ಬೆಂಗಳೂರು: ಕಪಿಲ್ ದೇವ್ ಅವರ 434 ವಿಕೆಟ್ಗಳ ದಾಖಲೆಯನ್ನು ಮುರಿದಿರುವುದಕ್ಕೆ ತುಂಬಾ ಗೌರವವೆನ್ನಿಸುತ್ತಿದೆ ಎಂದು ಭಾರತದ ಅನುಭವಿ ಆಫ್ ಸ್ಪಿನ್ನರ್ ರವಿಚಂದ್ರನ್ ಅಶ್ವಿನ್ ಹೇಳಿದ್ದಾರೆ. ಇದೇ ಸಂದರ್ಭದಲ್ಲಿ, ತಾವು ಚಿಕ್ಕಂದಿನಲ್ಲಿ 2ನೇ ಕಪಿಲ್ ದೇವ್ ಆಗಬೇಕೆಂದು ಬ್ಯಾಟಿಂಗ್ ಮತ್ತು ಮಧ್ಯಮ ವೇಗದಲ್ಲಿ ಬೌಲಿಂಗ್ ಮಾಡುತ್ತಿದ್ದೆ ಎಂದು ತಿಳಿಸಿದರು.
ಶ್ರೀಲಂಕಾ ವಿರುದ್ಧ ಮೊಹಾಲಿಯಲ್ಲಿ ತಮ್ಮ 85ನೇ ಟೆಸ್ಟ್ ಪಂದ್ಯವನ್ನಾಡಿದ 35 ವರ್ಷದ ಅಶ್ವಿನ್ ಎರಡನೇ ಇನ್ನಿಂಗ್ಸ್ನಲ್ಲಿ ಚರಿತ್ ಅಸಲಂಕಾ ಅವರ ವಿಕೆಟ್ ಪಡೆಯುವ ಮೂಲಕ ಕಪಿಲ್ ದೇವ್ ಅವರ 434 ವಿಕೆಟ್ಗಳ ದಾಖಲೆ ಮೀರಿದ ಸಾಧನೆ ಮಾಡಿದ್ದರು. ಈ ಮೂಲಕ ಭಾರತದ ಪರ ಹೆಚ್ಚು ಟೆಸ್ಟ್ ವಿಕೆಟ್ ಪಡೆದ 2ನೇ ಬೌಲರ್ ಎನಿಸಿಕೊಂಡರು.
"ದಾಖಲೆ ಬ್ರೇಕ್ ಮಾಡಿರುವುದು ತುಂಬಾ ಗೌರವ ಎನ್ನಿಸುತ್ತಿದೆ. 28 ವರ್ಷಗಳ ಹಿಂದೆ ರಿಚರ್ಡ್ ಹ್ಯಾಡ್ಲಿ ಅವರ ದಾಖಲೆಯನ್ನು ಕಪಿಲ್ ಪಾಜಿ ಮುರಿದ ಸಂದರ್ಭದಲ್ಲಿ ನಾನು ನನ್ನ ತಂದೆಯ ಜೊತೆ ಕುಳಿತು ಅವರನ್ನು ಹುರಿದುಂಬಿಸುತ್ತಿದ್ದೆ" ಎಂದು ತಮ್ಮ ಯೂಟ್ಯೂಬ್ ಚಾನೆಲ್ನಲ್ಲಿ ಹೇಳಿಕೊಂಡಿದ್ದಾರೆ.
"ನಾನು ಅವರ ವಿಕೆಟ್ಗಳ ದಾಖಲೆಯನ್ನು ಮುರಿಯುತ್ತೇನೆ ಎಂದು ಕನಸಿನಲ್ಲಿಯೂ ಅಂದುಕೊಂಡಿರಲಿಲ್ಲ, ಏಕೆಂದರೆ ನಾನು 8 ವರ್ಷದ ವಯಸ್ಸಿನಲ್ಲಿ ಕ್ರಿಕೆಟ್ ಆರಂಭಿಸಿದಾಗ ನಾನೊಬ್ಬ ಬ್ಯಾಟರ್ ಆಗಬೇಕೆಂದು ಕೊಂಡಿದ್ದೆ. 1994ರಲ್ಲಿ ಬ್ಯಾಟಿಂಗ್ ನನ್ನ ಆಕರ್ಷಣೆಯಾಗಿತ್ತು. ಸಚಿನ್ ತೆಂಡೂಲ್ಕರ್ ಆ ಸಂದರ್ಭದಲ್ಲಿ ಉದಯೋನ್ಮುಖ ಆಟಗಾರನಾಗಿ ಹೊರಹೊಮ್ಮುತ್ತಿದ್ದರು. ಆ ವೇಳೆಗೆ ಕಪಿಲ್ ದೇವ್ ಅದ್ಭುತ ಸ್ಟ್ರೈಕರ್ ಆಗಿದ್ದರು" ಎಂದು ಅಶ್ವಿನ್ ತಿಳಿಸಿದ್ದಾರೆ.
"ತಂದೆಯ ಸಲಹೆಯಂತೆ ನಾನು ಆರಂಭದಲ್ಲಿ ಮುಂದಿನ ಕಪಿಲ್ ದೇವ್ ಆಗಬೇಕೆಂದು ಬಯಸಿ ವೇಗದ ಬೌಲಿಂಗ್ ಮಾಡುತ್ತಿದ್ದೆ. ಆಫ್ ಸ್ಪಿನ್ನರ್ ಆಗಿ ಬದಲಾದಾಗ ಮತ್ತು ಭಾರತ ತಂಡದಲ್ಲಿ ತುಂಬಾ ವರ್ಷಗಳ ಕಾಲ ಆಡಿದ್ದೇನೆ, ಅದರೆ ನಾನು ಭಾರತ ತಂಡದಲ್ಲಿ ಆಡುತ್ತೇನೆ ಎಂದೂ ಆಲೋಚಿಸಿರಲಿಲ್ಲ. ಈ ಸಾಧನೆಗೆ ಪಾತ್ರರಾಗಿರುವುದಕ್ಕೆ ನನಗೆ ಹೆಮ್ಮೆಯಿದೆ" ಎಂದು ತಮಿಳುನಾಡಿನ ಸ್ಪಿನ್ನರ್ ಹೇಳಿದ್ದಾರೆ.
ಇದನ್ನೂ ಓದಿ: ಟೆಸ್ಟ್ ಆಡುವ ಆಸೆ ಮುಗಿದಿದೆ, ದೇಶಿ ಕ್ರಿಕೆಟ್ನಲ್ಲಿ ಯುವಕರ ಸ್ಥಾನ ಆಕ್ರಮಿಸಲಾರೆ: ನಿವೃತ್ತಿ ಸುಳಿವು ಕೊಟ್ಟ ಫಿಂಚ್‌
