ಟೋಕಿಯೋ(ಜಪಾನ್): ಕ್ರೀಡಾ ಗ್ರಾಮದಲ್ಲಿ ಮೂವರು ಸೇರಿದಂತೆ 5 ಆಥ್ಲೀಟ್ಗಳಿಗೆ ಕೋವಿಡ್ 19 ಸೋಂಕು ತಗುಲಿದೆ. ಇದೀಗ ಮಂಗಳವಾರ ಸ್ವಯಂ ಸೇವಕರೊಬ್ಬರಿಗೆ(ಗೇಮ್ಸ್ ವಾಲಂಟೀರ್) ಪಾಸಿಟಿವ್ ದೃಢಪಟ್ಟಿದೆ ಎಂದು ಒಲಿಂಪಿಕ್ ಆಯೋಜಕರು ಇಂದು ಘೋಷಿಸಿದ್ದಾರೆ.
ಸೋಮವಾರದವರೆಗೆ ಐವರು ಅಥ್ಲೀಟ್ಗಳಿಗೆ ಕೋವಿಡ್ 19 ಸೋಂಕು ತಗುಲಿರುವುದಾಗಿ ಮತ್ತು ಅದರಲ್ಲಿ ಮೂವರು ಕ್ರೀಡಾಗ್ರಾಮದಲ್ಲಿ ಇದ್ದರೆಂದು ಆಯೋಜಕರು ತಿಳಿಸಿದ್ದರು. ಇದೀಗ ಇವಾಟೆ ಪ್ರಾಂತ್ಯದ ವಾಲಂಟೀರ್ ಒಬ್ಬರಿಗೆ ಪಾಸಿಟಿವ್ ತಗುಲಿದ್ದು, ಒಟ್ಟಾರೆ ಒಲಿಂಪಿಕ್ಸ್ನಲ್ಲಿ ಇಲ್ಲಿಯವರೆಗೆ ಸೋಂಕಿಗೆ ತುತ್ತಾಗಿರುವವರ ಸಂಖ್ಯೆ 67ಕ್ಕೆ ಏರಿಕೆಯಾಗಿದೆ.
ಸ್ವಯಂ ಸೇವಕರು ವಿಶ್ವ ಒಕ್ಕೂಟದಲ್ಲಿ ನೇರವಾಗಿ ಕಾರ್ಯಾಚರಣೆಗಳಿಗೆ ಒಳಗಾಗಿದ್ದು, ಅವರು ಇವೆಂಟ್ ಆಯೋಜನೆಗೂ ಮುನ್ನ ಮತ್ತು ನಡೆಯುವಾಗ ಅಭಿಮಾನಿಗಳಲ್ಲಿ ಉತ್ಸಾಹವನ್ನುಂಟು ಮಾಡಲು ಮತ್ತು ಆಥ್ಲೀಟ್ಗಳಿಗೆ ನೆರವಾಗುವ ಕಾರ್ಯವನ್ನು ಮಾಡುತ್ತಿರುತ್ತಾರೆ.
ಭಾನುವಾರ ದಕ್ಷಿಣ ಆಫ್ರಿಕಾದ ಫುಟ್ಬಾಲ್ ಆಟಗಾರರಿಬ್ಬರಿಗೆ ಮತ್ತು ವಿಡಿಯೋ ಆನಾಲಿಸ್ಟ್ ಒಬ್ಬರಿಗೆ ಪಾಸಿಟಿವ್ ದೃಢಪಟ್ಟಿತ್ತು. ಸೋಮವಾರ ಜೆಕ್ ಗಣರಾಜ್ಯದ ವಾಲಿಬಾಲ್ ಆಟಗಾರ ಮತ್ತು ಅಮೆರಿಕದ ಜಿಮ್ನಾಸ್ಟ್ ಒಬ್ಬರಿಗೆ ಕೊರೊನಾ ಸೋಂಕು ತಗುಲಿದೆ.
ಟೋಕಿಯೋದಲ್ಲಿ ಮಹಾಕ್ರೀಡಾಕೂಟ ಜುಲೈ 23ರಿಂದ ಆಗಸ್ಟ್ 8ರವರೆಗೆ ನಡೆಯಲಿದೆ. ಸ್ಥಳೀಯರ ವಿರೋಧದ ನಡುವೆ ನಡೆಯುತ್ತಿರುವ ಈ ಕ್ರೀಡಾಕೂಟಕ್ಕೆ ಕೋವಿಡ್ 19 ಸಮಸ್ಯೆಯೊಡ್ಡುತ್ತಿದ್ದು, ಮಾರಕ ಸೋಂಕನ್ನು ಆಯೋಜಕರು ಹೇಗೆ ನಿಯಂತ್ರಿಸಲಿದ್ದಾರೆ ಎಂದು ಕಾದು ನೋಡಬೇಕಿದೆ.
ಇದನ್ನು ಓದಿ:Tokyo Olympics: ಭಾರತೀಯ ಬ್ಯಾಡ್ಮಿಂಟನ್ ಬಗ್ಗೆ ನೀವು ತಿಳಿದುಕೊಳ್ಳಬೇಕಾದ ಪ್ರಮುಖ ವಿಷಯಗಳು..
