ಆಕ್ಲೆಂಡ್(ನ್ಯೂಜಿಲೆಂಡ್): ನ್ಯೂಜಿಲ್ಯಾಂಡ್ಗೆ ಟೆಸ್ಟ್ ಚಾಂಪಿಯನ್ಶಿಪ್ ಪಟ್ಟ ಕಟ್ಟಿದ್ದ ಸವ್ಯಸಾಚಿ ಆಟಗಾರ ಕೇನ್ ವಿಲಿಯಮ್ಸನ್ ಟೆಸ್ಟ್ ತಂಡದ ನಾಯಕತ್ವದಿಂದ ಕೆಳಗಿಳಿದಿದ್ದಾರೆ. ಮುಂದಿನ ನಾಯಕನನ್ನಾಗಿ ವೇಗಿ ಟಿಮ್ ಸೌಥಿಯನ್ನು ಕ್ರಿಕೆಟ್ ಮಂಡಳಿ ನೇಮಿಸಿದೆ. ಏಕದಿನ ಮತ್ತು ಟಿ20 ನಾಯಕನಾಗಿ ವಿಲಿಯಮ್ಸನ್ ಮುಂದುವರಿಯಲಿದ್ದಾರೆ.
ಟಿ20 ವಿಶ್ವಕಪ್ನಲ್ಲಿ ಸೆಮೀಸ್ನಲ್ಲಿ ಕಿವೀಸ್ ಸೋಲಿನ ಬಳಿಕ ವಿಲಿಯಮ್ಸನ್ ನಾಯಕತ್ವ ಬದಲಾವಣೆ ಕೂಗು ಕೇಳಿಬಂದಿತ್ತು. ಆದರೆ, ಇದಕ್ಕೆ ಸೊಪ್ಪು ಹಾಕದ ಕೇನ್, ಮೂರು ಸ್ವರೂಪದ ಕ್ರಿಕೆಟ್ನಲ್ಲಿ ಆಡಲು ಬಯಸುತ್ತೇನೆ ಎಂದು ತಾವು ನಾಯಕತ್ವದಿಂದ ಹಿಂದೆ ಸರಿಯಲ್ಲ ಎಂಬ ಸ್ಪಷ್ಟ ಸಂದೇಶ ನೀಡಿದ್ದರು.
ಕಿವೀಸ್ನ ಯಶಸ್ವಿ ನಾಯಕ: ಮಾಜಿ ದಿಗ್ಗಜ ಆಟಗಾರ ಬ್ರೆಂಡನ್ ಮೆಕಲಮ್ 2016 ರಲ್ಲಿ ಟೆಸ್ಟ್ ನಾಯಕತ್ವ ತೆರವು ಮಾಡಿದ ಬಳಿಕ ಜವಾಬ್ದಾರಿ ವಹಿಸಿಕೊಂಡಿದ್ದ ವಿಲಿಯಮ್ಸನ್ ಈವರೆಗೂ 38 ಪಂದ್ಯಗಳಲ್ಲಿ ಆಡಿದ್ದಾರೆ. ಇದರಲ್ಲಿ 22 ಗೆಲುವು, 8 ಡ್ರಾ, 10 ಸೋಲು ಕಂಡಿದ್ದಾರೆ. ಐಸಿಸಿಯ ಚೊಚ್ಚಲ ಟೆಸ್ಟ್ ಚಾಂಪಿಯನ್ಶಿಪ್ನಲ್ಲಿ ಭಾರತವನ್ನು ಸೋಲಿಸಿ ತಂಡವನ್ನು ಚಾಂಪಿಯನ್ ಮಾಡಿದ ಶ್ರೇಯ ಕೇನ್ಗೆ ಸಲ್ಲುತ್ತದೆ. ಅಲ್ಲದೇ, ತಂಡವನ್ನು ಐಸಿಸಿ ಶ್ರೇಯಾಂಕ ಪಟ್ಟಿಯಲ್ಲಿ ನಂಬರ್ 1 ಸ್ಥಾನಕ್ಕೆ ತಂದು ಕೂರಿಸಿದ್ದು ಅವರ ಸಾಧನೆಯಾಗಿದೆ.
