ನವದೆಹಲಿ: ಭಾರತ ತಂಡದ ಕೆರಿಬಿಯನ್ ನಾಡಿನಲ್ಲಿ 2022ರ ಅಂಡರ್ 19 ವಿಶ್ವಕಪ್ ಗೆಲ್ಲುವ ಮೂಲಕ ದಾಖಲೆಯ 5ನೇ ಪ್ರತಿಷ್ಠಿತ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತ್ತು. ಆದರೆ ಈ ಪಯಣದಲ್ಲಿ ಭಾರತ ತಂಡದ ಯುವ ಪಡೆ ಮತ್ತು ಸಿಬ್ಬಂದಿ ಎದುರಿಸಿದ ಯಾತನೆಯನ್ನು ತಂಡದ ವ್ಯವಸ್ಥಾಪಕರಾಗಿದ್ದ ಸಿಕ್ಕೀಂ ಕ್ರಿಕೆಟ್ ಅಸೋಸಿಯೇಷನ್ ಮುಖ್ಯಸ್ಥ ಲೋಬ್ಜಾಂಗ್ ಜಿ. ತೆನ್ಸಿಂಗ್ ಬಿಚ್ಚಿಟ್ಟಿದ್ದಾರೆ.
ವಿಶ್ವಕಪ್ಗಾಗಿ ಕೆರಿಬಿಯನ್ ನಾಡಿನಲ್ಲಿ ಕಾಲಿಟ್ಟ ದಿನದಿನವೇ ಮೊದಲು ವ್ಯಾಕ್ಸಿನೇಷನ ಹಾಕಿಸಿಕೊಂಡಿಲ್ಲ ಎನ್ನುವ ಕಾರಣದಿಂದ ವಿಶ್ವಕಪ್ ಎತ್ತಿ ಹಿಡಿಯಲು ಪ್ರಮುಖ ಪಾತ್ರವಹಿಸಿದ್ದ ಎಡಗೈ ವೇಗಿ ರವಿಕುಮಾರ್, ಆರಂಭಿಕ ಅಂಗ್ಕ್ರಿಶ್ ರಘುವಂಶಿ ಸೇರಿದಂತೆ 7 ಭಾರತೀಯ ಆಟಗಾರರನ್ನು ವಿಮಾನ ಏರಲು ಪೋರ್ಟ್ ಆಫ್ ಸ್ಪೇನ್ನಲ್ಲಿ ಅವಕಾಶ ಕೊಟ್ಟಿರಲಿಲ್ಲ. ನಂತರ ಐಸಿಸಿ, ಬಿಸಿಸಿಐ ಹಾಗೂ ಟ್ರೆನಿಡಾಡ್ ಸರ್ಕಾರ ಮಧ್ಯಸ್ಥಿಕೆ ವಹಿಸಿ ಸಮಸ್ಯೆಯನ್ನು ಇತ್ಯರ್ಥ ಮಾಡಿತು ಎಂದು ತೆನ್ಸಿಂಗ್ ಹೇಳಿದ್ದಾರೆ.
ನಾವು ಪೋರ್ಟ್ ಆಫ್ ಸ್ಪೇನ್ ತಲುಪಿದಾಗ ಚಾರ್ಟೆಡ್ ವಿಮಾನದಲ್ಲಿ ಗಯಾನಗೆ ತೆರಳಬೇಕಿತ್ತು. ಆದರೆ 7 ಆಟಗಾರರು ಕೋವಿಡ್ ಲಸಿಕೆ ಪಡೆದಿಲ್ಲ ಎಂಬ ಕಾರಣಕ್ಕೆ ತಡೆಹಿಡಿದರು, ನಮ್ಮ ದೇಶದಲ್ಲಿ ಇನ್ನೂ ಈ ವರ್ಗದವರಿಗೆ ಲಸಿಕೆ ನೀಡುತ್ತಿಲ್ಲ ಎಂದರೂ ಅವರು ಕೇಳದೆ, ಮುಂದಿನ ವಿಮಾನದಲ್ಲಿ ವಾಪಸ್ ತೆರಳುವಂತೆ ಸೂಚಿಸಿದರು. ಆದರೆ ನಾವು ಅಲ್ಲೇ ಹತ್ತಿರದ ಹೋಟೆಲ್ನಲ್ಲಿ ತಂಗಿದ್ದು, ಐಸಿಸಿ, ಸ್ಥಳೀಯ ಸರ್ಕಾರದ ನೆರವಿನಿಂದ ಸಮಸ್ಯೆಯನ್ನು ಬಗೆಹರಿಸಿಕೊಂಡೆವು ಎಂದು ಸಿಕ್ಕೀಂ ಕ್ರಿಕೆಟ್ ಅಸೋಸಿಯೇಷನ್ ಮುಖ್ಯಸ್ಥ ಪಿಟಿಐಗೆ ತಿಳಿಸಿದ್ದಾರೆ.
