ಚೆನ್ನೈ : ಐಪಿಎಲ್ನಲ್ಲಿ ಯಶಸ್ವಿ ನಾಯಕ ಎನಿಸಿಕೊಂಡಿರುವ ರೋಹಿತ್ ಶರ್ಮಾ ಮತ್ತು ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ನಾಯಕತ್ವ ನಿರ್ಧಾರದಲ್ಲಿ ಒಬ್ಬರನ್ನೊಬ್ಬರ ನಕಲು ಮಾಡಿದ್ದಾರೆ.
ಟಿ20 ಕ್ರಿಕೆಟ್ನಲ್ಲಿ ಟಾಸ್ ಗೆದ್ದ ಕೂಡಲೇ ನಾಯಕರು ಹೆಚ್ಚು ಚೇಸಿಂಗ್ ಮಾಡಲು ನಿರ್ಧರಿಸುತ್ತಾರೆ. ಈ ಐಪಿಎಲ್ನಲ್ಲೂ ಮೊದಲ 8 ಪಂದ್ಯಗಳಲ್ಲಿ ಟಾಸ್ ಗೆದ್ದ ತಂಡ ಬೌಲಿಂಗ್ ಮಾಡಲು ನಿರ್ಧರಿಸಿದ್ದವು. ಆದರೆ, ಮುಂಬೈ ಇಂಡಿಯನ್ಸ್ ತಂಡದ ನಾಯಕ ರೋಹಿತ್ ಶರ್ಮಾ ಸನ್ರೈಸರ್ಸ್ ಹೈದರಾಬಾದ್ ವಿರುದ್ಧ ಟಾಸ್ ಗೆದ್ದು ಬ್ಯಾಟಿಂಗ್ ಮಾಡುವ ನಿರ್ಧಾರ ತೆಗೆದುಕೊಂಡಿದ್ದರು.
ಅದರಂತೆ ಕೇವಲ 153 ರನ್ಗಳ ಟಾರ್ಗೆಟ್‌ ನೀಡಿದರೂ 13 ರನ್ಗಳ ಜಯ ಸಾಧಿಸಿತ್ತು. ಮಾರನೆಯ ದಿನ ಇದೇ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಆರ್ಸಿಬಿ ನಾಯಕ ವಿರಾಟ್ ಕೊಹ್ಲಿ ಕೂಡ ಟಾಸ್ ಗೆದ್ದು ಬ್ಯಾಟಿಂಗ್ ಆಯ್ಕೆ ಮಾಡಿಕೊಂಡು ಯಶಸ್ವಿಯಾದರು.
ಇಂದು ಕೊಹ್ಲಿಯ 3 ವಿದೇಶಿಗರ ಯೋಜನೆ ಅನುಸರಿಸಿದ ರೋಹಿತ್ : ಕೆಕೆಆರ್ ವಿರುದ್ಧ ಆರ್ಸಿಬಿ ನಾಯಕ ಕೊಹ್ಲಿ ಕೇವಲ 3 ವಿದೇಶಿ ಕ್ರಿಕೆಟಿಗರನ್ನೊಳಗೊಂಡ ತಂಡದೊಂದಿಗೆ ಆಡಿದ್ದರು. ಯಾಕೆಂದರೆ,ಚೆಪಾಕ್ನಲ್ಲಿ ಸ್ಪಿನ್ನರ್ಗಳು ಹೆಚ್ಚು ಪರಿಣಾಮಕಾರಿಯಾಗಿರುವುದರಿಂದ ಹೆಚ್ಚುವರಿ ಬ್ಯಾಟ್ಸ್ಮನ್ಗೆ ಒತ್ತು ನೀಡಿ 3 ಸ್ಪಿನ್ನರ್ಗಳನ್ನು ಆಯ್ಕೆ ಮಾಡಿದ್ದರು. ಎಬಿಡಿ, ಮ್ಯಾಕ್ಸ್ವೆಲ್ ಮತ್ತು ಜೆಮೀಸನ್ ಮಾತ್ರ ಕೆಕೆಆರ್ ವಿರುದ್ಧ ಆಡಿದ್ದರು.
ಇದೇ ಯೋಜನೆಯನ್ನು ಇಂದು ಮುಂಬೈ ಇಂಡಿಯನ್ಸ್ ಕೂಡ ಅನುಸರಿಸಿದೆ. ತಂಡದಲ್ಲಿ ನಾಲ್ಕನೇ ವಿದೇಶಿ ಆಟಗಾರನಾಗಿದ್ದ ಮಿಲ್ನೆಯನ್ನು ಹೊರಗಿಟ್ಟಿರುವ ರೋಹಿತ್ ಅವರ ಜಾಗದಲ್ಲಿ ಆಲ್ರೌಂಡರ್ ಜಯಂತ್ ಯಾದವ್ಗೆ ಅವಕಾಶ ನೀಡಿದ್ದಾರೆ.
ಇಂದಿನ ಪಂದ್ಯದಲ್ಲಿ ಪೊಲಾರ್ಡ್, ಡಿಕಾಕ್ ಮತ್ತು ಬೌಲ್ಟ್ ಮಾತ್ರ ಕಣಕ್ಕಿಳಿದಿದ್ದಾರೆ. ಐಪಿಎಲ್ನಲ್ಲಿ ಒಂದು ತಂಡ ಗರಿಷ್ಠ ನಾಲ್ವರು ವಿದೇಶಿಗರನ್ನು ಆಡಿಸಲು ಅವಕಾಶವಿದೆ. ಕನಿಷ್ಠ ಎಷ್ಟಾದರೂ ಆಡಿಸಬಹುದು.
