ಲಂಡನ್: ಜಪಾನ್ನ ಟೆನ್ನಿಸ್ ಆಟಗಾರ್ತಿ ನವೋಮಿ ಒಸಾಕ ಅಮೆರಿಕದ ಸೆರೆನಾ ವಿಲಿಯಮ್ಸ್ರನ್ನು ಹಿಂದಿಕ್ಕಿ ವಿಶ್ವದಲ್ಲಿ ಅತಿ ಹೆಚ್ಚು ಶ್ರೀಮಂತ ಮಹಿಳಾ ಕ್ರೀಡಾಪಟು ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ.
ಫೋರ್ಬ್ಸ್ ಮ್ಯಾಗಜೀನ್ ಪ್ರಕಾರ ಒಸಾಕ ಕಳೆದ 12 ತಿಂಗಳಲ್ಲಿ ಬಹುಮಾನ ಮೊತ್ತ ಹಾಗೂ ಜಾಹೀರಾತುಗಳಿಂದ 37.4 ಮಿಲಿಯನ್ ಅಮೆರಿಕನ್ ಡಾಲರ್ ಸಂಪಾದಿಸುವ ಮೂಲಕ ವಿಲಿಯಮ್ಸ್ರನ್ನು ಹಿಂದಿಕ್ಕಿದ್ದಾರೆ. ಒಸಾಕಾ ವಿಲಿಯಮ್ಸ್ಗಿಂತ ಈ 1.4 ಮಿಲಿಯನ್ ಯುಎಸ್ಡಿ ಹೆಚ್ಚು ಸಂಪಾದಿಸಿದ್ದಾರೆ.
ಇನ್ನು ಒಂದು ವರ್ಷದ ಅವಧಿಯಲ್ಲಿ ಅತಿ ಹೆಚ್ಚು ಸಂಪಾದಿಸಿದ ಮಹಿಳಾ ಕ್ರೀಡಾಪಟು ಎಂಬ ದಾಖಲೆಗೂ ಪಾತ್ರರಾಗಿದ್ದಾರೆ. ಈ ಹಿಂದೆ ರಷ್ಯಾದ ಮರಿಯಾ ಶರಪೋವಾ 2015ರಲ್ಲಿ 29.7 ಮಿಲಿಯನ್ ಡಾಲರ್ ಸಂಪಾದಿಸುವ ಮೂಲಕ ದಾಖಲೆ ಬರೆದಿದ್ದರು.
ಪೋರ್ಬ್ಸ್ 1990ರಿಂದ ಪ್ರತಿ ವರ್ಷ ಮಹಿಳಾ ಕ್ರೀಡಾಪಟುಗಳ ಆದಾಯವನ್ನು ಟ್ರ್ಯಾಕಿಂಗ್ ಮಾಡುತ್ತಿದೆ. ಇದರಲ್ಲಿ ಪ್ರತಿ ವರ್ಷವೂ ಟೆನಿಸ್ ಆಟಗಾರ್ತಿಯರೇ ಮೊದಲ ಸ್ಥಾನ ಪಡೆಯುತ್ತಿದ್ದಾರೆ.
ಎರಡು ಬಾರಿಯ ಗ್ರ್ಯಾಂಡ್ಸ್ಲಾಮ್ ಚಾಂಪಿಯನ್ ಆಗಿರುವ ಒಸಾಕ 2020ರ ಅತಿ ಹೆಚ್ಚು ಆದಾಯ ಗಳಿಸಿರುವ ಒಟ್ಟಾರೆ ಪಟ್ಟಿಯಲ್ಲಿ 27 ನೇ ಸ್ಥಾನದಲ್ಲಿದ್ದಾರೆ. ಸೆರೆನಾ ವಿಲಿಯಮ್ಸ್ 37 ನೇ ಸ್ಥಾನದಲ್ಲಿದ್ದಾರೆ.
