ಅಬುಧಾಬಿ : ಟಿ20 ವಿಶ್ವಕಪ್ನ ಸೂಪರ್ 12ನಲ್ಲಿ ಪಾಕಿಸ್ತಾನ ವಿರುದ್ಧದ ಸೋಲು ತಮ್ಮನ್ನು ಮತ್ತು ತಮ್ಮ ತಂಡವನ್ನು ತುಂಬಾ ಆಳವಾಗಿ ಗಾಸಿಗೊಳಿಸಿದ ಕಾರಣ ನಾನು ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿಯಾಗುತ್ತಿದ್ದೇನೆ ಎಂದು ಆಫ್ಘಾನಿಸ್ತಾನ ಮಾಜಿ ನಾಯಕ ಅಸ್ಗರ್ ಆಫ್ಘಾನ್ ತಮ್ಮ 17 ವರ್ಷದ ವೃತ್ತಿ ಬದುಕಿಗೆ ವಿದಾಯ ಘೋಷಿಸುವ ಮುನ್ನ ಹೇಳಿದ್ದಾರೆ.
ಆಫ್ಘಾನಿಸ್ತಾನ ಶುಕ್ರವಾರ ನಡೆದ ಪಂದ್ಯದಲ್ಲಿ ಪಾಕಿಸ್ತಾನ ವಿರುದ್ಧ 5 ವಿಕೆಟ್ಗಳ ಸೋಲು ಕಂಡಿತ್ತು. 12 ಎಸೆತಗಳಲ್ಲಿ 24 ರನ್ಗಳ ಅಗತ್ಯವಿದ್ದಾಗ ಆಸಿಫ್ ಅಲಿ ಒಂದೇ ಓವರ್ನಲ್ಲಿ 4 ಸಿಕ್ಸರ್ ಸಿಡಿಸಿ ಆಫ್ಘಾನ್ ಸೋಲಿಗೆ ಕಾರಣರಾಗಿದ್ದರು. ಈ ಸೋಲು ನಿಜಕ್ಕೂ ಆಫ್ಘಾನಿಸ್ತಾನಕ್ಕೆ ಆಘಾತ ತಂದಿತ್ತು. ಅಸ್ಗರ್ ಅವರ ಸಹೋದರ ಕರೀಮ್ ಜನತ್ 19ನೇ ಓವರ್ ಬೌಲಿಂಗ್ ಮಾಡಿದ್ದರು.
ಪಂದ್ಯ ಮುಗಿದ 24 ಗಂಟೆಗಳ ನಂತರ ಆಫ್ಘಾನ್ ಮಾಜಿ ನಾಯಕ ತಾವೂ ನಮೀಬಿಯಾ ವಿರುದ್ಧದ ಪಂದ್ಯದ ನಂತರ ಅಂತಾರಾಷ್ಟ್ರೀಯ ಕ್ರಿಕೆಟ್ಗೆ ನಿವೃತ್ತಿಯಾಗುವುದಾಗಿ ಸಾಮಾಜಿಕ ಜಾಲತಾಣದಲ್ಲಿ ದಿಢೀರ್ ಘೋಷಣೆ ಮಾಡಿದ್ದರು.
"ಕಳೆದ ಪಂದ್ಯದಲ್ಲಿ, ನಾವು ತುಂಬಾ ಗಾಸಿಗೊಂಡಿದ್ದೇವೆ. ಇದೇ ಕಾರಣದಿಂದಲೇ ನಾನು ನಿವೃತ್ತಿಯಾಗಲು ನಿರ್ಧರಿಸಿದೆ. ನನಗೆ ಈ ಜರ್ನಿಯಲ್ಲಿ ಸಾಕಷ್ಟು ನೆನಪುಗಳಿವೆ. ಇದು ನನಗೆ ತುಂಬಾ ಕಷ್ಟವನ್ನುಂಟು ಮಾಡಲಿದೆ, ಆದರೂ ನಾನು ನಿವೃತ್ತಿಯಾಗುತ್ತಿದ್ದೇನೆ ಎಂದು ಆಫ್ಘಾನಿಸ್ತಾನವನ್ನು 115 ಪಂದ್ಯಗಳಲ್ಲಿ ಮುನ್ನಡೆಸಿರುವ ಅಸ್ಗರ್ ಹೇಳಿದ್ದರು.
"ನಾನು ಯುವಕರಿಗೆ ಅವಕಾಶ ನೀಡಲು ಬಯಸುತ್ತೇನೆ. ಅದಕ್ಕೆ ಇದು ಉತ್ತಮ ಸಮಯ ಎಂದು ನಾನು ಭಾವಿಸುತ್ತೇನೆ. ಸಾಕಷ್ಟು ಜನರು ದಿಢೀರ್ ನಿರ್ಧಾರ ಏಕೆ ಎಂದು ನನ್ನನ್ನು ಕೇಳುತ್ತಿದ್ದಾರೆ.
ಆದರೆ, ಸದ್ಯ ವಿವರಿಸಲು ನನಗೆ ಸಾಧ್ಯವಿಲ್ಲ" ಎಂದು ಭಾನುವಾರ ನಮೀಬಿಯಾ ವಿರುದ್ಧ 23 ಎಸೆತಗಳಲ್ಲಿ 31 ರನ್ ಗಳಿಸಿದ ಆಫ್ಘಾನ್ ಭಾವುಕರಾಗಿ ಕಣ್ಣೀರಿಡುತ್ತಾ ಹೇಳಿದರು. ಅಸ್ಗರ್ ತಮ್ಮ ದೇಶದ ಪರ 115 ಏಕದಿನ ಪಂದ್ಯಳನ್ನಾಡಿದ್ದು, 2467 ರನ್, 75 ಟಿ20 ಪಂದ್ಯಗಳಿಂದ 1358 ರನ್ ಮತ್ತು 6 ಟೆಸ್ಟ್ ಪಂದ್ಯಗಳಿಂದ 440 ರನ್ಗಳಿಸಿದ್ದಾರೆ.
