ಮುಜಾಫರಪುರ್(ಬಿಹಾರ): ಭಾರತದ ಕ್ರಿಕೆಟ್ ದಂತಕಥೆ ಸಚಿನ್ ತೆಂಡೂಲ್ಕರ್ ಅವರ ಉತ್ಕಟ ಅಭಿಮಾನಿ ಸುಧೀರ್ ಕುಮಾರ್ ಎಂಬುದು ಎಲ್ಲರಿಗೂ ಗೊತ್ತಿರುವ ಸಂಗತಿ. ಇದೀಗ ಅವರಿಗೋಸ್ಕರ ಶೀಘ್ರದಲ್ಲೇ ಭವ್ಯ ದೇವಾಲಯ ನಿರ್ಮಾಣ ಮಾಡುವುದಾಗಿ ಸುಧೀರ್ ಹೇಳಿಕೊಂಡಿದ್ದಾರೆ. ಜತೆಗೆ ಅದರ ಉದ್ಘಾಟನೆಗೆ ಖುದ್ದಾಗಿ ಮಾಸ್ಟರ್ ಬ್ಲಾಸ್ಟರ್ ಸಚಿನ್ ತೆಂಡೂಲ್ಕರ್ ಅವರಿಗೆ ಆಹ್ವಾನ ನೀಡಲಿದ್ದಾರೆ.
ಮುಜಾಫರಪುರ್ನಲ್ಲಿ ಕ್ರಿಕೆಟ್ ದೇವರು ಸಚಿನ್ ತೆಂಡೂಲ್ಕರ್ಗೋಸ್ಕರ ದೇವಾಲಯ ನಿರ್ಮಾಣ ಮಾಡುವುದಾಗಿ ಘೋಷಣೆ ಮಾಡಿರುವ ಸುಧೀರ್, ಈಗಾಗಲೇ ದೇವಾಲಯದ ರೂಪರೇಖೆ ಸಿದ್ಧಪಡಿಸಲು ಆರಂಭ ಮಾಡಿರುವುದಾಗಿ ಹೇಳಿದ್ದಾರೆ. ಈ ವಿಚಾರವಾಗಿ ಈಟಿವಿ ಭಾರತ ಜೊತೆ ಅವರು ಮಾಹಿತಿ ಹಂಚಿಕೊಂಡಿದ್ದಾರೆ.
ಅಮಿತಾಬ್ ಬಚ್ಚನ್, ರಜನಿಕಾಂತ್ ಅವರ ದೇವಾಲಯ ನಿರ್ಮಾಣ ಮಾಡಬಹುದು. ಆದರೆ ಸಚಿನ್ ತೆಂಡೂಲ್ಕರ್ ದೇವಾಲಯ ಏಕೆ ನಿರ್ಮಾಣ ಮಾಡಬಾರದು ಎಂದು ಪ್ರಶ್ನೆ ಮಾಡಿರುವ ಸುಧೀರ್, ಶತಮಾನದ ಶ್ರೇಷ್ಠ ಕ್ರಿಕೆಟಿಗ ಸಚಿನ್ ತೆಂಡೂಲ್ಕರ್ ಅವರಿಗೋಸ್ಕರ ಅಮೃತಶಿಲೆಯ ಪ್ರತಿಮೆಯೊಂದಿಗೆ ಬಿಹಾರದ ಮುಜಫರಪುರ್ದಲ್ಲಿ ಭವ್ಯ ದೇವಾಲಯ ನಿರ್ಮಿಸಲು ನಿರ್ಧರಿಸಿದ್ದಾರೆ. ದೇವಾಲಯ ಉದ್ಘಾಟಿಸಲು 'ಸಚಿನ್ ಸರ್' ಅವರನ್ನ ಬಿಹಾರಕ್ಕೆ ಆಹ್ವಾನ ಮಾಡುವುದಾಗಿ ಅವರು ಹೇಳಿದ್ದಾರೆ. ಇಲ್ಲಿಯವರೆಗೆ ಸಚಿನ್ ತೆಂಡೂಲ್ಕರ್ ಸರ್ ಬಿಹಾರಕ್ಕೆ ಆಗಮಿಸಿಲ್ಲ. ಈ ಕಾರ್ಯಕ್ರಮ ಉದ್ಘಾಟನೆ ಮಾಡಲು ಅವರು ಬರುತ್ತಾರೆಂಬ ನಂಬಿಕೆ ಇದೆ ಎಂದಿದ್ದಾರೆ.
ದೇಶದಲ್ಲಿ ಕೊರೊನಾ ವೈರಸ್ ಹಾವಳಿ ಹೆಚ್ಚಾಗಿರುವ ಕಾರಣ ಹಾಗೂ ಕ್ರೀಡಾಭಿಮಾನಿಗಳು ಇಲ್ಲದೇ ಪಂದ್ಯಗಳು ನಡೆಯುತ್ತಿರುವ ಕಾರಣ ಸದ್ಯ ಸುಧೀರ್ ಕ್ರಿಕೆಟ್ ಸ್ಟೇಡಿಯಂಗಳಲ್ಲಿ ಕಾಣಿಸಿಕೊಳ್ಳುತ್ತಿಲ್ಲ. ಈ ಹಿಂದೆ ಪ್ರತಿಯೊಂದು ಪಂದ್ಯದಲ್ಲೂ ಅವರು ಭಾರತ ತಂಡಕ್ಕೆ ಬೆಂಬಲ ಸೂಚಿಸುತ್ತಿದ್ದರು.
ಪ್ರತಿಯೊಂದು ಪಂದ್ಯ ವೀಕ್ಷಣೆ ಮಾಡಲು ಮೂರು ಕೆಲಸ ಕಳೆದುಕೊಂಡಿರುವ ಸುಧೀರ್, 2005ರಲ್ಲಿ ಪಾಕ್-ಭಾರತ ನಡುವಿನ ಪಂದ್ಯ ವೀಕ್ಷಣೆಗೋಸ್ಕರ ರೈಲ್ವೆಯಲ್ಲಿನ ಟಿಕೆಟ್ ಕಲೆಕ್ಟರ್ ಹುದ್ದೆ ಸಹ ಕಳೆದುಕೊಂಡಿದ್ದಾರೆ.
