ರಾಂಚಿ(ಜಾರ್ಖಂಡ್): ಭಾರತ ಕ್ರಿಕೆಟ್ ತಂಡದ ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ವಿಶ್ವಾದ್ಯಂತ ಅಭಿಮಾನಿಗಳನ್ನು ಸಂಪಾದಿಸಿದ್ದಾರೆ. ಇಲ್ಲೊಬ್ಬ ಅಭಿಮಾನಿ ಬರೋಬ್ಬರಿ 1,436 ಕಿ.ಮೀ. ದೂರವನ್ನು ನಡೆದುಕೊಂಡೇ ಕ್ರಮಿಸಿ ಧೋನಿಯನ್ನು ಕಾಣಲು ರಾಂಚಿಗೆ ಬಂದಿದ್ದಾನೆ. ಇದನ್ನು ಕಂಡು ಸ್ವತಃ ಧೋನಿಯೇ ನಿಬ್ಬೆರಗಾಗಿದ್ದಾರೆ.
ಹರಿಯಾಣದ ನಿವಾಸಿ ಅಜಯ್ ಗಿಲ್ ಎಂಬುವವರು ಮಹೇಂದ್ರ ಸಿಂಗ್ ಧೋನಿಯ ಕಟ್ಟಾಭಿಮಾನಿ. ಧೋನಿಯನ್ನು ನೋಡಲೇಬೇಕು ಎಂಬ ಕಾರಣಕ್ಕಾಗಿ ಹರಿಯಾಣದಿಂದ ರಾಂಚಿಗೆ ನಡೆದುಕೊಂಡೇ ಬಂದಿದ್ದಾರೆ. ಫಾರ್ಮ್ಹೌಸ್ಗೆ ಬಂದ ಅಭಿಮಾನಿಯನ್ನು ಧೋನಿ ಆತ್ಮೀಯವಾಗಿ ಬರಮಾಡಿಕೊಂಡು ಪ್ರೀತಿಯಿಂದ ಆಲಂಗಿಸಿಕೊಂಡಿದ್ದಾರೆ. ಅಲ್ಲದೇ, ಅಭಿಮಾನಿ ಗಿಲ್ ಜೊತೆ ಫೋಟೋಗೆ ಫೋಸ್ ನೀಡಿದರು.
ಅಜಯ್ ಗಿಲ್ ಹರಿಯಾಣಕ್ಕೆ ವಾಪಸ್ಸಾಗಲು ಧೋನಿಯೇ ವಿಮಾನದ ಟಿಕೆಟ್ ಬುಕ್ ಮಾಡಿಸಿಕೊಟ್ಟಿದ್ದಾರೆ. ಅಲ್ಲದೇ, ದಿನದ ಮಟ್ಟಿಗೆ ಉಳಿದುಕೊಳ್ಳಲು ತನ್ನ ಫಾರ್ಮ್ಹೌಸ್‌ನಲ್ಲೇ ವ್ಯವಸ್ಥೆ ಮಾಡಿಕೊಟ್ಟಿದ್ದಾರೆ.
ಈ ಹಿಂದೆಯೂ ಅಜಯ್ ಗಿಲ್ ಅವರು ಧೋನಿಯನ್ನು ಕಾಣಲು ಹರಿಯಾಣದಿಂದ ಕಾಲ್ನಡಿಗೆಯಲ್ಲೇ ಬಂದಿದ್ದರು. ಆದರೆ, ಈ ವೇಳೆ ಮಹೇಂದ್ರ ಸಿಂಗ್ ಧೋನಿ ಚೆನ್ನೈನಲ್ಲಿದ್ದರು. ಧೋನಿಯನ್ನು ಭೇಟಿಯಾಗಲೇಬೇಕು ಎಂದು ಹಠ ಹಿಡಿದು ಧೋನಿ ಫಾರ್ಮ್ಹೌಸ್ ಎದುರಿಗೇ ಠಿಕಾಣಿ ಹೂಡಿದ್ದ. ವಿಷಯ ತಿಳಿದ ಧೋನಿ ಆಪ್ತರು ಗಿಲ್ ಮನವೊಲಿಸಿ ಧೋನಿಯನ್ನು ಮತ್ತೊಮ್ಮೆ ಭೇಟಿ ಮಾಡುವಂತೆ ತಿಳಿಸಿ ಹರಿಯಾಣಕ್ಕೆ ವಾಪಸ್ ಕಳುಹಿಸಿದ್ದರು.
