ಸಿಲ್ಚಾರ್(ಅಸ್ಸೋಂ): ರಣಜಿ ಕ್ರಿಕೆಟ್ ಆಡಿದ್ರೆ ಸಾಕು ಕೆಲ ಕ್ರಿಕೆಟಿಗರ ಲೈಫ್‌ ಸ್ಟೈಲ್ ಸಂಪೂರ್ಣವಾಗಿ ಚೇಂಜ್ ಆಗಿ ಬಿಡುತ್ತದೆ. ಅವರು ಐಷಾರಾಮಿಯಾಗಿ ಬದುಕಲು ಶುರು ಮಾಡ್ತಾರೆ. ಆದರೆ ಇಲ್ಲೊಬ್ಬ ಕ್ರಿಕೆಟರ್‌ನದ್ದು ದಯನೀಯ ಪರಿಸ್ಥಿತಿ. ಇವರು ಬದುಕಿನ ಬಂಡಿ ಸಾಗಿಸಲು ಬೇರೆ ಉದ್ಯೋಗ ಸಿಗದೆ, ರಸ್ತೆ ಪಕ್ಕದಲ್ಲಿ ದಾಲ್ ಪುರಿ ಮಾರಾಟವನ್ನೇ ನೆಚ್ಚಿಕೊಂಡಿದ್ದಾರೆ. ಇದು ಲೆಫ್ಟ್ ಆರ್ಮ್ ಸ್ಪಿನ್ನರ್ ಪ್ರಕಾಶ್ ಭಗತ್ ಬದುಕಿನ ಕಥೆ.
ಮಾಜಿ ಕ್ಯಾಪ್ಟನ್ ಸೌರವ್ ಗಂಗೂಲಿ ನೇತೃತ್ವದ ಟೀಂ ಇಂಡಿಯಾ 2003ರಲ್ಲಿ ನ್ಯೂಜಿಲ್ಯಾಂಡ್ ಪ್ರವಾಸಕ್ಕೆ ಸಜ್ಜುಗೊಳ್ಳುತ್ತಿದ್ದ ಸಂದರ್ಭದಲ್ಲಿ ಬೆಂಗಳೂರಿನ ಕ್ರಿಕೆಟ್ ಅಕಾಡೆಮಿಯಲ್ಲಿ ಲೆಫ್ಟ್ ಆರ್ಮ್ ಸ್ಪಿನ್ನರ್ ಪ್ರಕಾಶ್ ಭಗತ್ ಬೌಲಿಂಗ್ ಮಾಡಿ ಗಮನ ಸೆಳೆದಿದ್ದರು.
ಅಸ್ಸೋಂ ರಣಜಿ ಕ್ರಿಕೆಟ್ ಆಟಗಾರನಾಗಿದ್ದ 34 ವರ್ಷದ ಪ್ರಕಾಶ್ ಭಗತ್ ಸದ್ಯ ಅಸ್ಸೋಂನ ಸಿಲ್ಚಾರ್ ಎಂಬಲ್ಲಿ ದಾಲ್ ಪುರಿ ಅಂಗಡಿ ನಡೆಸುತ್ತಿದ್ದಾರೆ. 2011ರಲ್ಲಿ ಇವರ ತಂದೆ ತೀರಿಕೊಳ್ಳುತ್ತಿದ್ದಂತೆ ಸಹೋದರ ಕೂಡ ಅನಾರೋಗ್ಯಕ್ಕೆ ಒಳಗಾಗುತ್ತಾರೆ. ಹೀಗಾಗಿ ವಿಧಿ ಇಲ್ಲದೇ ಕ್ರಿಕೆಟ್ನಿಂದ ದೂರವೇ ಉಳಿದು ಕುಟುಂಬ ನಿರ್ವಹಣೆ ಜವಾಬ್ದಾರಿ ಹೊತ್ತುಕೊಂಡಿದ್ದರು.ಇವರಿಗೆ ಇಬ್ಬರು ಮಕ್ಕಳಿದ್ದಾರೆ.
ಇದನ್ನೂ ಓದಿರಿ: ಟೋಕಿಯೋ ಒಲಿಂಪಿಕ್ಸ್ನಿಂದ ಹೊರಬಿದ್ದ 'ಧಿಂಗ್ ಎಕ್ಸ್‌ಪ್ರೆಸ್‌' ಹಿಮಾದಾಸ್
ರಾಜ್ಯ ಸರ್ಕಾರ ಅಥವಾ ಅಸ್ಸೋಂ ಕ್ರಿಕೆಟ್ ಸಂಸ್ಥೆಯಿಂದ ತಮಗೆ ಯಾವುದೇ ರೀತಿಯ ಸೌಲಭ್ಯ ಸಿಕ್ಕಿಲ್ಲ ಎನ್ನುವ ಪ್ರಕಾಶ್, ಆರ್ಥಿಕ ಸಹಾಯ ಸಿಕ್ಕರೆ ಮರಳಿ ಕ್ರಿಕೆಟ್ನಲ್ಲಿ ಭಾಗಿಯಾಗುವುದಾಗಿ ಹೇಳುತ್ತಾರೆ.
ರಾಜ್ಯ, ರಾಷ್ಟ್ರೀಯ ತಂಡದಲ್ಲೂ ಪಾಲ್ಗೊಂಡಿದ್ದ ಭಗತ್ ಅಂಡರ್-16, ಅಂಡರ್-19 ಹಾಗೂ ಅಂಡರ್-23 ಕ್ರಿಕೆಟ್ ತಂಡದಲ್ಲೂ ಸ್ಥಾನ ಪಡೆದುಕೊಂಡಿದ್ದರು. ಇದಾದ ಬಳಿಕ 2009-10 ಹಾಗೂ 2010-11ರ ರಣಜಿ ಕ್ರಿಕೆಟ್ನಲ್ಲಿ ಅಸ್ಸೋಂ ತಂಡದಲ್ಲಿದ್ದು ಜಮ್ಮು ಕಾಶ್ಮೀರ ಹಾಗೂ ರೈಲ್ವೇಸ್ ತಂಡಗಳ ವಿರುದ್ಧ ಮೈದಾನಕ್ಕಿಳಿದಿದ್ದರು. ಇದರ ಜತೆಗೆ ಸೈಯದ್ ಮುಷ್ತಾಕ್ ಅಲಿ ಟೂರ್ನಿಗೂ ಆಯ್ಕೆಯಾಗಿದ್ದರು ಎಂದು ತಿಳಿದು ಬಂದಿದೆ.