ಕೋವಿಡ್ 19 ಪಾಸಿಟಿವ್.. ಆರಂಭದ ಸಮಸ್ಯೆಯನ್ನು ಹೇಗೋ ನಿವಾರಿಸಿಕೊಂಡು ಹೋದ ತಂಡಕ್ಕೆ ಮೊದಲ ಪಂದ್ಯದ ಬಳಿಕ ಕೋವಿಡ್ 19 ವಕ್ಕರಿಸಿತು. ನಾಯಕ ಯಶ್ ಧುಲ್, ಉಪನಾಯಕ ಶೇಕ್ ರಶೀದ್ ಸೇರಿ 6 ಆಟಗಾರರು ಸೋಂಕಿಗೆ ತುತ್ತಾದರು. ಇದು ತಂಡದ ಎಸ್ಎಲ್ಒ ರವೀಂದ್ರನ್ ಅವರಿಂದ ತಂಡಕ್ಕೆಲ್ಲಾ ಹರಡಿಕೊಂಡಿತ್ತು. ಆದರೆ 2 ಲೀಗ್ ಪಂದ್ಯಗಳಿಂದ ಹೊರ ಉಳಿದಿದ್ದ ಎಲ್ಲಾ ಆಟಗಾರರನ್ನು ಸೇರಿ ಆಡಿ ಭಾರತ ಕ್ವಾರ್ಟರ್ ಫೈನಲ್ಗೆ ಅರ್ಹತೆ ಪಡೆದುಕೊಂಡೆವು.
ಕೆರಿಬಿಯನ್ ಬಯೋಬಬಲ್ ಒಂದು ಜೋಕ್.. ಕೋವಿಡ್ 19 ಸಾಂಕ್ರಾಮಿಕದ ಸಂದರ್ಭದಲ್ಲಿ ಐಸಿಸಿ ಕೆರಿಬಿಯನ್ ನಲ್ಲಿ ಇಂತಹ ದೊಡ್ಡ ಇವೆಂಟ್ ನಡೆಸುವುದು ಒಂದು ದೊಡ್ಡ ಸವಾಲು. ಅಂಡರ್ 19 ಅಂತಹ ವಿಶ್ವಕಪ್ ಅಂತಹ ಟೂರ್ನಿ ನಡೆಸಲು ಅದು ಒಳ್ಳೆಯ ಸ್ಥಳ ಅಲ್ಲವೆಂದು ತೆನ್ಸಿಂಗ್ ಅಭಿಪ್ರಾಯಪಟ್ಟಿದ್ದಾರೆ.
ಭಾರತ ತಂಡ ನಾಕೌಟ್ ಪಂದ್ಯಗಳನ್ನಾಡಿದ ಆಂಟಿಗುವಾದಲ್ಲಿ ಅತ್ಯಂತ ಆರಾಮದಾಯಕವಾದ ವಾಸ್ತವ್ಯವನ್ನು ಹೊಂದಿತ್ತು. ಆದರೆ ದಕ್ಷಿಣ ಆಫ್ರಿಕಾ ವಿರುದ್ಧ ತಮ್ಮ ಆರಂಭಿಕ ಪಂದ್ಯವನ್ನು ಆಡುವ ಮೊದಲು ಅವರು ಗಯಾನಾದಲ್ಲಿ ಅತ್ಯಂತ ಕಠಿಣ ಪರಿಸ್ಥಿತಿಗಳನ್ನು ಎದುರಿಸಬೇಕಾಗಿತ್ತು. ನಾನು ಮತ್ತು ನನ್ನ ಸಹಪಾಠಿಗಳು ಕೋವಿಡ್ಗೆ ತುತ್ತಾದಾಗ ಅಲ್ಲಿ ವೈದ್ಯಕೀಯ ಸೌಲಭ್ಯ, ಔಷಧಗಳು ಮತ್ತು ವೈದ್ಯರು ಸಹ ಇರಲಿಲ್ಲ. ನಮ್ಮ ಪಿಸಿಯೋ ನಮ್ಮನ್ನು ರಕ್ಷಿಸಿದರು. ಇದೊಂದು ವ್ಯವಸ್ಥೆಯ ವೈಫಲ್ಯ ಎಂದು ಅವರು ಜರಿದಿದ್ದಾರೆ.
