ನ್ಯೂಯಾರ್ಕ್: ವಿಶ್ವದಾಖಲೆಯ 24ನೇ ಗ್ರ್ಯಾಂಡ್ ಸ್ಲಾಮ್ ಮೇಲೆ ಕಣ್ಣಿಟ್ಟಿರುವ ಅಮೆರಿಕದ ಸೆರೆನಾ ವಿಲಿಯಮ್ಸ್ ತಮ್ಮ ಮೊದಲ ಸುತ್ತಿನ ಪಂದ್ಯದಲ್ಲಿ ಜಯಶಾಲಿಯಾಗಿದ್ದಾರೆ.
ಸೆರೆನಾ ಅಮೆರಿಕದವರೇ ಆದ ಕ್ರಿಸ್ಟಿ ಆನ್ ವಿರುದ್ಧ 7-5, 6-3 ಸೆಟ್ ಜಯ ಸಾಧಿಸಿದರು ಈ ಜಯದ ಮೂಲಕ ಸೆರೆನಾ ಯುಎಸ್ ಓಪನ್ನಲ್ಲಿ 102ನೇ ಗೆಲುವು ಸಾಧಿಸಿ ಕ್ರಿಸ್ ಎವರ್ಟ್ ಅವರ ದಾಖಲೆಯನ್ನು ಮುರಿದರು. ಈ ಪಂದ್ಯದಲ್ಲಿ 13 ಏಸ್ ಸಿಡಿಸಿದ ವಿಲಿಯಮ್ಸ್ ಸರ್ವೀಸ್ನಲ್ಲಿ ಕೇವಲ 6 ಅಂಕಗಳನ್ನು ಮಾತ್ರ ಎದುರಾಳಿಗೆ ಬಿಟ್ಟುಕೊಟ್ಟರು.
ಇದೇ ತಿಂಗಳು 39 ವಯಸ್ಸಿಗೆ ಕಾಲಿಡಲಿರುವ ಸೆರೆನಾ 6 ಬಾರಿ ಯುಎಸ್ ಟ್ರೋಫಿಗಳನ್ನು ಎತ್ತಿ ಹಿಡಿದಿದ್ದಾರೆ. ಅಲ್ಲದೆ ಕಳೆದ ಎರಡು ಬಾರಿ ರನ್ನರ್ ಅಪ್ ಆಗಿರುವ ಅವರು ಈ ವರ್ಷ ಚಾಂಪಿಯನ್ ಆದರೆ ಅತಿ ಹೆಚ್ಚು ಗ್ರ್ಯಾಂಡ್ಸ್ಲಾಮ್ ಗೆದ್ದಿರುವ ಮಾರ್ಗರೆಟ್ ಕೋರ್ಟ್ ಅವರ ದಾಖಲೆಯನ್ನು ಸರಿಗಟ್ಟಲಿದ್ದಾರೆ.
ಸೆರೆನಾ ವಿಲಿಯಮ್ಸ್ ತಮ್ಮ ಮುಂದಿನ ಪಂದ್ಯದಲ್ಲಿ ರಷ್ಯಾದ ಮಾರ್ಗರೆಟ್ ಗ್ಯಾಸ್ಪರ್ಯನ್ ವಿರುದ್ಧ ಸೆಣಸಾಡಲಿದ್ದಾರೆ. ಗ್ಯಾಸ್ಪರ್ಯನ್ ತಮ್ಮ ಮೊದಲ ಸುತ್ತಿನಲ್ಲಿ 6-3, 6-7, 6-0 ರಲ್ಲಿ ಪೋರ್ಟೊ ರಿಕಾದ ಮೊನಿಕಾ ಪುಯಿಗ್ ಅವರನ್ನು ಮಣಿಸಿದ್ದಾರೆ.
