ಮೆಲ್ಬೋರ್ನ್ : ದಾಖಲೆಯ 20 ಗ್ರ್ಯಾಂಡ್ಸ್ಲಾಮ್ ಪ್ರಶಸ್ತಿಯ ಒಡೆಯ ರಾಫೆಲ್ ನಡಾಲ್ ಆಘಾತಕಾರಿ ಸೋಲುಣಿಸಿರುವ ಗ್ರೀಕ್ ಆಟಗಾರ ಸ್ಟೆಫಾನೋಸ್‌ ಸಿಟ್ಸಿಪಾಸ್ ಆಸ್ಟ್ರೇಲಿಯನ್ ಓಪನ್ ಸೆಮಿಫೈನಲ್ ಪ್ರವೇಶಿಸಿದ್ದಾರೆ.
ಮೆಲ್ಬೋರ್ನ್ನ ರಾಡ್ ಲೇವರ್ ಅರೇನಾದಲ್ಲಿ ನಡೆದ 4ನೇ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 2ನೇ ಶ್ರೇಯಾಂಕದ ಸ್ಪೇನಿನ ಸ್ಟಾರ್ ಆಟಗಾರ ನಡಾಲ್ ವಿರುದ್ಧ 22 ವರ್ಷದ ಸಿಟ್ಸಿಪಾಸ್ 3-6,2-6,7(7)-6(4), 6-4,7-5ರಲ್ಲಿ ಮಣಿಸಿ ಸೆಮಿಫೈನಲ್ ಪ್ರವೇಶಿಸಿದರು.
ಮೊದಲೆರಡು ಸೆಟ್ಗಳಲ್ಲಿ ಸೋಲು ಕಂಡ ಯುವ ಆಟಗಾರ ಅನುಭವಿ ನಡಾಲ್ ವಿರುದ್ಧ ಅದ್ಭುತವಾಗಿ ತಿರುಗಿ ಬಿದ್ದು ಮುಂದಿನ 3 ಸೆಟ್ಗಳಲ್ಲಿ ಗೆಲುವು ಸಾಧಿಸಿ ವೃತ್ತಿ ಜೀವನದ 3ನೇ ಗ್ರ್ಯಾಂಡ್ಸ್ಲಾಮ್ ಸೆಮಿಫೈನಲ್ ಪ್ರವೇಶಿಸಿದರು. ಅವರು ಈ ಹಿಂದೆ 2019ರಲ್ಲಿ ಆಸ್ಟ್ರೇಲಿಯನ್ ಓಪನ್ ಮತ್ತು 2020ರಲ್ಲಿ ಫ್ರೆಂಚ್ ಓಪನ್‌ನಲ್ಲಿ ಸೆಮಿಫೈನಲ್ ಪ್ರವೇಶಿಸಿದ್ದರು.
'ಈ ಸಂತಸ ವರ್ಣಿಸಲು ನನ್ನ ಬಳಿ ಪದಗಳಿಲ್ಲ. ಇದು ನಂಬಲಾಸಾಧ್ಯವಾದ ಭಾವನೆಯಾಗಿದೆ. ನಾನು ಬಹಳ ಒತ್ತಡದಿಂದ ಆರಂಭಿಸಿದೆ. ಆದರೆ, 2 ಸೆಟ್ಗಳ ನಂತರ ಏನಾಯಿತು ಎಂದು ನನಗೆ ಗೊತ್ತಿಲ್ಲ. ನಾನು ಪುಟ್ಟ ಪಕ್ಷಿಯಂತೆ ಹಾರಾಡುತ್ತಿದ್ದೇನೆ. ನಾನಂದು ಕೊಂಡಿದ್ದೆಲ್ಲ ಕೆಲಸ ಮಾಡಿದೆ. ಈ ಭಾವನೆ ಅದ್ಭುತ' ಎಂದು ಪಂದ್ಯದ ನಂತರ ತಿಳಿಸಿದ್ದಾರೆ.
ಸ್ಟೆಫಾನೋಸ್‌ ಸಿಟ್ಸಿಪಾಸ್ ಸೆಮಿಫೈನಲ್ ಪಂದ್ಯದಲ್ಲಿ ರಷ್ಯಾದ ಡೇನಿಲ್ ಮಡ್ವಡೆವ್ ವಿರುದ್ಧ ಶುಕ್ರವಾರ ಕಾದಾಡಲಿದ್ದಾರೆ. ಮಡ್ವಡೆವ್ ಇಂದು ಬೆಳಗ್ಗೆ ನಡೆದಿದ್ದ ಪಂದ್ಯದಲ್ಲಿ ರಷ್ಯಾದವರೆ ಆದ ಆ್ಯಂಡ್ರ್ಯೂ ರುಬ್ಲೆವ್ ವಿರುದ್ಧ ಗೆದ್ದಿದ್ದರು.
ಇದನ್ನು ಓದಿ:ತಮ್ಮ ದೇಶದ ಆಟಗಾರನನ್ನು ಮಣಿಸಿ ಆಸ್ಟ್ರೇಲಿಯನ್ ಓಪನ್ ಸೆಮಿಫೈನಲ್ ಪ್ರವೇಶಿಸಿದ ಮಡ್ವಡೆವ್
