ಪಾಕಿಸ್ತಾನದ ಖತರ್ನಾಕ್ ವೇಗಿ ಶಾಹೀನ್ ಅಫ್ರಿದಿಯ ಯಾರ್ಕರ್ ಎಸೆತ ಅಫ್ಘಾನಿಸ್ತಾನದ ಆಟಗಾರನನ್ನು ಆಸ್ಪತ್ರೆಗೆ ದಾಖಲಾಗುವಂತೆ ಮಾಡಿದೆ. ಆಫ್ಘನ್ ಮತ್ತು ಪಾಕಿಸ್ತಾನ ನಡುವಿನ ಅಭ್ಯಾಸ ಪಂದ್ಯದ ವೇಳೆ ಶಾಹೀನ್ ಅಫ್ರಿದಿ ಎಸೆದ ಮಾರಕ ಯಾರ್ಕರ್ನಿಂದ ಬ್ಯಾಟರ್ ರೆಹಮಾನುಲ್ಲಾ ಗುರ್ಬಾಜ್ ಕಾಲಿಗೆ ಪೆಟ್ಟು ಬಿದ್ದಿದೆ. ಇದರಿಂದ ಅವರು ಮೈದಾನದಿಂದ ನಿರ್ಗಮಿಸಿ ಚಿಕಿತ್ಸೆ ಪಡೆಯುವಂತಾಗಿದೆ.
ಏಷ್ಯಾಕಪ್ಗೂ ಮೊದಲು ಮೊಣಕಾಲು ಗಾಯಕ್ಕೀಡಾಗಿದ್ದ ಪಾಕ್ ವೇಗಿ ಶಾಹೀನ್ ವಿಶ್ವಕಪ್ಗೆ ಸಂಪೂರ್ಣ ಫಿಟ್ ಆಗಿದ್ದಾರೆ. ಅಭ್ಯಾಸ ಪಂದ್ಯದ ಮೊದಲ ಓವರ್‌ನ ಐದನೇ ಎಸೆತದಲ್ಲಿ ಶಾಹೀನ್ ಅಫ್ರಿದಿ ಎಸೆದ ಯಾರ್ಕರ್ ಅನ್ನು ಗುರುತಿಸುವಲ್ಲಿ ಎಡವಿದ ಆಫ್ಘನ್ ಆರಂಭಿಕ ಆಟಗಾರ ರೆಹಮಾನುಲ್ಲಾ ಗುರ್ಬಾಜ್ ಕಾಲಿಗೆ ಪೆಟ್ಟು ಮಾಡಿಕೊಂಡರು.
ಚೆಂಡು ಹಾರಿ ಬಂದು ಗುರ್ಬಾಜ್ ಬೆರಳಿಗೆ ಬಲವಾಗಿ ಬಡಿದಿದೆ. ಇದರಿಂದ ಕ್ರಿಕೆಟಿಗ ಮೈದಾನದಲ್ಲೇ ನರಳಾಡಿದ್ದಾರೆ. ಪರೀಕ್ಷೆ ನಡೆಸಿದ ಫಿಸಿಯೋಗಳು ಗಾಯ ಉಲ್ಬಣಿಸುವ ಮುನ್ನವೇ ಮೈದಾನದಿಂದ ಹೊತ್ತುಕೊಂಡು ಕರೆದೊಯ್ದಿದ್ದಾರೆ.
ಗುರ್ಬಾಜ್ ಅವರ ಎಡಪಾದಕ್ಕೆ ಗಾಯವಾಗಿದ್ದು, ಸ್ಕ್ಯಾನ್‌ಗಾಗಿ ಆಸ್ಪತ್ರೆಗೆ ರವಾನಿಸಲಾಗಿದೆ. ಅಫ್ಘಾನಿಸ್ತಾನದ ಬ್ಯಾಟರ್, ವಿಕೆಟ್ಕೀಪರ್ ಗುರ್ಬಾಜ್ ಗಾಯಗೊಂಡಿರುವುದು ತಂಡದಲ್ಲಿ ಆತಂಕ ಉಂಟು ಮಾಡಿದೆ. ಇನ್ನು ಆಫ್ಘನ್ ತಂಡ ಶನಿವಾರ ಪರ್ತ್‌ನಲ್ಲಿ ಇಂಗ್ಲೆಂಡ್ ವಿರುದ್ಧ ತನ್ನ ಮೊದಲ ಸೂಪರ್ 12 ಪಂದ್ಯ ಆಡಲಿದೆ.
ಗುರ್ಬಾಜ್ ಗಾಯಗೊಂಡ ಬಳಿಕ ದಾಳಿ ನಿಲ್ಲಿಸದ ಶಾಹೀನ್ ಅಫ್ರಿದಿ ಮತ್ತೊಂದು ಯಾರ್ಕರ್ ಹಾಕಿ ಇನ್ನೊಬ್ಬ ಆಟಗಾರ ಝಜೈ ಸ್ಟಂಪ್ ಉರುಳಿಸಿದರು. ಅಲ್ಲದೇ. 4 ಓವರ್ಗಳಲ್ಲಿ ಮಾರಕ ಎಸೆತಗಳನ್ನು ಹಾಕಿದ್ದಾರೆ. ಇನ್ನು 23 ರಂದು ಪಾಕಿಸ್ತಾನ ಮತ್ತು ಭಾರತ ಸೂಪರ್ 12 ಹಂತದ ಮೊದಲ ಪಂದ್ಯದಲ್ಲಿ ಎದುರಾಗಲಿವೆ.
ಓದಿ: ಅಂಡರ್ 23 ವಿಶ್ವ ಕುಸ್ತಿ ಚಾಂಪಿಯನ್ಶಿಪ್: ಸಜನ್ ಭನ್ವಾಲಾಗೆ ಐತಿಹಾಸಿಕ ಕಂಚಿನ ಪದಕ
