ಜೋಹನ್ಸ್ಬರ್ಗ್: ದಕ್ಷಿಣ ಆಫ್ರಿಕಾ ವಿರುದ್ಧ ನಡೆಯುತ್ತಿರುವ 2ನೇ ಟೆಸ್ಟ್ ಪಂದ್ಯದಲ್ಲಿ ಭಾರತದ ಲಾರ್ಡ್ ಖ್ಯಾತಿಯ ಶಾರ್ದೂಲ್ ಠಾಕೂರ್ 61 ರನ್ ನೀಡಿದ 7 ವಿಕೆಟ್ ಪಡೆಯುವ ಮೂಲಕ ಹಲವಾರು ದಾಖಲೆಗಳಿಗೆ ಪಾತ್ರರಾಗಿದ್ದಾರೆ.
ಭಾರತದ ಪಾಲಿನ ಅದೃಷ್ಟದ ಮೈದಾನವಾಗಿರುವ ಜೋಹನ್ಸ್ಬರ್ಗ್ನಲ್ಲಿ ಶಾರ್ದೂಲ್ ಠಾಕೂರ್ ಹರಿಣ ಪಡೆಯ 7 ವಿಕೆಟ್ ಉಡಾಯಿಸಿ ಕ್ರಿಕೆಟ್ ಜಗತ್ತನ್ನು ತನ್ನತ್ತ ನೋಡುವಂತೆ ಮಾಡಿದ್ದಾರೆ.
ಭಾರತದ 202ರನ್ಗಳ ಸ್ಪರ್ಧಾತ್ಮಕ ಮೊತ್ತವನ್ನು ಹಿಂಬಾಲಿಸಿದ ದಕ್ಷಿಣ ಅಫ್ರಿಕಾ 14ಕ್ಕೆ ತನ್ನ ಮೊದಲ ವಿಕೆಟ್ ಕಳೆದುಕೊಂಡಿತ್ತು. ಶಮಿ ಆರಂಭಿಕ ಮಾರ್ಕ್ರಮ್(7) ವಿಕೆಟ್ ಪಡೆದುಕೊಂಡಿದ್ದರು.
ಆದರೆ 2ನೇ ವಿಕೆಟ್ಗೆ ಎಲ್ಗರ್(28) ಮತ್ತು ಕೀಗನ್ ಪೀಟರ್ಸನ್ 74 ರನ್ ಸೇರಿಸಿ ಅಪಾಯರಾಗುತ್ತಿದ್ದ ಸಂದರ್ಭದಲ್ಲಿ ದಾಳಿಗಿಳಿದ ಠಾಕೂರ್ ಇಬ್ಬರನ್ನು ಪೆವಿಲಿಯನ್ಗಟ್ಟಿದರು. ನಂತರ ತನ್ನ ಸ್ವಿಂಗ್ ಮಾರಾಕಾಸ್ತ್ರದಿಂದ ಹರಿಣ ಪಡೆಯ ಬ್ಯಾಟರ್ಗಳನ್ನು ಒಬ್ಬರ ಹಿಂದೆ ಒಬ್ಬರು ಪೆವಿಲಿಯನ್ ಸೇರುವಂತೆ ಮಾಡಿದರು.
ಆಫ್ರಿಕಾ ತಂಡ ಜೊತೆಯಾಟ ನೀಡಿ ಸ್ಥಿರವಾಗುತ್ತಿದ್ದಂತೆ ನಾಯಕ ರಾಹುಲ್ ಚೆಂಡನ್ನು ಠಾಕೂರ್ಗೆ ನೀಡುತ್ತಿದ್ದರು. ಪ್ರತಿ ಸ್ಪೆಲ್ನಲ್ಲಿ ಬೌಲಿಂಗ್ ಮಾಡಿದಾಗಲೆಲ್ಲಾ ಠಾಕೂರ್ ವಿಕೆಟ್ ಉಡಾಯಿಸಿದರು. ಅವರು ಡಾಸನ್(1), ಬವುಮಾ(51), ವೆರಿನ್ನೆ(21), ಮಾರ್ಕೊ ಜಾನ್ಸನ್(21) ಮತ್ತು ಲುಂಗಿ ಎಂಗಿಡಿ ವಿಕೆಟ್ ಪಡೆದರು.
