ನವದೆಹಲಿ: ಏಷ್ಯಾ ಕಪ್ ಟೂರ್ನಿಯಿಂದ ಭಾರತ ಅಧಿಕೃತವಾಗಿ ಹೊರಬಿದ್ದಿದ್ದಕ್ಕೆ ಅಭಿಮಾನಿಗಳಿಗೆ ಭಾರೀ ನಿರಾಸೆ ಉಂಟಾಗಿದೆ. ಹಾಲಿ ಚಾಂಪಿಯನ್ ಭಾರತ ಈ ಬಾರಿಯೂ ಪ್ರಶಸ್ತಿಯನ್ನು ಉಳಿಸಿಕೊಳ್ಳಲಿದೆ ಎಂದು ನಿರೀಕ್ಷಿಸಲಾಗಿತ್ತು. ಆದರೆ, ಬೌಲರ್ಗಳ ದಯನೀಯ ಪ್ರದರ್ಶನದಿಂದ ಪಾಕಿಸ್ತಾನ ಮತ್ತು ಶ್ರೀಲಂಕಾ ವಿರುದ್ಧ ಸೋಲುಂಡು ಟೂರ್ನಿಯಿಂದ ಕಿಕೌಟ್ ಆಗಿದೆ. ತಂಡದ ಬೌಲಿಂಗ್ ಪಡೆಗೆ ಅನುಭವಿ ಬೌಲರ್ ಮೊಹಮದ್ ಶಮಿಯನ್ನು ಆಯ್ಕೆ ಮಾಡದೇ ಇರುವುದು ಪ್ರಶ್ನೆ ಟೀಕೆಗೆ ಗುರಿಯಾಗಿದೆ.
ಭಾರತ ತಂಡದ ಮಾಜಿ ಕೋಚ್ ರವಿಶಾಸ್ತ್ರಿ ಅವರು ಕೂಡ ಏಷ್ಯಾಕಪ್ ತಂಡದಿಂದ ವೇಗದ ಬೌಲರ್ ಮೊಹಮದ್ ಶಮಿಯನ್ನು ಹೊರಗಿಟ್ಟಿದ್ದಕ್ಕೆ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. ಆಯ್ಕೆ ಸಮಿತಿಯ ಈ ನಿರ್ಧಾರ ಸಂಪೂರ್ಣವಾಗಿ ದಿಗ್ಭ್ರಮೆಗೊಳಿಸಿದೆ. ಮೊಹಮದ್ ಶಮಿ ಮನೆಯಲ್ಲಿ ಕುಳಿತು ಟಿವಿ ವೀಕ್ಷಿಸುವಂತೆ ಮಾಡಿರುವುದು ನನ್ನನ್ನು ಕಂಗೆಡಿಸಿದೆ ಎಂದು ಮಾಧ್ಯಮವೊಂದಕ್ಕೆ ನೀಡಿದ ಸಂದರ್ಶನದಲ್ಲಿ ಹೇಳಿದ್ದಾರೆ.
ತಂಡದಲ್ಲಿ ಕೇವಲ ಮೂವರು ವೇಗಿಗಳಿಂದ ಟೂರ್ನಿ ಆರಂಭಿಸಿದ ಭಾರತದ ನಡೆಯೇ ಅಚ್ಚರಿಯಾಗಿದೆ. ಇದರಲ್ಲಿ ಆವೇಶ್ ಖಾನ್ ಅನಾರೋಗ್ಯಕ್ಕೀಡಾದರು. ಭುವನೇಶ್ವರ್ ಮತ್ತು ಅರ್ಷದೀಪ್ ಮಾತ್ರ ಬೌಲಿಂಗ್ ಪಡೆಯಲ್ಲಿದ್ದರು. ಮೂರನೇ ವೇಗಿಯಾಗಿ ಹಾರ್ದಿಕ್ ಆಯ್ಕೆಯಾಗಿದ್ದರು. ಇದಿಷ್ಟು ತಂಡವನ್ನು ಗೆಲ್ಲಿಸಲು ಸಾಕಾಗಲಿಲ್ಲ. ಮೂರನೇ ಮುಖ್ಯ ವೇಗಿಯ ಇಲ್ಲದಿರುವುದು ತಂಡದ ಬಲವನ್ನು ಕುಂದಿಸಿತು ಎಂದು ಅಭಿಪ್ರಾಯಪಟ್ಟರು.
