ಕೊಲಂಬೊ: ಶಿಖರ್ ಧವನ್ ನೇತೃತ್ವದ ಟೀಂ ಇಂಡಿಯಾ ಲಂಕಾ ವಿರುದ್ಧದ ಟಿ-20 ಹಾಗೂ ಏಕದಿನ ಕ್ರಿಕೆಟ್ ಸರಣಿ ಆಡಲು ಅಲ್ಲಿಗೆ ತೆರಳಿದ್ದು, ಇಂದು ಯಶಸ್ವಿಯಾಗಿ ಕ್ವಾರಂಟೈನ್ ಮುಗಿಸಿದೆ. ನಾಳೆಯಿಂದ ತಂಡದ ಎಲ್ಲ ಪ್ಲೇಯರ್ಸ್ ತರಬೇತಿಯಲ್ಲಿ ಭಾಗಿಯಾಗುವ ಸಾಧ್ಯತೆ ಇದೆ.
ಗಬ್ಬರ್ ಸಿಂಗ್ ಖ್ಯಾತಿಯ ಶಿಖರ್ ಧವನ್ ನಾಯಕತ್ವದ ಯುವಪಡೆ ಜುಲೈ 13ರಿಂದ ಲಂಕಾ ವಿರುದ್ಧ ನಿಗದಿತ ಓವರ್ಗಳ ಕ್ರಿಕೆಟ್ನಲ್ಲಿ ಭಾಗಿಯಾಗಲಿದ್ದು, ಇದೀಗ ಕೊಲಂಬೊ ಹೋಟೆಲ್ನಲ್ಲಿ ಉಳಿದುಕೊಂಡು ಕ್ವಾರಂಟೈನ್ ಮುಗಿಸಿದೆ.
ಎಲ್ಲ ಪ್ಲೇಯರ್ಸ್ ಯಶಸ್ವಿಯಾಗಿ ಕ್ವಾರಂಟೈನ್ ಮುಗಿಸುತ್ತಿದ್ದಂತೆ ಹೋಟೆಲ್ನ ಸ್ವಿಮ್ಮಿಂಗ್ ಪೂಲ್ನಲ್ಲಿ ಒಟ್ಟಿಗೆ ಎಂಜಾಯ್ ಮಾಡಿದ್ದು, ಕೆಲಹೊತ್ತು ವಾಲಿಬಾಲ್ ಕೂಡ ಆಡಿದ್ದಾರೆ. ಇದರ ಫೋಟೋವೊಂದನ್ನು ಭಾರತೀಯ ಕ್ರಿಕೆಟ್ ಮಂಡಳಿ ಶೇರ್ ಮಾಡಿಕೊಂಡಿದೆ. ತಂಡದಲ್ಲಿ ಬಹುತೇಕವಾಗಿ ಯುವ ಪಡೆಯಿಂದ ಕೂಡಿದ್ದು, ದಿ ವಾಲ್ ಖ್ಯಾತಿಯ ರಾಹುಲ್ ದ್ರಾವಿಡ್ ಕೋಚ್ ಆಗಿದ್ದಾರೆ. ಶ್ರೀಲಂಕಾಗೆ ಹಾರುವುದಕ್ಕೂ ಮೊದಲು ಎಲ್ಲ ಪ್ಲೇಯರ್ಸ್ ಮುಂಬೈನಲ್ಲಿ 14 ದಿನಗಳ ಕಡ್ಡಾಯ ಕ್ವಾರಂಟೈನ್ಗೊಳಗಾಗಿದ್ದರು.
ಲಂಕಾ ವಿರುದ್ಧದ ಸರಣಿಗಾಗಿ ಶಿಖರ್ ಧವನ್, ಭುವನೇಶ್ವರ್ ಕುಮಾರ್, ಪೃಥ್ವಿ ಶಾ, ದೇವದತ್ ಪಡಿಕ್ಕಲ್, ಋತುರಾಜ್ ಗಾಯಕ್‌ವಾಡ್, ಸೂರ್ಯಕುಮಾರ್, ಮನೀಷ್ ಪಾಂಡೆ, ಹಾರ್ದಿಕ್ ಪಾಂಡ್ಯಾ, ಕೃನಾಲ್ ಪಾಂಡ್ಯಾ, ನಿತೀಶ್ ರಾಣಾ, ಇಶನ್ ಕಿಶನ್(ವಿ.ಕೀ), ಸಂಜು ಸ್ಯಾಮ್ಸನ್( ವಿ.ಕೀ), ಯಜುವೇಂದ್ರ ಚಹಲ್, ಆರ್.ಚಹರ್, ಕೆ.ಗೌತಮ್, ಕುಲ್ದೀಪ್ ಯಾದವ್, ವರುಣ್ ಚಕ್ರವರ್ತಿ, ದೀಪಕ್ ಚಹರ್, ನವದೀಪ್ ಸೈನಿ ಹಾಗೂ ಚೇತನ್ ಸಕಾರಿಯಾ ಇದ್ದಾರೆ.
