ಹ್ಯಾಮಿಲ್ಟನ್: ನ್ಯೂಜಿಲ್ಯಾಂಡ್ ವಿರುದ್ಧ ತನ್ನ ಬ್ಯಾಟಿಂಗ್ ವೈಫಲ್ಯವನ್ನು ಮುಂದುವರಿಸಿರುವ ಭಾರತ ಮಹಿಳಾ ಕ್ರಿಕೆಟ್ ತಂಡ ಒತ್ತಡಕ್ಕೆ ಸಿಲುಕಿ ಗೆಲ್ಲಬಹುದಾದ ಪಂದ್ಯಗಳನ್ನು ಕಳೆದುಕೊಳ್ಳುತ್ತಿದೆ.
ಗುರುವಾರ ನಡೆದ ವಿಶ್ವಕಪ್ ಪಂದ್ಯದಲ್ಲಿ ಕಿವೀಸ್ ನೀಡಿದ 261 ರನ್ಗಳ ಗುರಿ ಬೆನ್ನಟ್ಟುವ ವೇಳೆ ವಿಕೆಟ್ ಉಳಿಸಿಕೊಳ್ಳುವ ಧಾವಂತದಲ್ಲಿ ಅರಿವಿಲ್ಲದೆ ಸಾಕಷ್ಟು ಎಸೆತಗಳನ್ನು ಡಾಟ್ ಮಾಡುವ ಮೂಲಕ 62 ರನ್ಗಳ ಸೋಲುಕಂಡಿತು.
ಈ ಪಂದ್ಯದಲ್ಲಿ 198 ರನ್‌ಗಳಿಗೆ ಆಲೌಟಾದ ಭಾರತ ಒಟ್ಟಾರೆ 280(46.4) ಎಸೆತಗಳನ್ನು ಎದುರಿಸಿತ್ತು. ಆದರೆ ಇದರಲ್ಲಿ ಕೇವಲ 131 ಎಸೆತಗಳನ್ನು ಮಾತ್ರ ಯಶಸ್ವಿಯಾಗಿ ಎದುರಿಸಿದ್ದ ಭಾರತೀಯ ಬ್ಯಾಟರ್ಗಳು ಬರೋಬ್ಬರಿ 149 ಎಸೆತಗಳನ್ನು ಡಾಟ್ ಮಾಡುವ ಮೂಲಕ ನೀರಸ ಪ್ರದರ್ಶನ ತೋರಿ ಒತ್ತಡವನ್ನು ತಾವಾಗಿಯೇ ಮೈಮೇಲೆ ಎಳೆದುಕೊಂಡರು.
ಆರಂಭದ 20 ಓವರ್ಗಳಲ್ಲಿ 50 ರನ್ಗಳಿಸಿದರೆ, 40 ಓವರ್ಗಳಲ್ಲಿ ಕೇವಲ 140ರನ್ಗಳಿಸಿತ್ತು. ಈ ನಿಧಾನಗತಿಯ ಬ್ಯಾಟಿಂಗ್ ಕಾರಣದಿಂದ ಟೀಮ್ ಇಂಡಿಯಾ ಕೊನೆಯ 10 ಓವರ್ಗಳಲ್ಲಿ 120 ರನ್ಗಳಿಸಬೇಕಾದ ಒತ್ತಡಕ್ಕೆ ಸಿಲುಕಿತ್ತು. ಆದರೆ ಕೊನೆಗೆ 58 ರನ್ಗಳಿಸಿ ಇನ್ನೂ 20 ಎಸೆತಗಳಿರುವಂತೆ ಇನ್ನಿಂಗ್ಸ್ ಮುಗಿಸಿ ಸೋಲೊಪ್ಪಿಕೊಂಡಿತು.
ಈಗಾಗಲೆ ನಿಧಾನಗತಿ ಇನ್ನಿಂಗ್ಸ್ ಆಡುವ ಮೂಲಕ ಟೀಕೆಗೆ ಗುರಿಯಾಗಿರುವ ನಾಯಕಿ ಮಿಥಾಲಿ ರಾಜ್ 56 ಎಸೆತಗಳಲ್ಲಿ 31 ರನ್ಗಳಿಸಿದರೆ, ಯುವ ಬ್ಯಾಟರ್ ಯಸ್ತಿಕಾ 59 ಎಸೆತಗಳಲ್ಲಿ 28, ಮಂಧಾನ 21 ಎಸೆತಗಳಲ್ಲಿ 6 ರನ್ಗಳಿಸಿ ಆರಂಭದಲ್ಲೇ ಸಾಕಷ್ಟು ಎಸೆತಗಳನ್ನು ಪೋಲು ಮಾಡಿದರು.
ಕೊನೆಯ ವಿಶ್ವಕಪ್ ಆಡುತ್ತಿರುವ ಹಿರಿಯ ಆಟಗಾರ್ತಿಯರಾದ ಜೂಲನ್ ಗೋಸ್ವಾಮಿ ಮತ್ತು ಮಿಥಾಲಿ ರಾಜ್ ಪ್ರತಿಷ್ಠಿತ ಟ್ರೋಫಿ ಎತ್ತಿ ಹಿಡಿಯುವ ಮೂಲಕ ಅವರ ವೃತ್ತಿ ಜೀವನವನ್ನು ಸ್ಮರಣೀಯವನ್ನಾಗಿಸುವ ಕನಸಿನಲ್ಲಿರುವ ಭಾರತ ತಂಡಕ್ಕೆ ಈ ರೀತಿಯ ನಿಧಾನಗತಿಯ ಬ್ಯಾಟಿಂಗ್ ಪ್ರಚೋದನೆ ತಂಡದ ಮೇಲೆ ಋಣಾತ್ಮಕ ಪರಿಣಾಮ ಬೀರಲಿದೆ. ಮುಂದಿನ ಪಂದ್ಯದಲ್ಲಾದರೂ ಬ್ಯಾಟರ್ಗಳು ಸ್ಟ್ರೈಕ್ ಬದಲಿಸುವ ಕಡೆಗೆ ಗಮನಹರಿಸಿ ಡಾಟ್ ಬಾಲ್ ಸಂಖ್ಯೆಗಳನ್ನು ಕಡಿಮೆ ಮಾಡಿಕೊಳ್ಳಬೇಕು. ಇಲ್ಲದಿದ್ದರೆ ಇಂದಿನ ಫಲಿತಾಂಶವನ್ನೆ ಮತ್ತೊಮ್ಮೆ ಎದುರಿಸಬೇಕಾಗುತ್ತದೆ.
ಇದನ್ನೂ ಓದಿ:ತಂಡದ ಅಗ್ರ-ಮಧ್ಯಮ ಕ್ರಮಾಂಕದಲ್ಲಿ ಸ್ಫೋಟಕ ಬ್ಯಾಟರ್ಗಳ ಕೊರತೆ ಸೋಲಿಗೆ ಕಾರಣ: ಮಿಥಾಲಿ ರಾಜ್
