ಟೋಕಿಯೋ: ಒಲಿಂಪಿಕ್ಸ್ನಲ್ಲಿ ಭಾರತ ತಂಡ ಬರೋಬ್ಬರಿ 41 ವರ್ಷಗಳ ಬಳಿಕ ಪದಕ ಸಾಧನೆ ಮಾಡಿದೆ. ಗುರುವಾರ ನಡೆದ ಕಂಚಿನ ಪದಕದ ಪಂದ್ಯದಲ್ಲಿ ಹಿನ್ನಡೆಯ ಹೊರತಾಗಿಯೂ ಅದ್ಭುತವಾಗಿ ತಿರುಗಿ ಬಿದ್ದು ಜರ್ಮನಿಯ ವಿರುದ್ಧ 5-4ರಲ್ಲಿ ಗೆಲುವು ಸಾಧಿಸಿದೆ. ಈ ಐತಿಹಾಸಿಕ ಸಾಧನೆಯನ್ನು ನಾಯಕ ಮನ್ಪ್ರೀತ್ ಸಿಂಗ್ ಕೋವಿಡ್ 19 ಸಾಂಕ್ರಾಮಿಕ ಕಾಲದಲ್ಲಿ ದುಡಿದ ವೈದ್ಯರು, ಆರೋಗ್ಯ ಇಲಾಖೆಯ ಕಾರ್ಯಕರ್ತರಿಗೆ ಅರ್ಪಿಸಿದ್ದಾರೆ.
ಭಾರತದ ರಾಷ್ಟ್ರೀಯ ಕ್ರೀಡೆ ಎಂದೆನಿಸಿಕೊಂಡಿದರೂ, 1980ರ ನಂತರ ಭಾರತ ತಂಡ ಸೆಮಿಫೈನಲ್ ಕೂಡ ಪ್ರವೇಶಿಸಲು ಸಾಧ್ಯವಾಗಿರಲಿಲ್ಲ. ದುರಂತ ಎಂದರೆ 2008ರ ಬೀಜಿಂಗ್ ಒಲಿಂಪಿಕ್ಸ್ಗೆ ಅರ್ಹತೆ ಪಡೆದುಕೊಳ್ಳುವಲ್ಲಿ ಕೂಡ ವಿಫಲವಾಗಿತ್ತು.
ಆದರೆ 2012ರ ನಂತರ ಹಂತ ಹಂತವಾಗಿ ಭಾರತ ತಂಡ ಬಲಿಷ್ಠವಾಗುತ್ತಾ ಬಂದು ಕೊನೆಗೆ ಟೋಕಿಯೋದಲ್ಲಿ ಪದಕಕ್ಕೆ ಮುತ್ತಿಕ್ಕಿದೆ. ಅದರಲ್ಲೂ ಆಸ್ಟ್ರೇಲಿಯಾ ವಿರುದ್ಧ 1-7ರ ಹಂತದಲ್ಲಿ ಸೋತರೂ ಎದೆಗುಂದದೇ ಮತ್ತೆ ಪುಟಿದೆದ್ದದ್ದು ಮಾತ್ರ ಎಂದಿಗೂ ಮರೆಯಲಾಗದ ಸಂಗತಿ.
ಜರ್ಮನಿ ವಿರುದ್ಧ ಪಂದ್ಯ ಗೆದ್ದ ನಂತರ ತಮ್ಮ ಸಂಭ್ರಮ ಹಂಚಿಕೊಳ್ಳುವ ಸಂದರ್ಭದಲ್ಲಿ ಮನ್ಪ್ರೀತ್ ಮಾತೇ ಹೊರಡದೇ ಮೂಕ ವಿಸ್ಮಿತರಾಗಿದ್ದರು. ಇದು ಭಾರತ ತಂಡ ಒಲಿಂಪಿಕ್ಸ್ ಇತಿಹಾಸದಲ್ಲಿ ಪಡೆದ 12ನೇ ಹಾಕಿ ಪದಕವಾಗಿದೆ. 1980ರಲ್ಲಿ ಮಾಸ್ಕೋ ಒಲಿಂಪಿಕ್ಸ್ನಲ್ಲಿ ಭಾರತ ಕೊನೆಯ ಬಾರಿ ಚಿನ್ನಕ್ಕೆ ಮುತ್ತಿಕ್ಕಿತ್ತು.
