ನವದೆಹಲಿ: ಆಸ್ಟ್ರೇಲಿಯಾದಲ್ಲಿ ನಡೆಯುತ್ತಿರುವ ಟಿ20 ವಿಶ್ವಕಪ್‌ನ ಗುಂಪು ಹಂತದ ಪಂದ್ಯಗಳು ಮುಕ್ತಾಯದ ಹಂತದಲ್ಲಿವೆ. ಗ್ರೂಪ್ 1 ರಲ್ಲಿ ನ್ಯೂಜಿಲ್ಯಾಂಡ್, ಇಂಗ್ಲೆಂಡ್ ಸೆಮಿಫೈನಲ್ ತಲುಪಿವೆ. ಹಾಲಿ ಚಾಂಪಿಯನ್ ಆಸ್ಟ್ರೇಲಿಯಾ ವಿಶ್ವಕಪ್ನಿಂದ ಹೊರಬಿದ್ದು ತವರು ಅಭಿಮಾನಿಗಳಿಗೆ ಭಾರಿ ನಿರಾಸೆ ಮೂಡಿಸಿದೆ. ಗ್ರೂಪ್ 2 ರಲ್ಲಿ ಭಾರತ, ದಕ್ಷಿಣ ಆಫ್ರಿಕಾ, ಪಾಕಿಸ್ತಾನ, ಬಾಂಗ್ಲಾದೇಶ ರೇಸ್ನಲ್ಲಿದ್ದು, ಕೊನೆಯ ಪಂದ್ಯ ಸೆಮೀಸ್ ಹಣೆಬರಹ ಬರೆಯಲಿವೆ.
ಕ್ರಿಕೆಟ್ ಶಿಶುಗಳಾದ ಐರ್ಲೆಂಡ್, ನೆದರ್ಲ್ಯಾಂಡ್ಸ್, ಜಿಂಬಾಬ್ವೆ ತಂಡಗಳು ಬಲಿಷ್ಠ ತಂಡಗಳಿಗೆ ದಂಗು ಬಡಿಸಿವೆ. ಜಿಂಬಾಬ್ವೆ ಪಾಕಿಸ್ತಾನದ ವಿರುದ್ಧ ಗೆದ್ದು ಅಚ್ಚರಿ ಮೂಡಿಸಿದ್ದಲ್ಲದೇ, ಆ ತಂಡದ ಸೆಮಿಫೈನಲ್ ಹಾದಿಗೆ ಮುಳ್ಳಾಯಿತು. ಬ್ಯಾಟಿಂಗ್ ಪಡೆಯನ್ನೇ ಹೊಂದಿರುವ ಇಂಗ್ಲೆಂಡ್ಗೆ, ಐರ್ಲೆಂಡ್ ಕನಸಲ್ಲೂ ಕಾಡುವಂತೆ ಸೋಲುಣಿಸಿತು. ಇದು ಆ ತಂಡಗಳ ಮುಂದಿನ ಹಾದಿಗೆ ಅಡ್ಡಿಯುಂಟು ಮಾಡಿದವು.
ಆಸೀಸ್ಗೆ ತವರಲ್ಲೇ ಮುಖಭಂಗ: ಕಳೆದ ಆವೃತ್ತಿಯ ಚಾಂಪಿಯನ್ ಆಗಿರುವ ಆಸ್ಟ್ರೇಲಿಯಾ 2022 ರ ಟಿ20 ವಿಶ್ವಕಪ್ ಅನ್ನು ತನ್ನದೇ ನೆಲದಲ್ಲಿ ಆಯೋಜಿಸಿದೆ. ಪ್ರಶಸ್ತಿ ಗೆಲ್ಲುವ ನೆಚ್ಚಿನ ತಂಡವಾಗಿದ್ದ ಆಸೀಸ್ ಅದೃಷ್ಟದಾಟದಲ್ಲಿ ಸೋತು ಟೂರ್ನಿಯಿಂದ ಹೊರಬಿದ್ದಿದೆ. ಇದು ತವರಿನ ಅಭಿಮಾನಿಗಳಿಗೆ ಭಾರಿ ನಿರಾಸೆ ಉಂಟು ಮಾಡಿದೆ. ತವರು ನೆಲದ ಲಾಭ ಪಡೆದು ಈ ಬಾರಿಯೂ ಪ್ರಶಸ್ತಿ ಜಯಿಸುವ ನಿರೀಕ್ಷೆಯಲ್ಲಿದ್ದ ತಂಡಕ್ಕೆ ಮಳೆ ಮತ್ತು ಅದೃಷ್ಟ ಎರಡೂ ಕೈಕೊಟ್ಟವು. 1 ಪಂದ್ಯ ಮಳೆಗೆ ಆಹುತಿಯಾಗಿತ್ತು.