7 ವಿಕೆಟ್ ಪಡೆದ ಏಷ್ಯಾದ ಮೊದಲ ಬೌಲರ್
ಶಾರ್ದೂಲ್ ಠಾಕೂರ್ ಈ ಪಂದ್ಯದಲ್ಲಿ 61 ರನ್ ನೀಡಿ 7 ವಿಕೆಟ್ ಪಡೆದದ್ದು ದಕ್ಷಿಣ ಅಫ್ರಿಕಾ ವಿರುದ್ಧ ಭಾರತೀಯ ಬೌಲರ್ಗಳ ಅತ್ಯುತ್ತಮ ಬೌಲಿಂಗ್ ಪ್ರದರ್ಶನವಾಗಿತ್ತು. ಅಷ್ಟೇ ಅಲ್ಲದೇ ದಕ್ಷಿಣ ಆಫ್ರಿಕಾ ನೆಲದಲ್ಲಿ 7 ವಿಕೆಟ್ ಪಡೆದ ಏಷ್ಯಾದ ಮೊದಲ ವೇಗದ ಬೌಲರ್ ಎನಿಸಿಕೊಂಡರು. ಇವರನ್ನು ಬಿಟ್ಟರೆ ಹರ್ಭಜನ್ ಸಿಂಗ್ 2011ರಲ್ಲಿ ಹರಿಣಗಳ ನಾಡಿದಲ್ಲಿ 120 ರನ್ 7 ವಿಕೆಟ್ ಪಡೆದಿದ್ದರು.
ದಕ್ಷಿಣ ಆಫ್ರಿಕಾ ವಿರುದ್ಧ ಅತ್ಯುತ್ತಮ ಬೌಲಿಂಗ್
ಶಾರ್ದೂಲ್ ಕೇವಲ 61 ರನ್ ನೀಡಿ 7 ವಿಕೆಟ್ ಪಡೆಯುವ ಮೂಲಕ ದ. ಆಫ್ರಿಕಾ ವಿರುದ್ಧ ಅತ್ಯುತ್ತಮ ಬೌಲಿಂಗ್ ಪ್ರದರ್ಶನ ನೀಡಿದ ಭಾರತೀಯ ಬೌಲರ್ ಎನಿಸಿಕೊಂಡರು. 2015ರ ನಾಗ್ಪುರ ಟೆಸ್ಟ್ನಲ್ಲಿ ಸ್ಪಿನ್ ಸ್ಟಾರ್ ರವಿಚಂದ್ರನ್ ಅಶ್ವಿನ್ 66 ರನ್ ನೀಡಿ 7 ವಿಕೆಟ್ ಪಡೆದಿದ್ದದ್ದು ಇಲ್ಲಿಯವರೆಗಿನ ಶ್ರೇಷ್ಠ ಸಾಧನೆಯಾಗಿತ್ತು. ಹರ್ಭಜನ್ ಸಿಂಗ್ ಕೋಲ್ಕತ್ತಾದಲ್ಲಿ 87 ರನ್ ನೀಡಿ 7 ವಿಕೆಟ್ ಪಡೆದಿದ್ದಾರೆ.
ಇದನ್ನೂ ಓದಿ:SA vs IND 2nd Test: ವಾಂಡರರ್ಸ್‌ನಲ್ಲಿ ಹರಿಣಗಳ ಮೇಲೆ 'ಶಾರ್ದೂಲ' ದಾಳಿ; 7 ವಿಕೆಟ್ ಪಡೆದು ಮಿಂಚಿದ ಭಾರತೀಯ ವೇಗಿ