ಮುಂದಿನ ಏಕದಿನ ಮತ್ತು ಟಿ20 ವಿಶ್ವಕಪ್ ಗುರಿಯಿಟ್ಟುಕೊಂಡು ಸೀಮಿತ ಓವರ್ಗಳ ನಾಯಕತ್ವದಲ್ಲಿ ಮುಂದುವರಿಯಲು ಬಯಸಿದ್ದು, ಟೆಸ್ಟ್ ತಂಡದ ನಾಯಕತ್ವವನ್ನು ತ್ಯಜಿಸುತ್ತಿದ್ದೇನೆ. ನಾಯಕತ್ವ ಹೆಚ್ಚಿನ ಜವಾಬ್ದಾರಿಯದ್ದಾಗಿದೆ. ಇದರಿಂದ ಹಿಂದೆ ಸರಿಯಲು ಇದೇ ಸೂಕ್ತ ಸಮಯ ಎಂದು ಭಾವಿಸಿರುವೆ. ಟೆಸ್ಟ್ನಲ್ಲಿ ತಂಡ ಬಲಿಷ್ಠವಾಗಿದೆ. ಮುಂದಿನ ಚಾಂಪಿಯನ್ಶಿಪ್ ಫೈನಲ್ನಲ್ಲಿ ಭಾಗಿಯಾಗಲಿದೆ ಎಂದು ಕೇನ್ ವಿಲಿಯಮ್ಸನ್ ಹೇಳಿದರು.
ಮುಂದಿನ ನಾಯಕನಾಗಿರುವ ಟಿಮ್ ಸೌಥಿ ತಂಡವನ್ನು ಯಶಸ್ವಿಯಾಗಿ ಮುನ್ನಡೆಸಲಿದ್ದಾರೆ. ನಾನು ಅವರೊಂದಿಗೆ ಬಹು ದಿನಗಳಿಂದ ಕ್ರಿಕೆಟ್ ಆಡುತ್ತಿದ್ದೇನೆ. ನಮ್ಮ ತಂಡ ಮೂರು ಮಾದರಿಯಲ್ಲಿ ನಂಬರ್ 1 ಆಗಬೇಕೆಂಬುದು ನನ್ನಾಸೆ. ಹೀಗಾಗಿ ನಾಯಕತ್ವದ ಜವಾಬ್ದಾರಿಯಿಂದ ಹಿಂದೆ ಸರಿದಿರುವುದಾಗಿ ತಿಳಿಸಿದರು.
ಟಿಮ್ ಸೌಥಿ ನಾಯಕ, ಟಾಮ್ ಲಾಥಮ್ ಉಪನಾಯಕ: ನ್ಯೂಜಿಲ್ಯಾಂಡ್ ಟೆಸ್ಟ್ ತಂಡದ ನಾಯಕನಾಗಿ ವೇಗಿ ಟಿಮ್ ಸೌಥಿ ಸಾರಥ್ಯ ವಹಿಸಿಕೊಳ್ಳಲಿದ್ದಾರೆ. ಪಾಕಿಸ್ತಾನ ವಿರುದ್ಧ ಆರಂಭವಾಗಲಿರುವ ಸರಣಿಯಲ್ಲಿ ಸೌಥಿ ಹೊಸ ಹೊಣೆ ಹೊರಲಿದ್ದಾರೆ. ಇವರಿಗೆ ಸಾಥ್ ನೀಡಲು ಆರಂಭಿಕ ಬ್ಯಾಟರ್ ಟಾಮ್ ಲಾಥಮ್ರನ್ನು ಉಪನಾಯಕನನ್ನಾಗಿ ಆಯ್ಕೆ ಮಾಡಲಾಗಿದೆ. ಟಿಮ್ ಸೌಥಿ ನ್ಯೂಜಿಲ್ಯಾಂಡ್ನ 31ನೇ ನಾಯಕರಾಗಲಿದ್ದಾರೆ.
