ನ್ಯಾಟಿಂಗ್ಹ್ಯಾಮ್: ರನ್ ಮಷಿನ್ ಎಂದೇ ಹೆಸರುವಾಸಿಯಾಗಿರುವ ಭಾರತ ತಂಡದ ಮಾಜಿ ನಾಯಕ ವಿರಾಟ್ ಕೊಹ್ಲಿ ಬ್ಯಾಟ್ ಇತ್ತೀಚೆಗೆ ಮಂಕಾಗಿದೆ. ಕಳೆದ ಕೆಲ ತಿಂಗಳುಗಳಿಂದ ಶತಕವಿರಲಿ ಅರ್ಧಶತಕ ಗಳಿಸುವಲ್ಲಿಯೂ ವಿರಾಟ್ ಎಡವುತ್ತಿದ್ದಾರೆ. ಸದ್ಯ ಇಂಗ್ಲೆಂಡ್ ಪ್ರವಾಸದಲ್ಲೂ ಕೂಡ ಕೊಹ್ಲಿ ವೈಫಲ್ಯತೆ ಮುಂದುವರೆದಿದ್ದು ಕೆಲ ಮಾಜಿ ಆಟಗಾರರ ಕೆಂಗಣ್ಣಿಗೆ ಗುರಿಯಾಗಿದೆ. ಈ ನಡುವೆ ನಾಯಕ ರೋಹಿತ್ ಶರ್ಮಾ ಮಾಜಿ ಕ್ಯಾಪ್ಟನ್ ಬೆಂಬಲಕ್ಕೆ ನಿಂತಿದ್ದಾರೆ.
ಸದ್ಯ ಇಂಗ್ಲೆಂಡ್ನ ಬರ್ಮಿಂಗ್ಹ್ಯಾಮ್ ಟೆಸ್ಟ್‌ನಲ್ಲಿ ಕೊಹ್ಲಿ ಎರಡು ಇನ್ನಿಂಗ್ಸ್‌ಗಳಲ್ಲಿ ಕೇವಲ 31 ರನ್ ಗಳಿಸಿದ್ದರು. ಅಲ್ಲದೆ, ಎರಡು ಟಿ-20 ಪಂದ್ಯಗಳಲ್ಲಿಯೂ ರನ್ ಬರ ನೀಗಿಸುವಲ್ಲಿ ಎಡವಿದ ವಿರಾಟ್ ಕೇವಲ 1 ಮತ್ತು 11 ರನ್ಗೆ ವಿಕೆಟ್ ಒಪ್ಪಿಸಿದ್ದಾರೆ. ಮೊದಲೆರಡು ಟಿ-20 ಪಂದ್ಯ ಗೆದ್ದ ಭಾರತ, ಮೂರನೇ ಪಂದ್ಯದಲ್ಲಿ 17 ರನ್ಗಳಿಂದ ಸೋತು ಸರಣಿ ಕ್ಲೀನ್ ಸ್ವೀಪ್ ಅವಕಾಶ ಕೈಚೆಲ್ಲಿತು.
ಸದ್ಯ ಕೊಹ್ಲಿ ಫಾರ್ಮ್ ಬಗ್ಗೆ ಎಲ್ಲೆಡೆ ಟೀಕೆ ಎದ್ದಿರುವ ಬೆನ್ನಲ್ಲೇ ನಾಯಕ ರೋಹಿತ್ ತಮ್ಮ ಹಿಂದಿನ ನಾಯಕ ಕೊಹ್ಲಿಗೆ ಬೆಂಬಲಿಸಿದ್ದಾರೆ. ಮೂರನೇ ಟಿ-20ಯಲ್ಲಿ ವಿರಾಟ್ ಬ್ಯಾಟಿಂಗ್ ಮಾಡಿದ ರೀತಿಯನ್ನು ಹಿಟ್ಮ್ಯಾನ್ ಸಮರ್ಥಿಸಿಕೊಂಡಿದ್ದಾರೆ. 'ಟಿ-20 ಕ್ರಿಕೆಟ್ನಲ್ಲಿ ಅದರಲ್ಲೂ ಬಲಿಷ್ಠ ತಂಡದ ವಿರುದ್ಧ ಚೇಸಿಂಗ್ ವೇಳೆ ನಿಮ್ಮ ಬ್ಯಾಟಿಂಗ್ ಶೈಲಿ ಮುಖ್ಯವಾಗಿರುತ್ತದೆ. ಅದನ್ನೇ ಕೊಹ್ಲಿ ಕೂಡ ಮಾಡಿದ್ದಾರೆ, ಅದು ಒಬ್ಬ ಆಟಗಾರನ ಗುಣಮಟ್ಟವನ್ನು ಸೂಚಿಸುತ್ತದೆ' ಎಂದು ವಿರಾಟ್ ಬೆನ್ನುತಟ್ಟಿದ್ದಾರೆ.
