ಲಂಡನ್ : ಚೊಚ್ಚಲ ವಿಶ್ವ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗೆ ಇನ್ನು ಒಂದು ತಿಂಗಳು ಬಾಕಿಯಿದೆ. ಭಾರತ ತಂಡ ಜೂನ್ 18 ರಿಂದ 22ರವರೆಗೆ ಸೌತಾಂಪ್ಟನ್ನಲ್ಲಿ ನಡೆಯಲಿರುವ ಫೈನಲ್ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್ ತಂಡವನ್ನು ಎದುರಿಸಬೇಕಿದೆ.
ಭಾರತದ ಎದುರಾಗಿ ಸದಾ ಹೇಳಿಕೆ ನೀಡುವ ಇಂಗ್ಲೆಂಡ್ ಮಾಜಿ ನಾಯಕ ಮೈಕಲ್ ವಾನ್, ಇದೀಗ ಫೈನಲ್ ಪಂದ್ಯದಲ್ಲಿ ನ್ಯೂಜಿಲ್ಯಾಂಡ್ ಗೆಲ್ಲಲಿದೆ ಎಂದು ಅಪಸ್ವರ ನುಡಿದಿದ್ದಾರೆ.
ಈಗಾಗಲೇ ಇಂಗ್ಲೆಂಡ್ ವಿರುದ್ಧ 2 ಟೆಸ್ಟ್ ಪಂದ್ಯಗಳ ಟೆಸ್ಟ್ ಸರಣಿಯನ್ನಾಡಲು ನ್ಯೂಜಿಲ್ಯಾಂಡ್ ಇಂಗ್ಲೆಂಡ್ ತಲುಪಿದೆ. ಜೂನ್ ಎರಡರದಿಂದ ಸರಣಿ ಆರಂಭವಾಗಲಿದೆ.
ಇಂಗ್ಲೆಂಡ್ ಪರಿಸ್ಥಿತಿಯನ್ನು ಪರಿಗಣನೆಗೆ ತೆಗೆದುಕೊಂಡರೆ ಭಾರತಕ್ಕಿಂತ ನ್ಯೂಜಿಲ್ಯಾಂಡ್ ತಂಡಕ್ಕೆ ಹೆಚ್ಚು ಅನುಕೂಲವಾಗಲಿದೆ ಎನ್ನಲಾಗುತ್ತಿದೆ. ಹಾಗೆಯೇ ಮೈಕಲ್ ವಾನ್ ಕೂಡ ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ನಲ್ಲಿ ಭಾರತವನ್ನು ಕಿವೀಸ್ ಪಡೆ ಬಗ್ಗು ಬಡಿಯಲಿದೆ ಎಂದು ಸ್ಪಾರ್ಕ್ ಸ್ಪೋರ್ಟ್ಸ್ ಚಾನೆಲ್ಗೆ ನೀಡಿದ ಸಂದರ್ಶನದಲ್ಲಿ ತಿಳಿಸಿದ್ದಾರೆ.
ಡಬ್ಲ್ಯೂಟಿಸಿ ಫೈನಲ್ನಲ್ಲಿ ನ್ಯೂಜಿಲೆಂಡ್ ಗೆಲ್ಲಲಿದೆ. ಏಕೆಂದರೆ, ಇಂಗ್ಲೆಂಡ್ ಕಂಡೀಷನ್ಸ್, ಡ್ಯೂಕ್ ಬಾಲ್, ಭಾರತದ ಬಿಡುವಿಲ್ಲದ ವೇಳಾಪಟ್ಟಿ ಭಾರತಕ್ಕೆ ಹಿನ್ನಡೆಯಾದರೆ, ಕಿವೀಸ್ಗೆ ಬಲವಾಗಿದೆ. ಅಲ್ಲದೆ ಅವರು ಫೈನಲ್ ಪಂದ್ಯ ಕೇವಲ ಒಂದು ವಾರ ಇರುವಾಗ ಇಂಗ್ಲೆಂಡ್ಗೆ ಬರಲಿದ್ದಾರೆ.
ಆದರೆ, ನ್ಯೂಜಿಲೆಂಡ್ ತಂಡಕ್ಕೆ ಇಂಗ್ಲೆಂಡ್ ವಿರುದ್ಧ ಎರಡು ಪಂದ್ಯಗಳಿವೆ. ಜೊತೆಗೆ ಇಂಗ್ಲೆಂಡ್ ವಿರುದ್ಧದ ಪಂದ್ಯಗಳು ಟೆಸ್ಟ್ ಚಾಂಪಿಯನ್ಶಿಪ್ ಫೈನಲ್ಗಾಗಿ ನ್ಯೂಜಿಲೆಂಡ್ಗೆ ಅಭ್ಯಾಸ ಪಂದ್ಯ ಎಂದು ನೀವು ಬೇಕಾದರೆ ವಾದಿಸಬಹುದು ಎಂದು ಮೈಕಲ್ ವಾನ್ ಹೇಳಿದ್ದಾರೆ.
"ನ್ಯೂಜಿಲೆಂಡ್ ಉತ್ತಮವಾಗಿ ತಯಾರಾಗಲಿದೆ ಎಂದು ನನಗೆ ಸಾಕಷ್ಟು ಸ್ಪಷ್ಟತೆಯಿದೆ. ಅವರು ರೆಡ್ ಬಾಲ್ನಲ್ಲಿ ಹೆಚ್ಚು ಕ್ರಿಕೆಟ್ ಆಡಿದ ಹೆಚ್ಚಿನ ಆಟಗಾರರನ್ನು ಹೊಂದಿದ್ದಾರೆ. ವಿಶೇಷವಾಗಿ ಇಂಗ್ಲೆಂಡ್ನಲ್ಲಿ ಬಳಸುವ ಡ್ಯೂಕ್ ಬಾಲ್ ನ್ಯೂಜಿಲೆಂಡ್ಗೆ ಹೆಚ್ಚು ನೆರವಾಗಲಿದೆ" ಎಂದು ಆಂಗ್ಲರ ಮಾಜಿ ನಾಯಕ ತಿಳಿಸಿದ್ದಾರೆ.
ಇದನ್ನು ಓದಿ:ಕೊಹ್ಲಿ ಪರ ಮಾತನಾಡಿದ ಪಾಕ್ ಕ್ರಿಕೆಟರ್ಗೆ ಫಿಕ್ಸರ್ ಎಂದು ಹೀಯಾಳಿಸಿದ ಮೈಕಲ್ ವಾನ್
