ನವದೆಹಲಿ: ಪೋಲೆಂಡ್ನ ಕೀಲ್ಸ್ನಲ್ಲಿ ನಡೆಯುತ್ತಿರುವ ಯೂತ್ ವರ್ಲ್ಡ್ ಬಾಕ್ಸಿಂಗ್ ಚಾಂಪಿಯನ್ಶಿಪ್ನಲ್ಲಿ ಭಾರತದ 7 ಬಾಕ್ಸರ್ಗಳು ಸೆಮಿಫೈನಲ್ ಪ್ರವೇಶಿಸಿದ್ದಾರೆ. ನಿನ್ನೆ ನಾಲ್ವರು ಉಪಾಂತ್ಯಕ್ಕೆ ಎಂಟ್ರಿಕೊಟ್ಟು 4 ಪದಕ ಖಚಿತಪಡಿಸಿದ್ದರು.
ಇಂದು ಮಹಿಳೆಯರ ವಿಭಾಗದಲ್ಲಿ ಬಾಬಿರೋಜಿಸಾನ ಚಾನು (51 ಕೆಜಿ) ಮತ್ತು ಅರುಂಧತಿ ಚೌಧರಿ (69 ಕೆಜಿ), ಸನಾಮಾಚಾ ಚಾನು(75ಕೆಜಿ) ಸೆಮಿಫೈನಲ್ ಪ್ರವೇಶಿಸಿದರೆ, ಪುರುಷರಲ್ಲಿ ಅಂಕಿತ್ ನರ್ವಾಲ್ (64ಕೆಜಿ), ವಿಶಾಲ್ ಗುಪ್ತಾ (91ಕೆಜಿ), ಬಿಶ್ವಾಮಿತ್ರ ಚೊಂಗ್ಥಮ್(49ಕೆಜಿ) ಮತ್ತು ಸಚಿನ್(56ಕೆಜಿ) 7ನೇ ದಿನವಾದ ಇಂದು ನಾಲ್ಕರ ಘಟ್ಟ ತಲುಪುವುದರ ಮೂಲಕ ಭಾರತಕ್ಕೆ ಕನಿಷ್ಠ 7 ಕಂಚಿನ ಪದಕವನ್ನು ಖಚಿತ ಪಡಿಸಿದ್ದಾರೆ.
20 ಸದಸ್ಯರು ಭಾಗವಹಿಸಿರುವ ಈ ಟೂರ್ನಿಯಲ್ಲಿ 11 ಪದಕಗಳು ಭಾರತಕ್ಕೆ ಖಚಿತವಾಗಿವೆ. ಸೋಮವಾರ ವಿಂಕಾ, ಆಲ್ಫಿಯಾ, ಗೀತಿಕಾ ಹಾಗೂ ಪೂನಮ್ ಕೂಡ ಸೆಮಿಫೈನಲ್ ಪ್ರವೇಶಿಸಿ ಕನಿಷ್ಠ ಕಂಚಿನ ಪದಕವನ್ನು ಖಚಿತಪಡಿಸಿಕೊಂಡಿದ್ದರು.
51 ಕೆಜಿ ವಿಭಾಗದಲ್ಲಿ ಬಾಬಿರೋಜಿಸಾನ ಚಾನು ಯುರೋಪಿಯನ್ ಚಾಂಪಿಯನ್ ಅಲೆಕ್ಸಾಸ್ ಕುಬಿಕಾ ಅವರನ್ನು 5-0 ಅಂತರದಲ್ಲಿ ಮಣಿಸಿದ್ದು, ಇಂದಿನ ವಿಶೇಷವಾಗಿತ್ತು.
ಆದರೆ ಮನೀಶ್(75 ಕೆಜಿ) ಮತ್ತು ಸುಮಿತ್(69ಕೆಜಿ) ಕ್ವಾರ್ಟರ್ ಫೈನಲ್ನಲ್ಲಿ ಸೋಲು ಕಂಡು ನಿರಾಸೆ ಅನುಭವಿಸಿದರು.
ಇದನ್ನು ಓದಿ:ವಿಶ್ವ ಯೂತ್ ಬಾಕ್ಸಿಂಗ್ ಚಾಂಪಿಯನ್ಶಿಪ್ : ಭಾರತದ ನಾಲ್ವರು ಮಹಿಳಾ ಬಾಕ್ಸರ್ಗಳಿಗೆ ಪದಕ ಖಚಿತ