ನೀರು, ಆಹಾರದ ಸಮಸ್ಯೆ.. ನಾವಿದ್ದ ಹೋಟೆಲ್ನಲ್ಲಿ ಆಟಗಾರರಿಗಾಗಿ ಪ್ರತ್ಯೇಖ ಮಹಡಿಗಳಿರಲಿಲ್ಲ. ಹೋಟೆಲ್ಗೆ ಬರುವ ಅಥಿತಿಗಳನ್ನು ಅದೇ ಮಹಡಿಯಲ್ಲಿ ಇರಿಸಲಾಗುತ್ತಿತ್ತು. ಐಸೊಲೇಷನ್ ಸಂದರ್ಭದಲ್ಲಿ ಯಾರು ಇರುತ್ತಿರಲಿಲ್ಲ. ರೂಮ್ಗಳಲ್ಲಿ ಸರಿಯಾದ ನೀರಿನ ವ್ಯವಸ್ಥೆ ಇರಲಿಲ್ಲ. ಆಟಗಾರರು ಕೆಲವು ಸಂದರ್ಭದಲ್ಲಿ ಆಹಾರದ ಸಮಸ್ಯೆಯನ್ನು ಅನುಭವಿಸಿದ್ದರು. ಅದೃಷ್ಟವಶಾತ್ ಕೆಲವು ಭಾರತದ ರೆಸ್ಟೋರೆಂಟ್ಗಳು ನಮಗೆ ನೆರವಾದವು ಎಂದು ತೆನ್ಸಿಂಗ್ ಹೇಳಿಕೊಂಡಿದ್ದಾರೆ.
ಬಯೋಬಬಲ್ ವ್ಯವಸ್ಥೆಯ ಬಗ್ಗೆ ಮಾತನಾಡಿ, ಅಭ್ಯಾಸ ಪಂದ್ಯದ ವೇಳೆ ವಾಶ್ರೂಮ್ಗಳಲ್ಲಿ ನೀರು ಇರುತ್ತಿರಲಿಲ್ಲ. ಭಾರತದಲ್ಲಿ ದೊಮೆಸ್ಟಿಕ್ ಕ್ರಿಕೆಟ್ ಆಯೋಜಿಸಲು ರಾಜ್ಯ ಕ್ರಿಕೆಟ್ ಬೋರ್ಡ್ ಮತ್ತು ಬಿಸಿಸಿಐ ಅತ್ಯುತ್ತಮ ಬಯೋಬಬಲ್ ವ್ಯವಸ್ಥೆಯನ್ನು ಕಲ್ಪಿಸಿಕೊಡುತ್ತಿವೆ ಎಂದು ನಾನು ದೈರ್ಯವಾಗಿ ಹೇಳಬಲ್ಲೆ ಎಂದು ಕೆರಿಬಿಯನ್ ನಾಡಿನ ಅವ್ಯವಸ್ಥೆಯ ಬಗ್ಗೆ ತೆನ್ಸಿಂಗ್ ಎಳೆ ಎಳೆಯಾಗಿ ಬಿಚ್ಚಿಟ್ಟಿದ್ದಾರೆ.
ಇದನ್ನೂ ಓದಿ: 11 ವರ್ಷದ ಬಾಲಕನ ಚಿಕಿತ್ಸೆಗೆ 31 ಲಕ್ಷ ರೂ. ದೇಣಿಗೆ ನೀಡಿ ಹೃದಯವಂತಿಕೆ ಮೆರೆದ ಕೆ ಎಲ್ ರಾಹುಲ್
