ಬಾಗಲಕೋಟೆ: ಅಡಿಟ್ ಆಫೀಸರ್ ಎಂದುಕೊಂಡು ಜ್ಯುವೆಲ್ಲರಿ ಶಾಪ್ಗೆ ಹೋಗಿ ಚಿನ್ನಾಭರಣ ದೋಚಿಕೊಂಡು ಪರಾರಿಯಾಗಿದ್ದ ಆರೋಪಿಯನ್ನು ಬಾಗಲಕೋಟೆ ಪೊಲೀಸರು ಬಂಧಿಸುವಲ್ಲಿ ಯಶಸ್ವಿಯಾಗಿದ್ದಾರೆ.
ಕಳೆದ ವರ್ಷ 2020 ರ ಅಗಸ್ಟ್ 30 ರಂದು ವಿದ್ಯಾಗಿರಿಯಲ್ಲಿರುವ ಶ್ರೀನಿಧಿ ಜ್ಯುವೆಲ್ಲರಿ ಅಂಗಡಿಗೆ ಪ್ರಶಾಂತ ಟಿ.ಎಸ್ ಎಂಬಾತ ತಾನು ಆಡಿಟ್ ಆಫೀಸರ್ ಎಂದು ಹೇಳಿಕೊಂಡು ಸುಮಾರು 218 ಗ್ರಾಂ ತೂಕದ 10.90 ಲಕ್ಷ ರೂ. ಮೌಲ್ಯದ ಚಿನ್ನಾಭರಣ ದೋಚಿಕೊಂಡು ಪರಾರಿಯಾಗಿದ್ದನು.
ಈ ಕುರಿತು ಶ್ರೀನಿಧಿ ಜ್ಯುವೆಲ್ಲರಿ ಮಾಲೀಕರಾದ ಸಂತೋಷ ರಾಯ್ಕರ ಎಂಬುವರು ನವನಗರ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದರು. ಆರೋಪಿ ಪತ್ತೆಗಾಗಿ ಸಕಲೇಶಪುರ, ಬೆಂಗಳೂರು, ಕುಣಿಗಲ್, ರಾಜನುಕುಂಟೆ ಹಾಗೂ ಗೌರಿಬಿದನೂರು ಸೇರಿದಂತೆ ಹಲವೆಡೆ ಪೊಲೀಸರು ಶೋಧ ನಡೆಸಿದ್ದರು. ಕೊನೆಗೆ ಆರೋಪಿ ಹುಬ್ಬಳ್ಳಿಯ ಅಯೋಧ್ಯಾ ಹೊಟೇಲ್ನಲ್ಲಿರುವ ಬಗ್ಗೆ ಮಾಹಿತಿ ಲಭ್ಯವಾದ ಹಿನ್ನೆಲೆ ಪೊಲೀಸರು ದಾಳಿ ನಡೆಸಿ, ಆರೋಪಿ ಪ್ರಶಾಂತ ಟಿ.ಎಸ್ ಬಂಧಿಸಿದ್ದಾರೆ. ಬಂಧಿತನಿಂದ 218 ಗ್ರಾಂ ಚಿನ್ನಾಭರಣ ಹಾಗೂ 1,800 ನಗದನ್ನು ಜಪ್ತಿ ಮಾಡಿಕೊಳ್ಳಲಾಗಿದೆ.
