ಬಾಗಲಕೋಟೆ: ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ವತಿಯಿಂದ ಪಿ.ಬಿ.ಧುತ್ತರಗಿ ಟ್ರಸ್ಟ್ ಹಮ್ಮಿಕೊಂಡಿದ್ದ 2020ನೇ ಸಾಲಿನ ಪ್ರಶಸ್ತಿ ಪ್ರದಾನ ಸಮಾರಂಭಗಳಲ್ಲಿ ನಾಟಕಗಳ ಡೈಲಾಗ್ ಹೇಳಿ ಹಿರಿಯ ಕಲಾವಿದರು ಗಮನ ಸೆಳೆದರು.
ಜಿಲ್ಲಾಡಳಿತ ಭವನದ ಕಚೇರಿಯು ರಂಗಭೂಮಿ ವೇದಿಕೆಯಾಗಿ ಪರಿವರ್ತನೆಗೊಂಡು, ಹಿರಿಯ ಕಲಾವಿದರು ಡೈಲಾಗ್ ಹೇಳುವ ಮೂಲಕ ನಾಟಕದ ಝಲಕ್ ಪ್ರದರ್ಶನ ಮಾಡಿದರು. ಕೊರೊನಾ ಹಿನ್ನೆಲೆ ಸರಳವಾಗಿ ಪ್ರಶಸ್ತಿ ಪ್ರದಾನ ಸಮಾರಂಭ ನಡೆಸಲಾಯಿತು. ಜಿಲ್ಲಾಧಿಕಾರಿ ಡಾ. ಕೆ.ರಾಜೇಂದ್ರ ಸಮಾರಂಭಕ್ಕೆ ಚಾಲನೆ ನೀಡಿದರು. ಹಲವು ವರ್ಷಗಳಿಂದ ಸೇವೆ ಸಲ್ಲಿಸಿದ ಕಲಾವಿದರಿಗೆ ಪ್ರಶಸ್ತಿ ನೀಡುವ ಮೂಲಕ ಗೌರವ ಸಲ್ಲಿಸಲಾಯಿತು.
ನಾಟಕ ಕಲಾವಿದರಾದ ವಿಜಯಪುರದ ಗುರುಪಾದಪ್ಪ ಶಿವಪ್ಪ ಕಾಳಗಿ, ಬೆಂಗಳೂರಿನ ಶ್ರೀಮತಿ ಡಿ.ಲಲಿತಮ್ಮ, ಹಂಸನೂರ ಗ್ರಾಮದ ವೀರಣ್ಣ ಸಂಗಪ್ಪ ಅಂಗಡಿ, ಹುಬ್ಬಳ್ಳಿಯ ರಾಮಚಂದ್ರ ಗಣಪತಿಸಾ ಹಬೀಬ, ಬನಹಟ್ಟಿಯ ಶ್ರೀಮತಿ ಸತ್ಯವ್ವ ಮಾದರ ಹಾಗೂ ಈರಪ್ಪ ಮಡಿವಾಳಪ್ಪ ಮುರಡಿ ಎಂಬುವವರಿಗೆ 2020ನೇ ಸಾಲಿನ ಧುತ್ತರಗಿ ಪ್ರಶಸ್ತಿ ಫಲಕ, ಗೌರವಧನ ನೀಡಿ ಸನ್ಮಾನಿಸಲಾಯಿತು.
