ಪ್ಯಾರಿಸ್: ವಿಶ್ವದ 2ನೇ ಶ್ರೇಯಾಂಕದ ಟೆನಿಸ್ ಪ್ಲೇಯರ್ ರಾಫೆಲ್ ನಡಾಲ್ ಫ್ರೆಂಚ್ ಓಪನ್ನ ಕ್ವಾರ್ಟರ್ ಫೈನಲ್ನಲ್ಲಿ ಗೆದ್ದು 13ನೇ ಬಾರಿಗೆ ಸೆಮಿಫೈನಲ್ ಪ್ರವೇಶಿಸಿದ್ದಾರೆ.
12 ಬಾರಿ ಚಾಂಪಿಯನ್ ಆಗಿರುವ ನಡಾಲ್ ರೊಲ್ಯಾಂಡ್ ಗ್ಯಾರೋಸ್ನಲ್ಲಿ ನಡೆದ ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ 19 ವರ್ಷದ ಜನ್ನಿಕ್ ಸಿನ್ನರ್ ವಿರುದ್ಧ 7-6(4), 6-4 ಹಾಗೂ 6-1ರಲ್ಲಿ ಮಣಿಸಿ ಸೆಮಿಫೈನಲ್ಗೆ ಪ್ರವೇಶ ಪಡೆದರು.
ಕ್ಲೇ-ಕೋರ್ಟ್ ಗ್ರ್ಯಾಂಡ್ ಸ್ಲ್ಯಾಮ್ ಪಂದ್ಯಾವಳಿಯಲ್ಲಿ ಈ ವರ್ಷ ಕೃತಕ ದೀಪಗಳನ್ನು ಬಳಸಲಾಗುತ್ತಿದೆ. ಹಾಗಾಗಿ ರಾತ್ರಿ ವೇಳೆಯೂ ಸಹ ಪಂದ್ಯಗಳು ನಡೆಯುತ್ತಿವೆ. ಮಂಗಳವಾರ 5 ಪಂದ್ಯಗಳಿದ್ದಿದ್ದರಿಂದ ನಡಾಲ್ ಮತ್ತು ಸಿನ್ನರ್ ನಡುವಿನ ಪಂದ್ಯ ಮಧ್ಯರಾತ್ರಿ 1.30ಕ್ಕೆ ಮುಗಿಯಿತು.
ಸುಲಭ ಜಯ ಸಾಧಿಸಿರುವ ನಡಾಲ್ ಸೆಮಿಫೈನಲ್ನಲ್ಲಿ ಅರ್ಜೆಂಟೀನಾದ ಡಿಗೊ ಸ್ವಾರ್ಟ್ಜಮನ್ ವಿರುದ್ಧ ಸೆಣಸಾಡಲಿದ್ದಾರೆ. ಈ ಪಂದ್ಯದಲ್ಲೂ ನಡಾಲ್ ಗೆಲ್ಲುವ ನೆಚ್ಚಿನ ಆಟಗಾರನಾಗಿದ್ದಾರೆ. ಏಕೆಂದರೆ ಡಿಗೊ ಸ್ವಾರ್ಟ್ಜಮನ್ ವಿರುದ್ಧ ನಡಾಲ್ 9-1 ರಿಂದ ಸೋಲು - ಗೆಲುವಿನ ಅಂತರ ಕಾಪಾಡಿಕೊಂಡಿದ್ದಾರೆ. ಇವರಿಬ್ಬರ ನಡುವಿನ ಪಂದ್ಯ ಶುಕ್ರವಾರ ನಡೆಯಲಿದೆ.
ಇಂದು ಮತ್ತೊಂದು ಕ್ವಾರ್ಟರ್ ಫೈನಲ್ ಪಂದ್ಯದಲ್ಲಿ ವಿಶ್ವದ ನಂಬರ್ ಒನ್ ಆಟಗಾರ ನೊವಾಕ್ ಜೋಕೊವಿಕ್ ಸ್ಪೇನಿನ ಕ್ಯಾರೆನೊ ಬುಸ್ಟಾ ಅವರ ಸವಾಲನ್ನು ಎದುರಿಸಲಿದ್ದಾರೆ.
