ಉಲಾನ್ಬತಾರ್(ಮಂಗೋಲಿಯ): ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಬೆಳ್ಳಿ ಪದಕ ಗೆದ್ದು ದೇಶ ಹೆಮ್ಮ ಪಡುವಂತೆ ಮಾಡಿದ್ದ ರವಿಕುಮಾರ್ ದಹಿಯಾ ಮಂಗೋಲಿಯಾದಲ್ಲಿ ನಡೆಯುತ್ತಿರುವ ಏಷ್ಯನ್ ಕುಸ್ತಿ ಚಾಂಪಿಯನ್ಶಿಪ್ನಲ್ಲಿ ಭಾರತಕ್ಕೆ ಮೊದಲ ಚಿನ್ನದ ಪದಕ ತಂದುಕೊಟ್ಟರು. ಶನಿವಾರ ನಡೆದ ಫೈನಲ್ ಬೌಟ್ನಲ್ಲಿ ಪ್ರಾಬಲ್ಯ ಸಾಧಿಸಿದ ಅವರು, 12-2 ಅಂಕಗಳಿಂದ ಕಜಕಸ್ತಾನದ ಕುಸ್ತಿಪಟು ಕಲ್ಜಾನ್ ರಹತ್ ವಿರುದ್ಧ ಜಯ ಸಾಧಿಸಿದರು. ಇದು ರವಿಕುಮಾರ್ ಏಷ್ಯನ್ ಚಾಂಪಿಯನ್ಶಿಪ್ನಲ್ಲಿ ಗೆದ್ದ ಸತತ ಮೂರನೇ ಚಿನ್ನದ ಪದಕ ಎನ್ನುವುದು ಗಮನಾರ್ಹ.
57 ಕೆಜಿ ವಿಭಾಗದಲ್ಲಿ ದಹಿಯಾ 2020, 2021ರ ಆವೃತ್ತಿಯಲ್ಲೂ ಚಿನ್ನದ ಪದಕ ಗೆದ್ದಿದ್ದರು. ಇದಕ್ಕೂ ಮುನ್ನ ಟೋಕಿಯೋ ಒಲಿಂಪಿಕ್ಸ್ನಲ್ಲಿ ಬೆಳ್ಳಿ ಮತ್ತು ವಿಶ್ವ ಚಾಂಪಿಯನ್ಶಿಪ್ನಲ್ಲಿ ಕಂಚಿನ ಪದಕ ತಮ್ಮದಾಗಿಸಿಕೊಂಡಿದ್ದರು. ಸೋನಾಪತ್ನ ನಹರಿ ಹಳ್ಳಿಯ ದಹಿಯಾ, ಫೈನಲ್ ಪ್ರವೇಶಿಸುವ ಮುನ್ನ ಜಪಾನ್ ರಿಕುಟೊ ಅರವಿ ತಾಂತ್ರಿಕ ಶ್ರೇಷ್ಠತೆಯಿಂದ ಮತ್ತು ಮಂಗೋಲಿಯಾದ ಝನಾಬಜಾರ್ ಝಂಡಾನ್‌ಬುಡ್ ವಿರುದ್ಧ 12-5ರಲ್ಲಿ ಗೆಲುವು ಸಾಧಿಸಿದ್ದರು.
ಭಾರತದ ಭರವಸೆಯ ಕುಸ್ತಿಪಟು ಬಜರಂಗ್ ಪೂನಿಯಾ ಕೂಡ ಫೈನಲ್ ಪ್ರವೇಶಿಸಿದ್ದರು. ಆದರೆ ಫೈನಲ್ನಲ್ಲಿ ಇರಾನ್ನ ಕುಸ್ತಿಪಟು ವಿರುದ್ಧ 1-3ರಲ್ಲಿ ಸೋಲು ಕಂಡು ಬೆಳ್ಳಿಗೆ ತೃಪ್ತಿಪಟ್ಟುಕೊಂಡಿದ್ದಾರೆ.
ಇದನ್ನೂ ಓದಿ:ಐಪಿಎಲ್ ನಿಯಮ ಉಲ್ಲಂಘಿಸಿದ್ದಕ್ಕೆ ಪಂತ್‌ಗೆ ಭಾರಿ ದಂಡ, ಆಮ್ರೆಗೆ ಒಂದು ಪಂದ್ಯ ನಿಷೇಧ