ದೀಪಕ್ ಚಹರ್ ಆಡಿಸಬೇಕಿತ್ತು: ಆವೇಶ್ ಖಾನ್ ಅನಾರೋಗ್ಯಕ್ಕೀಡಾದಾಗ ಕಾಯುವ ಬದಲು ಮೀಸಲು ಪಡೆಯಲ್ಲಿದ್ದ ದೀಪಕ್ ಚಹರ್ ಅವರನ್ನು ತಕ್ಷಣವೇ ತಂಡಕ್ಕೆ ಸೇರಿಸಿಕೊಳ್ಳಬಹುದಿತ್ತು. ವೇಗದ ಬೌಲಿಂಗ್ ದೌರ್ಬಲ್ಯದಿಂದಾಗಿ ತಂಡ ಪಾಕಿಸ್ತಾನ ಮತ್ತು ಶ್ರೀಲಂಕಾ ವಿರುದ್ಧ ಸೋತು ಟೂರ್ನಿಯಿಂದ ಹೊರಬೀಳಬೇಕಾಯಿತು ಎಂದಿದ್ದಾರೆ.
ತಂಡಕ್ಕೆ ಹೆಚ್ಚುವರಿ ವೇಗಿಯ ಅಗತ್ಯವಿತ್ತು. ಐಪಿಎಲ್ ಟೂರ್ನಿಯಲ್ಲಿ ಮಿಂಚಿದ್ದ ಮೊಹಮದ್ ಶಮಿ ತಂಡದಲ್ಲಿ ಸ್ಥಾನ ಪಡೆಯದೇ ಇರುವುದು ನನ್ನಲ್ಲಿ ಅಚ್ಚರಿ ಮೂಡಿಸಿತು. ಇದು ನಿಸ್ಸಂಶಯವಾಗಿ ಕೆಟ್ಟ ನಿರ್ಧಾರವಾಗಿದೆ ಎಂದು ಟೀಕಿಸಿದರು. ಇನ್ನಾರು ವಾರಗಳಲ್ಲಿ ಆಸ್ಟ್ರೇಲಿಯಾದಲ್ಲಿ ನಡೆಯುವ ಟಿ20 ವಿಶ್ವಕಪ್ನಲ್ಲಿ ಮೊದಮದ್ ಶಮಿಯ ಅಗತ್ಯ ತಂಡಕ್ಕಿದೆ ಎಂಬ ಮಾತನ್ನು ಮಾಜಿ ಕೋಚ್ ರವಿಶಾಸ್ತ್ರಿ ಇದೇ ವೇಳೆ ಹೇಳಿದ್ದಾರೆ.
ಇಂದು ರಾತ್ರಿ 7.30 ಕ್ಕೆ ಏಷ್ಯಾ ಕಪ್ ಟೂರ್ನಿಯ ಕೊನೆಯ ಪಂದ್ಯವನ್ನು ಭಾರತ ಆಫ್ಘಾನಿಸ್ತಾನ ವಿರುದ್ಧ ಆಡಲಿದೆ. ಉಭಯ ತಂಡಗಳು ಈಗಾಗಲೇ ಟೂರ್ನಿಯಿಂದ ಹೊರಬಿದ್ದಿದ್ದು ಇದೊಂದು ಔಪಚಾರಿಕ ಪಂದ್ಯವಾಗಿದೆ.
ಓದಿ: 'ಮೈ ಆಲ್ ಟೈಮ್ ಫೇವರಿಟ್..' ಪ್ರೀತಿ ಜಿಂಟಾ ಜೊತೆಗಿನ ಫೋಟೋ ಹಂಚಿಕೊಂಡ ಪಾಕ್ ಕ್ರಿಕೆಟಿಗ
