ. ಈ ವೇಳೆ ಇಬ್ಬರ ನಡುವೆ ಮಾತಿನ ಚಕಮಕಿ ನಡೆದಿದೆ.
ವಾಗ್ವಾದ ವಿಕೋಪಕ್ಕೆ ತಿರುಗಿ ಕುಡಿದ ಮತ್ತಿನಲ್ಲಿದ್ದ ಐವರ ಗುಂಪು ಆನಂದ್ ಮೇಲೆ ಹಲ್ಲೆ ನಡೆಸಿದ್ದಾರೆ. ಅಲ್ಲದೇ ಬಿಯರ್ ಬಾಟಲ್ನಿಂದ ತಲೆಗೆ ಹೊಡಿದಿದ್ದಾರೆ. ಇಷ್ಟಕ್ಕೆ ಬಿಡದ ಪುಂಡರು ಅದೇ ಬಾಟಲಿಯಿಂದ ಆನಂದ್ನ ಬೆನ್ನಿಗೆ ತಿವಿದಿದ್ದಾರೆ. ಈ ದೃಶ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದೆ. ಗಾಯಗೊಂಡ ಆನಂದ್ನನ್ನು ಹೊಸಕೋಟೆ ಎಂವಿಜೆ ಆಸ್ಪತ್ರೆಗೆ ದಾಖಲಿಸಲಾಗಿದೆ.
ಇದನ್ನೂ ಓದಿ: 'SEX' ನಂಬರ್ ಪ್ಲೇಟ್ನಿಂದಾಗಿ ಮುಜುಗರ.. ಇದರ ಸಹವಾಸವೇ ಸಾಕೆಂದು ಸ್ಕೂಟಿ ಮೂಲೆಗಿಟ್ಟ ಯುವತಿ!
ಹಲ್ಲೆ ಮಾಡಿದ ರೋಹನ್, ಮಧು, ಚಂದನ್ ಮತ್ತಿತರರ ವಿರುದ್ಧ ನಂದಗುಡಿ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ನಾಪತ್ತೆಯಾದ ಆರೋಪಿಗಳಿಗಾಗಿ ಪೊಲೀಸರು ಹುಡುಕಾಟ ನಡೆಸಿದ್ದಾರೆ.