ಬಡ್ತಿ ಪಡೆದ ನ್ಯೂಜಿಲ್ಯಾಂಡ್ ಇಂಗ್ಲೆಂಡ್: ಮೊದಲ ಗುಂಪಿನಲ್ಲಿ ಉತ್ತಮ ರನ್ ರೇಟ್ ಆಧಾರದ ಮೇಲೆ ನ್ಯೂಜಿಲ್ಯಾಂಡ್ ಮೊದಲ ತಂಡವಾಗಿ ಸೆಮಿಫೈನಲ್ ತಲುಪಿದರೆ, ಎರಡನೇ ತಂಡವಾಗಿ ಇಂಗ್ಲೆಂಡ್ ಬಡ್ತಿ ಪಡೆಯಿತು. ಗುಂಪಿನಲ್ಲಿದ್ದ ಶ್ರೀಲಂಕಾ, ಆಸ್ಟ್ರೇಲಿಯಾ, ಐರ್ಲೆಂಡ್, ಅಫ್ಘಾನಿಸ್ತಾನ ಮನೆಯ ದಾರಿ ಹಿಡಿದವು.
ಗ್ರೂಪ್ 2 ರಲ್ಲಿ ಮುಗಿಯದ ಸೆಣಸು: ಇನ್ನು ಗ್ರೂಪ್ 2 ರಲ್ಲಿ ಸೆಮಿಫೈನಲ್ ಹಣಾಹಣಿಗೆ ಇನ್ನೂ ತೆರೆ ಬಿದ್ದಿಲ್ಲ. ಭಾರತ ಮತ್ತು ದಕ್ಷಿಣ ಆಫ್ರಿಕಾ ಇನ್ನೊಂದು ಪಂದ್ಯ ಗೆದ್ದಲ್ಲಿ ಸೆಮಿಫೈನಲ್ ನೇರ ಪ್ರವೇಶ ಪಡೆಯಲಿವೆ. ಪಾಕಿಸ್ತಾನ, ಬಾಂಗ್ಲಾದೇಶ ತಂಡಗಳು ಇನ್ನೂ ರೇಸ್ನಲ್ಲಿದ್ದು, ಭಾರತ, ಹರಿಣಗಳ ಸೋಲಿಗೆ ಕಾಯುತ್ತಿವೆ.
ಒಂದು ವೇಳೆ ಜಿಂಬಾಬ್ವೆ ವಿರುದ್ಧ ಭಾರತ, ನೆದರ್ಲ್ಯಾಂಡ್ಸ್ ವಿರುದ್ಧ ದಕ್ಷಿಣ ಆಫ್ರಿಕಾ ಸೋತಲ್ಲಿ ಬಾಂಗ್ಲಾದೇಶ ವಿರುದ್ಧ ಪಾಕಿಸ್ತಾನ ಗೆದ್ದು ರನ್ರೇಟ್ ಆಧಾರದ ಮೇಲೆ ಸೆಮೀಸ್ಗೆ ಎಂಟ್ರಿ ಪಡೆಯುವ ಅವಕಾಶ ಇದೆ. ಬಾಂಗ್ಲಾಗೂ ನಾಲ್ಕರಘಟ್ಟಕ್ಕೆ ಅಷ್ಟೇನೂ ಅವಕಾಶ ಇಲ್ಲದಿದ್ದರೂ ಅದೃಷ್ಟದ ಹಾದಿಯಲ್ಲಿದೆ.
ಗೆಲುವೊಂದೇ ಭಾರತಕ್ಕಿರುವ ಮಾರ್ಗ: ಎರಡನೇ ಗುಂಪಿನಲ್ಲಿರುವ ಭಾರತ ಆಡಿರುವ 4 ಪಂದ್ಯಗಳಲ್ಲಿ 3 ಗೆದ್ದು, 1 ಸೋತು 6 ಅಂಕಗಳೊಂದಿಗೆ ಅಗ್ರಸ್ಥಾನದಲ್ಲಿದೆ. ನವೆಂಬರ್ 6 ರಂದು ನಡೆಯುವ ಜಿಂಬಾಬ್ವೆ ವಿರುದ್ಧ ಗೆದ್ದು 8 ಅಂಕಗಳೊಂದಿಗೆ ಏಕಮೇವವಾಗಿ ನಾಲ್ಕರಘಟ್ಟಕ್ಕೆ ತಲುಪಲಿದೆ. ದಕ್ಷಿಣ ಆಫ್ರಿಕಾ ಕೂಡ ನೆದರ್ಲ್ಯಾಂಡ್ಸ್ ವಿರುದ್ಧ ಗೆದ್ದರೆ 7 ಅಂಕಗಳೊಂದಿಗೆ ಭಾರತದ ಜೊತೆ ಸೆಮೀಸ್ಗೆ ತಲುಪಲಿದೆ.
ಓದಿ: ಶ್ರೀಲಂಕಾ ಸೋಲಿಸಿ ಇಂಗ್ಲೆಂಡ್ ಸೆಮೀಸ್ಗೆ ಲಗ್ಗೆ.. ಟೂರ್ನಿಯಿಂದ ಆತಿಥೇಯ ಆಸ್ಟ್ರೇಲಿಯಾ ಔಟ್
