ಮೊಹಾಲಿ: ಶ್ರೀಲಂಕಾ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯದಲ್ಲಿ ಇನ್ನಿಂಗ್ಸ್ ಮತ್ತು 222 ರನ್ಗಳ ಜಯಕ್ಕೆ ಕಾರಣರಾದ ಭಾರತ ತಂಡದ ಆಲ್ರೌಂಡರ್ ರವೀಂದ್ರ ಜಡೇಜಾ ಒಂದೇ ಪಂದ್ಯದಲ್ಲಿ 150+ ರನ್ ಮತ್ತು 5 ವಿಕೆಟ್ ಪಡೆದ ಭಾರತದ ಮೂರನೇ ಬೌಲರ್ ಎಂಬ ವಿಶೇಷ ದಾಖಲೆಗೆ ಪಾತ್ರರಾಗಿದ್ದಾರೆ.
ಶನಿವಾರ ಬ್ಯಾಟಿಂಗ್ನಲ್ಲಿ ಕಮಾಲ್ ಮಾಡಿದ್ದ ಜಡೇಜಾ 224 ಎಸೆತಗಳಲ್ಲಿ 17 ಬೌಂಡರಿ ಮತ್ತು 3 ಸಿಕ್ಸರ್ಗಳ ಸಹಿತ ಅಜೇಯ 175 ರನ್ಗಳಿಸಿದ್ದರು. ಭಾನುವಾರ ಬೌಲಿಂಗ್ನಲ್ಲೂ ಚಮತ್ಕಾರಿ ಪ್ರದರ್ಶನ ತೋರಿದ ಅವರು ವೃತ್ತಿ ಜೀವನದ 10ನೇ ಬಾರಿ 5 ವಿಕೆಟ್ ಪಡೆದು ಶ್ರೀಲಂಕಾ ವಿರುದ್ಧ ಫಾಲೋಆನ್ ಏರಲು ನೆರವಾಗಿದ್ದಾರೆ.
175 ರನ್ ಮತ್ತು 41ಕ್ಕೆ 5 ವಿಕೆಟ್ ಪಡೆಯುತ್ತಿದ್ದಂತೆ ಒಂದೇ ಪಂದ್ಯದಲ್ಲಿ ಈ ಡಬಲ್ ಸಾಧನೆ ಮಾಡಿದ ಭಾರತದ ಮೂರನೇ ಕ್ರಿಕೆಟಿಗ ಎನಿಸಿಕೊಂಡರು. 1952 ರಲ್ಲಿ ಇಂಗ್ಲೆಂಡ್ ವಿರುದ್ಧ ವೀನೂ ಮಂಕಡ್ 184 ರನ್ ಮತ್ತು 196ಕ್ಕೆ5 ವಿಕೆಟ್ ಪಡೆದು ಈ ವಿಶೇಷ ಸಾಧನೆಗೆ ಪಾತ್ರರಾದ ಮೊದಲ ಕ್ರಿಕೆಟಿಗರಾಗಿದ್ದರು. 10 ವರ್ಷಗಳ ನಂತರ ಪಾಲಿ ಉಮ್ರಿಗರ್ ವೆಸ್ಟ್ ಇಂಡೀಸ್ ವಿರುದ್ಧ 172 ರನ್ ಮತ್ತು 107ಕ್ಕೆ 5 ವಿಕೆಟ್ ಪಡೆದಿದ್ದರು. ಇದೀಗ ಬರೋಬ್ಬರಿ 60 ವರ್ಷಗಳ ನಂತರ ರವೀಂದ್ರ ಜಡೇಜಾ ಆ ಸಾಲಿಗೆ ಸೇರ್ಪಡೆಗೊಂಡ ಮತ್ತೊಬ್ಬ ಭಾರತೀಯರಾಗಿದ್ದಾರೆ.
ಒಟ್ಟಾರೆ ಟೆಸ್ಟ್ ಕ್ರಿಕೆಟ್ನಲ್ಲಿ 1955ರಲ್ಲಿ ಡೇನಿಸ್ ಅಟ್ಕಿನ್ಸನ್ (219ರನ್ ಮತ್ತು 56ಕ್ಕೆ6), ಗ್ಯಾರಿ ಸೋಬರ್ಸ್(201 ಮತ್ತು 49ಕ್ಕೆ 5) ಮತ್ತು ಮುಷ್ತಾಕ್ ಮೊಹಮ್ಮದ್ 201ರನ್ ಮತ್ತು 49ಕ್ಕೆ5) ಈ ವಿಶೇಷ ಪಟ್ಟಿಯಲ್ಲಿರುವ ಇತರೆ ಕ್ರಿಕೆಟಿಗರಾಗಿದ್ದಾರೆ.
ಮತ್ತೊಂದು ವಿಶೇಷವೆಂದರೆ ರವೀಂದ್ರ ಜಡೇಜಾ ಮೊದಲ ಇನ್ನಿಂಗ್ಸ್ನಲ್ಲಿ ಈ ಡಬಲ್ ದಾಖಲೆಗೆ ಪಾತ್ರರಾದ 2ನೇ ಕ್ರಿಕೆಟರ್ ಎನಿಸಿಕೊಂಡರು. ಗ್ಯಾರಿ ಸೋಬರ್ಸ್ ಮಾತ್ರ ಈ ಹಿಂದೆ ಈ ಸಾಧನೆ ಮಾಡಿದ್ದರು.
ಒಟ್ಟಾರೆ ಪಂದ್ಯದಲ್ಲಿ ಜಡೇಜಾ 9 ವಿಕೆಟ್ ಪಡೆಯುವುದರ ಜೊತೆಗೆ 175 ರನ್ ಸಿಡಿಸಿದ ವಿಶ್ವದ ಮೊದಲ ಬ್ಯಾಟರ್ ಎನಿಸಿಕೊಂಡರು. ಟೆಸ್ಟ್ ಕ್ರಿಕೆಟ್ ಚರಿತ್ರೆಯಲ್ಲಿ ಯಾವೊಬ್ಬ ಕ್ರಿಕೆಟಿಗ 150+ ರನ್ ಮತ್ತು ಅದೇ ಪಂದ್ಯದಲ್ಲಿ 9 ವಿಕೆಟ್ ಪಡೆದಿಲ್ಲ.
ಇದನ್ನೂ ಓದಿ:ಐಪಿಎಲ್ ವೇಳಾಪಟ್ಟಿ ಪ್ರಕಟ: ಆರ್ಸಿಬಿ ಸಂಪೂರ್ಣ ವೇಳಾಪಟ್ಟಿ ಇಲ್ಲಿದೆ ನೋಡಿ