ಮೂರನೇ ಟಿ-20ಯಲ್ಲಿ ಪಂತ್ ವಿಕೆಟ್ ಪತನದ ಬಳಿಕ ಕ್ರೀಸ್ಗಿಳಿದ ವಿರಾಟ್ ಕೊಹ್ಲಿ ಅದ್ಭುತ ಹೊಡೆತಗಳ ಮೂಲಕ ತಲಾ ಬೌಂಡರಿ ಹಾಗೂ ಸಿಕ್ಸರ್ ಸಿಡಿಸಿ ಆಕ್ರಮಣಕಾರಿ ಆಟಕ್ಕೆ ಮುಂದಾಗಿದ್ದರು. ಆದರೆ ಕೆಲ ಹೊತ್ತಲ್ಲೇ ಕವರ್ ಮೇಲೆ ಬೌಂಡರಿ ಬಾರಿಸಲು ಯತ್ನಿಸಿ, ಜೇಸನ್ ರಾಯ್ ಹಿಡಿದ ಉತ್ತಮ ಕ್ಯಾಚ್ನಿಂದ 11 ರನ್ಗೆ ಔಟಾಗಿದ್ದರು.
ಮುಂದುವರಿದು ಮಾತನಾಡಿದ ರೋಹಿತ್ ಸೂರ್ಯ ಕುಮಾರ್ ಬ್ಯಾಟಿಂಗ್ ಬಗ್ಗೆ ಪ್ರಶಂಸೆ ವ್ಯಕ್ತಪಡಿಸಿದರು. ನಾವು ಆರಂಭದಲ್ಲೇ ಮೂರು ವಿಕೆಟ್ ಕಳೆದುಕೊಂಡಿದ್ದಾಗ ಜೊತೆಯಾಟದ ಅಗತ್ಯವಿತ್ತು. ಸೂರ್ಯಕುಮಾರ್ ಪರಿಸ್ಥಿತಿಗೆ ತಕ್ಕಂತೆ ಬ್ಯಾಟಿಂಗ್ ಪ್ರದರ್ಶಿಸಿದ್ದಾರೆ. ಕೊನೆಯವರೆಗೂ ಕ್ರೀಸ್ನಲ್ಲಿದ್ದು ತಂಡವನ್ನು ಗೆಲ್ಲಿಸಲು ಆಗದಿರುವುದು ಸ್ವಲ್ಪ ನಿರಾಶೆ ತಂದಿತು, ಆದರೆ ಅವರ ಇನ್ನಿಂಗ್ಸ್ ಅದ್ಭುತವಾಗಿತ್ತು ಎಂದರು.
ನ್ಯಾಟಿಂಗ್ಹ್ಯಾಮ್‌ನ ಟ್ರೆಂಟ್ ಬ್ರಿಡ್ಜ್‌ನಲ್ಲಿ 216 ರನ್ಗಳ ಬೃಹತ್ ಗುರಿ ಬೆನ್ನಟ್ಟಿದ ಭಾರತ ಸೂರ್ಯಕುಮಾರ್ ಸಿಡಿಲಬ್ಬರದ ಶತಕದ ನಡುವೆಯೂ 17 ರನ್ಗಳಿಂದ ಸೋತಿದೆ. ನಾಳೆ ಮಂಗಳವಾರದಿಂದ ಆಂಗ್ಲರ ವಿರುದ್ಧ ಮೂರು ಪಂದ್ಯಗಳ ಏಕದಿನ ಸರಣಿ ಆರಂಭವಾಗಲಿದೆ.
ಇದನ್ನೂ ಓದಿ: ಜೊಕೊವಿಕ್ ಮುಡಿಗೆ ವಿಂಬಲ್ಡನ್‌ ಕಿರೀಟ; ಸರ್ಬಿಯನ್‌ ಆಟಗಾರನಿದು 21ನೇ ಗ್ರ್ಯಾಂಡ್‌ ಸ್ಲಾಮ್‌
