ಹ್ಯಾಟ್ರಿಕ್​​ ಚಿನ್ನ ಗೆದ್ದ ಬೆನ್ನಲ್ಲೇ ನಂ.1 ಸ್ಥಾನ ಅಲಂಕರಿಸಿದ ದೀಪಿಕಾ ಕುಮಾರಿ

ಟೋಕಿಯೋ ಒಲಿಂಪಿಕ್ಸ್‌ನಲ್ಲಿ ಭಾರತಕ್ಕೆ ತಂದುಕೊಡುವ ಪದಕ ಭರವಸೆ ಮೂಡಿಸಿರುವ ಬಿಲ್ಲುಗಾರ್ತಿ ದೀಪಿಕಾ ಮತ್ತು ಅವರ ಪತಿ ಅಟಾನು ದಾಸ್ ನೆದರ್‌ಲ್ಯಾಂಡ್‌ನ ಜೋಡಿಯನ್ನು 5-3ರಿಂದ ಹಿಮ್ಮೆಟ್ಟಿಸಿದರು.

ಪ್ಯಾರೀಸ್: ಮುಂದಿನ ತಿಂಗಳು ನಡೆಯಲಿರುವ ಟೋಕಿಯೊ ಒಲಿಂಪಿಕ್ಸ್‌ಗೂ ಮುನ್ನ ನಡೆದ ಮೆಗಾ ಈವೆಂಟ್‌ ಅರ್ಚರಿ ವಿಶ್ವಕಪ್‌ನ ಹಂತ-3 ರಲ್ಲಿ ದೀಪಿಕಾ ಕುಮಾರಿ ಭಾನುವಾರ ಒಂದೇ ದಿನ ಮೂರು ಚಿನ್ನದ ಪದಕ ಗಳಿಸಿ ವಿಶೇಷ ಸಾಧನೆ ಮಾಡಿದ್ದಾರೆ. ಈ ಸಾಧನೆಯ ಬೆನ್ನಲ್ಲೇ ದೀಪಿಕಾ ಅರ್ಚರಿಯಲ್ಲಿ ವಿಶ್ವದಲ್ಲೇ ಅಗ್ರ ಸ್ಥಾನಕ್ಕೇರಿದ್ದಾರೆ.

ಮಹಿಳೆಯರ ವೈಯಕ್ತಿಕ ಸ್ಪರ್ಧೆಯ ಫೈನಲ್‌ನಲ್ಲಿ ದೀಪಿಕಾ ಅವರು ರಷ್ಯಾದ ಎಲೆನಾ ಒಸಿಪೋವಾ ಅವರನ್ನು 6-0 ಅಂತರದಲ್ಲಿ ಸೋಲಿಸಿ ಒಂದೇ ದಿನ ಹ್ಯಾಟ್ರಿಕ್ ಚಿನ್ನದ ಪದಕ ಗೆದ್ದಿದ್ದಾರೆ. ಇದಕ್ಕೂ ಮುನ್ನ ಅವರು ಚಿನ್ನ ಗೆದ್ದ ಮಿಶ್ರ ಹಾಗೂ ಮಹಿಳಾ ತಂಡಗಳ ಭಾಗವಾಗಿದ್ದರು.

ಅರ್ಚರಿ ಮಿಶ್ರ ಫೈನಲ್ಸ್‌ ಮುಖೇನ ಒಲಿಂಪಿಕ್ಸ್‌ನಲ್ಲಿ ಪದಕ ಭರವಸೆ ಮೂಡಿಸಿರುವ ದೀಪಿಕಾ ಮತ್ತು ಅವರ ಪತಿ ಅಟಾನು ದಾಸ್ ನೆದರ್‌ಲ್ಯಾಂಡ್‌ನ ಜೋಡಿಯನ್ನು 5-3 ರಿಂದ ಹಿಮ್ಮೆಟ್ಟಿಸಿದರು. ದೀಪಿಕಾ, ಅಂಕಿತಾ ಭಕತ್ ಮತ್ತು ಕೋಮಲಿಕಾ ಬಾರಿ ಅವರ ಮಹಿಳಾ ತಂಡ ಮೆಕ್ಸಿಕೊ ವಿರುದ್ಧ ಆರಾಮದಾಯಕ ಗೆಲುವಿನೊಂದಿಗೆ ಚಿನ್ನದ ಪದಕವನ್ನು ತಮ್ಮದಾಗಿಸಿಕೊಂಡಿದ್ದರು.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಅವರು, “ಈ ಸುದ್ದಿ ಕೇಳಿ ನನಗೆ ಸಂತೋಷವಾಗಿದೆ, ಮುಂದಿನ ದಿನಗಳಲ್ಲಿ ನನ್ನ ಫಾರ್ಮ್ ಅ​ನ್ನು ಹೀಗೆಯೇ ಮುಂದುವರೆಸುತ್ತೆನೆ. ನಾನು ಇನ್ನೂ ಕೆಲವು ಸುಧಾರಣೆಗಳನ್ನು ಕಂಡುಕೊಳ್ಳಬೇಕಾಗಿದ್ದು, ಅದರತ್ತ ಹೆಚ್ಚು ಗಮನ ಹರಿಸುತ್ತೇನೆ" ಎಂದು ದೀಪಿಕಾ ಕುಮಾರಿ ಹೇಳಿದ್ದಾರೆ.